ନୂଆଦିଲ୍ଲୀ,ଏଜେନ୍ସି: ବିହାରର ରାଜ୍ୟସଭା ଉପ-ନିର୍ବାଚନରେ ଭାରତୀୟ ଜନତା ପାର୍ଟିର ସୁଶୀଲ କୁମାର ମୋଦୀ ନିର୍ଦ୍ବନ୍ଦ୍ବରେ ନିର୍ବାଚିତ ହୋଇଛନ୍ତି। ସୋମବାର ବିଧାନସଭା ଲାଇବ୍ରେରୀରେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ଉପସ୍ଥିତିରେ ତାଙ୍କୁ ନିର୍ବାଚନ ଅଧିକାରୀ ତଥା ପାଟନା ଡିଭିଜନାଲ କମିସନର ସଞ୍ଜୟ ଅଗ୍ରୱାଲ ତାଙ୍କୁ ପ୍ରମାଣପତ୍ର ପ୍ରଦାନ କରିଛନ୍ତି। ରାଜ୍ୟସଭାକୁ ନିର୍ବାଚିତ ହେବା ପରେ ମୋଦୀ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ଧନ୍ୟବାଦ ଜଣାଇଛନ୍ତି। ସେ କହିଛନ୍ତି ଯେ ବିହାର ସରକାରରେ ମୋତେ ଦିଆଯାଇଥିବା ଦାୟିତ୍ୱକୁ ବିଶ୍ୱସ୍ତ ଭାବରେ ପୂରଣ କରିଛି, ବର୍ତ୍ତମାନ ମୁଁ ରାଜ୍ୟସଭାରେ ବିହାର ସମ୍ବନ୍ଧୀୟ ପ୍ରସଙ୍ଗ ଉଠାଇବି। ସେ କହିଛନ୍ତି ଯେ ଏଥର ବିହାର ନିର୍ବାଚନରେ ମୋର ଭୂମିକା ରାମ ସେତୁ ତିଆରି କରିବାରେ ସହଯୋଗ କରିଥିବା ଗୁଣ୍ଡୁଚିମୂଷା ଭଳି ଥିଲା।
ପୂର୍ବତନ କେନ୍ଦ୍ର ମନ୍ତ୍ରୀ ରାମ ଭିଲାସ ପାସୱାନଙ୍କ ମୃତ୍ୟୁ ପରେ ଏହି ଆସନ ଖାଲି ପଡିଥିଲା। ଏହା ସହ ସୁଶୀଲ ମୋଦୀ ବିହାରର ତୃତୀୟ ନେତା ହୋଇପାରିଛନ୍ତି ଯିଏକି ଲୋକସଭା, ରାଜ୍ୟସଭା, ବିଧାନସଭା ଏବଂ ବିଧାନ ପରିଷଦର ୪ଟି ଗୃହର ସଦସ୍ୟ ରହିଛନ୍ତି। ଏହାପୂର୍ବରୁ ଲାଲୁ ପ୍ରସାଦ ଏବଂ ନାଗମାନି ଏହି ୪ଟି ଗୃହର ସଦସ୍ୟ ଥିଲେ।
୧୯୯୦ ମସିହାରେ ସକ୍ରିୟ ରାଜନୀତିରେ ଯୋଗଦେବା ପରେ ସୁଶୀଲ ମୋଦୀ ପାଟନା କେନ୍ଦ୍ରୀୟ (ବର୍ତ୍ତମାନ କୁମ୍ଭାର) ବିଧାନସଭାରୁ ନିର୍ବାଚନ ଜିତିଥିଲେ। ସେ ୧୯୯୬ ରୁ ୨୦୦୪ ପର୍ଯ୍ୟନ୍ତ ଆଠ ବର୍ଷ ଧରି ବିହାର ବିଧାନସଭାରେ ବିରୋଧୀ ଦଳର ନେତା ଥିଲେ। ୨୦୦୦ ରେ, ସେ ୭ ଦିନିଆ ନୀତୀଶ ସରକାରରେ ସଂସଦୀୟ ବ୍ୟାପାର ମନ୍ତ୍ରୀ ହୋଇଥିଲେ। ୨୦୦୪ ରେ ଭାଗଲପୁରରୁ ଲୋକସଭା ସାଂସଦ ହୋଇଥିଲେ। ଝାଡଖଣ୍ଡ ଗଠନର ଜଣେ ଦୃଢ ସମର୍ଥକ ସୁଶୀଲ ମୋଦୀ ୨୦୦୫ରେ ବିହାରରେ ଏନଡିଏ ସରକାର ଆସିବାରୁ ଲୋକସଭାରୁ ଇସ୍ତଫା ଦେଇ ବିହାରର ଉପମୁଖ୍ୟମନ୍ତ୍ରୀ ହୋଇଥିଲେ। ଜୁନ୍ ୨୦୧୩ ରେ ନୀତୀଶ ସରକାରରୁ ବିଜେପି ବିଭାଜନ ନହେବା ପର୍ଯ୍ୟନ୍ତ ସେ ଉପ-ମୁଖ୍ୟମନ୍ତ୍ରୀ ରହିଥିଲେ। ସରକାର ଛାଡିବା ପରେ ସେ ବିହାର ବିଧାନସଭାରେ ବିରୋଧୀ ଦଳର ନେତା ମଧ୍ୟ ହୋଇଥିଲେ।
