ଜୀବନ ସହ ସଂଘର୍ଷ କରୁଥିବା ମାତ୍ର ୭ ସପ୍ତାହର ହାତୀ ଛୁଆ ‘ରାଜା’କୁ ଉନ୍ନତ ଚିକିତ୍ସା ପାଇଁ ଆସାମରୁ ଗୁଜରାଟର ଜାମନଗରସ୍ଥିତ ‘ବନ୍ତାରା’କୁ ଏୟାରଲିଫ୍ଟ କରାଯାଇଛି। ଜନ୍ମ ହେବା ଦିନଠାରୁ ଅସୁସ୍ଥ ଥିବା ଏହି ହାତୀ ଛୁଆର ଚିକିତ୍ସା ପାଇଁ ବନ୍ତାରାର ପ୍ରାଣୀ ଚିକିତ୍ସକ ଦଳ ଗତ ସାତ ସପ୍ତାହ ଧରି କାର୍ଯ୍ୟରତ ରହିଥିଲେ। ଏହାସତ୍ତ୍ୱେ ରାଜା’ର ସ୍ୱାସ୍ଥ୍ୟାବସ୍ଥାରେ ଅବନତି ଦେଖାଯିବା ପରେ ତା’ର ଜୀବନ ବଞ୍ଚାଇବା ପାଇଁ ତା’କୁ ଅତ୍ୟାଧୁନିକ ହସ୍ପିଟାଲ୍ରେ ରଖି ଚିକିତ୍ସା କରିବା ଜରୁରୀ ହୋଇପଡ଼ିଛି। ସୁତରାଂ ତାକୁ ବନ୍ତାରା ପ୍ରାଣୀ କେନ୍ଦ୍ରକୁ ଅଣାଯିବାକୁ ନିଷ୍ପତ୍ତି ନିଆଯାଇଛି। ଆସାମର ପୋହୁମାରାରୁ ଜାମନଗର ପର୍ଯ୍ୟନ୍ତ ୨,୫୦୦ କିଲୋମିଟରରୁ ଅଧିକ ଦୂରତା ସଡ଼କ ପଥରେ ଅତିକ୍ରମ କରିବା ଏତେ କମ୍ ବୟସର ଏବଂ ଦୁର୍ବଳ ହାତୀ ଛୁଆ ପାଇଁ ବିପଦପୂର୍ଣ୍ଣ ହୋଇଥାନ୍ତା। ତେଣୁ ବିମାନ ଯୋଗେ ତାକୁ ନେବାର ବ୍ୟବସ୍ଥା କରାଯାଇଛି। ରାଜାକୁ ଯଥାଶୀଘ୍ର ଏବଂ ସୁରକ୍ଷିତ ଭାବେ ଉନ୍ନତ ଚିକିତ୍ସା ସୁବିଧା ପହଞ୍ଚାଇବା ଏହାର ଉଦ୍ଦେଶ୍ୟ। ବନ୍ତାରା ପ୍ରତିଷ୍ଠାତା ଅନନ୍ତ ଅମ୍ବାନୀଙ୍କ ସହଯୋଗରେ ଭାରତରେ ଏହା ତୃତୀୟ ଏଭଳି ଏୟାରଲିଫ୍ଟ ଅଭିଯାନ।ବନ୍ତାରାର ସିଇଓ ବିବାନ କରାଣୀ କହିଛନ୍ତି, “ରାଜା ଜନ୍ମ ହେବା ସମୟରେ ତା’ର ଗୋଡ଼ ଭାଙ୍ଗିଯାଇଥିଲା, କିନ୍ତୁ ତା’ର ମନୋବଳ ଭାଙ୍ଗିନଥିଲା। ନିଜର କ୍ଷୁଦ୍ର ଶରୀର ତୁଳନାରେ ଅଧିକ ସାହସର ସହ ସେ ଗତ ସାତ ସପ୍ତାହ ଧରି ସଂଘର୍ଷ କରିଆସୁଛି। ଏବେ ଅନନ୍ତ ଅମ୍ବାନୀଙ୍କ ସହଯୋଗ ଯୋଗୁଁ ରାଜାକୁ ତା’ ନିଜ ଗୋଡ଼ରେ ଠିଆ ହେବା, ଚାଲିବା ଏବଂ ଦିନେ ଦୌଡ଼ିବା ପାଇଁ ସବୁ ପ୍ରକାର ଚେଷ୍ଟା କରାଯିବ।
ଜନ୍ମର ପ୍ରଥମ ଦିନରୁ ରାଜା’ର ଆରମ୍ଭ ହୋଇଥିଲା ସଂଘର୍ଷ
୨ ଅକ୍ଟୋବର ୨୦୨୬ରେ ଆସାମର ଗୋଗାମୁଖଠାରେ ରାଜାର ଜନ୍ମ ହୋଇଥିଲା। ତା’ର ମାଆର ବୟସ ମାତ୍ର ୧୧ ବର୍ଷ ଥିଲା। ଅଳ୍ପ ବୟସ ଓ ଅଭିଜ୍ଞତାର ଅଭାବ ଯୋଗୁଁ ପ୍ରସବ ପରେ ସେ ଭୟଭୀତ ଓ ବିଚଳିତ ହୋଇପଡ଼ିଥିଲା। ଏହି ସମୟରେ ସେ ନବଜାତ ଛୁଆକୁ ଗୋଇଠା ମାରିବାରୁ ରାଜାର ଡାହାଣ ପଛ ଗୋଡ଼ର ଜଂଘ ହାଡ଼ ସମ୍ପୂର୍ଣ୍ଣ ଭାବେ ଭାଙ୍ଗିଯାଇଥିଲା। ସାଧାରଣତଃ ଏହି ବୟସରେ ହାତୀ ଛୁଆ ମାଆ ପାଖେ ପାଖେ ଚାଲିବା ଶିଖିଥାଏ। କିନ୍ତୁ ରାଜା ଠିଆ ହେବା କିମ୍ବା ଗୋଡ଼ରେ ଶରୀରର ଓଜନ ବହନ କରିବାକୁ ମଧ୍ୟ ସକ୍ଷମ ନଥିଲା। ଏହା ସହିତ ତାକୁ ମାଆର ପ୍ରଥମ କ୍ଷୀର ବା କୋଲୋଷ୍ଟ୍ରମ୍ ମଧ୍ୟ ମିଳିନଥିଲା। ନବଜାତ ହାତୀ ଛୁଆର ରୋଗ ପ୍ରତିରୋଧକ କ୍ଷମତା ଓ ଶାରୀରିକ ଶକ୍ତି ବୃଦ୍ଧି ପାଇଁ ଏହି କ୍ଷୀର ଅତ୍ୟନ୍ତ ଜରୁରୀ।
ସାତ ସପ୍ତାହ ଧରି ଘରେ ଚାଲିଥିଲା ଚିକିତ୍ସା
ରାଜାର ମାଲିକ ଓ ଯତ୍ନ ନେଉଥିବା ଲୋକମାନେ ତା’ର ଅବସ୍ଥା ଦେଖି ବିଶେଷଜ୍ଞଙ୍କ ସହାୟତା ଲୋଡ଼ିଥିଲେ। ଏହାପରେ ୮ ଅକ୍ଟୋବର ୨୦୨୬ରେ ବନ୍ତାରାର ରାପିଡ୍ ରେସପନ୍ସ ଟିମ୍ ରାଜା ପାଖରେ ପହଞ୍ଚିଥିଲା। ଏକ୍ସ-ରେ ପରୀକ୍ଷାରୁ ତା’ର ଗୋଡ଼ର ହାଡ଼ ସମ୍ପୂର୍ଣ୍ଣ ଭାବେ ଭାଙ୍ଗିଯାଇଥିବା ଏବଂ ହାଡ଼ର ଦୁଇଟି ଭଙ୍ଗା ଅଂଶ ପରସ୍ପର ଉପରକୁ ଖସିଯାଇ ସ୍ଥାନଚ୍ୟୁତ ହୋଇଥିବା ଜଣାପଡ଼ିଥିଲା। ଚିକିତ୍ସକ ଦଳ ପ୍ଲାଷ୍ଟର କାଷ୍ଟ ଓ ବ୍ୟାଣ୍ଡେଜ୍ ମାଧ୍ୟମରେ ଆହତ ଗୋଡ଼କୁ ସ୍ଥିର କରିଥିଲେ। ଏହା ସହିତ ଏକ ସ୍ଲିଙ୍ଗ୍ର ସହାୟତାରେ ରାଜାକୁ ଠିଆ ହେବାରେ ସାହାଯ୍ୟ କରାଯାଉଥିଲା, ଯାହାଦ୍ୱାରା ଆହତ ଗୋଡ଼ ଉପରେ ଚାପ କମ୍ ପଡ଼ିବ। ତାକୁ ସ୍ୱତନ୍ତ୍ର ଭାବେ ପ୍ରସ୍ତୁତ କ୍ଷୀରର ବିକଳ୍ପ ଖାଦ୍ୟ ଦିଆଯିବା ସହ ବୋତଲରେ କ୍ଷୀର ପିଆଇବା ଓ ଯତ୍ନ ନେବା ସମ୍ପର୍କରେ ମାଲିକଙ୍କୁ ଆବଶ୍ୟକ ପରାମର୍ଶ ଦିଆଯାଇଥିଲା।୧୦ ଅକ୍ଟୋବରରେ ରାଜାକୁ ପୋହୁମାରାସ୍ଥିତ ତା’ର ମାଲିକଙ୍କ ଘରକୁ ନିଆଯାଇଥିଲା। ସେଠାରେ ବନ୍ତାରା ଟିମ୍ ଦ୍ୱାରା ନିରନ୍ତର ଚିକିତ୍ସା, ଯତ୍ନ ଓ ୨୪ ଘଣ୍ଟିଆ ନିରୀକ୍ଷଣ ଜାରି ରହିଥିଲା। ଏହାସହିତ ଆହତ ଗୋଡ଼ ଉପରେ ଚାପ ନପକାଇ ଶରୀରର ଗତିଶୀଳତା ଓ ଶକ୍ତି ବୃଦ୍ଧି ପାଇଁ ତା’ର ବିଶ୍ରାମସ୍ଥଳ ନିକଟରେ ଏକ ହାଇଡ୍ରୋଥେରାପି ପୋଖରୀ ମଧ୍ୟ ନିର୍ମାଣ କରାଯାଇଥିଲା।
ସ୍ୱାସ୍ଥ୍ୟାବସ୍ଥା ଜଟିଳ, ହସ୍ପିଟାଲ୍ରେ ଚିକିତ୍ସା ଜରୁରୀ
ମାଆର କ୍ଷୀର ନମିଳିବା ଏବଂ ସ୍ୱାଭାବିକ ଭାବେ ଚଳପ୍ରଚଳ କରିପାରୁନଥିବାରୁ ରାଜାକୁ ଏକାଧିକ ସ୍ୱାସ୍ଥ୍ୟଗତ ସମସ୍ୟାର ସାମ୍ନା କରିବାକୁ ପଡ଼ିଛି। ତାକୁ ଝାଡ଼ା ହୋଇଥିବା ବେଳେ ଲାବୋରେଟୋରୀ ପରୀକ୍ଷାରେ ‘କ୍ଲେବ୍ସିଏଲା ନିମୋନିଆ’ ନାମକ ବ୍ୟାକ୍ଟେରିଆଜନିତ ସଂକ୍ରମଣ ଚିହ୍ନଟ ହୋଇଛି।ଏହା ବ୍ୟତୀତ ତା’ର ରକ୍ତରେ ଶର୍କରାର ପରିମାଣ ବାରମ୍ବାର କମିଯାଉଛି। ରକ୍ତ ପରୀକ୍ଷାରୁ ଯକୃତ ସମ୍ବନ୍ଧୀୟ କିଛି ଉପାଦାନର ମାତ୍ରା ବୃଦ୍ଧି ପାଇଥିବା ଜଣାପଡ଼ିଛି, ଯାହା ଯକୃତ ଉପରେ ଚାପ ପଡ଼ୁଥିବାର ସଙ୍କେତ ଦେଉଛି। ଦୀର୍ଘ ସମୟ ଧରି ଶୋଇ ରହିବା କାରଣରୁ ମୁଣ୍ଡରେ ଘା’ ହୋଇଛି। ଏହା ସହିତ ନାଭି ନିକଟରେ ହାର୍ଣ୍ଣିଆ ଓ ଅନ୍ୟ ସାଧାରଣ ଦୁର୍ବଳତା ମଧ୍ୟ ଦେଖାଦେଇଛି। ଚିକିତ୍ସକ ଦଳ ଆଣ୍ଟିବାୟୋଟିକ୍, ଶିରା ମାଧ୍ୟମରେ ତରଳ ପଦାର୍ଥ, ଯକୃତ ସୁରକ୍ଷାକାରୀ ଔଷଧ, ଭିଟାମିନ୍, ଖଣିଜ ପଦାର୍ଥ, ପ୍ରୋବାୟୋଟିକ୍ସ ଓ କ୍ଷତର ଯତ୍ନ ସହ ସ୍ୱତନ୍ତ୍ର ପୁଷ୍ଟିକର ଖାଦ୍ୟ ଦେଇ ଏହି ସମସ୍ୟାଗୁଡ଼ିକର ଚିକିତ୍ସା କରୁଛନ୍ତି।ସବୁପ୍ରକାର ଯତ୍ନ ତଥା ସେବା ସତ୍ତ୍ୱେ ରାଜାର ସ୍ୱାସ୍ଥ୍ୟାବସ୍ଥା ଏବେ ମଧ୍ୟ ଗମ୍ଭୀର ରହିଛି। ତାକୁ ଅତ୍ୟାଧୁନିକ ପରୀକ୍ଷା, ନିରନ୍ତର ସ୍ୱାସ୍ଥ୍ୟ ନିରୀକ୍ଷଣ, ଅସ୍ଥିରୋଗ ବିଶେଷଜ୍ଞଙ୍କ ଚିକିତ୍ସା ଏବଂ ଯୋଜନାବଦ୍ଧ ପୁଷ୍ଟିକର ଖାଦ୍ୟ ଓ ପୁନର୍ବାସ କାର୍ଯ୍ୟକ୍ରମର ଆବଶ୍ୟକତା ରହିଛି। ଏସବୁ ସୁବିଧା କେବଳ ଏକ ସମ୍ପୂର୍ଣ୍ଣ ସୁସଜ୍ଜିତ ହସ୍ପିଟାଲ୍ରେ ହିଁ ମିଳିପାରିବ।
ଚାରି ଘଣ୍ଟାର ବିମାନ ଯାତ୍ରାରେ ଜାମନଗର ଆସିଲା ରାଜା
୨୦ ନଭେମ୍ବର ୨୦୨୬ରେ ଗୁଆହାଟୀରୁ ଜାମନଗର ଅଭିମୁଖେ ଏକ ସ୍ୱତନ୍ତ୍ର ବିମାନରେ ରାଜାକୁ ଅଣାଯିବା ପାଇଁ ବ୍ୟବସ୍ଥା କରାଯାଇଥିଲା। ଏହି ବିମାନ ଯାତ୍ରା ପାଇଁ ପ୍ରାୟ ଚାରି ଘଣ୍ଟା ସମୟ ଲାଗିବ। ରାଜାର ଶରୀରର ଆକାର ଅନୁଯାୟୀ ଏକ ସ୍ୱତନ୍ତ୍ର କ୍ରେଟ୍ ବା ସୁରକ୍ଷିତ ପରିବହନ ବାକ୍ସ ପ୍ରସ୍ତୁତ କରାଯାଇଛି। ଏଥିରେ ତା’ର ଭଙ୍ଗା ଗୋଡ଼କୁ ସ୍ଥିର ଓ ସୁରକ୍ଷିତ ରଖିବା ସହ ଯାତ୍ରା ସମୟରେ ଝଟ୍କାରୁ ରକ୍ଷା କରିବା ପାଇଁ ନରମ ବିଛଣା ବ୍ୟବସ୍ଥା ରହିଛି। ମୁଣ୍ଡରେ ହୋଇଥିବା ଘା’ ଉପରେ ଚାପ ନପଡ଼ିବା ପାଇଁ ମଧ୍ୟ ବିଶେଷ ଧ୍ୟାନ ଦିଆଯାଇଛି। ଏତଦ୍ବ୍ୟତୀତ ଯାତ୍ରାର ସମ୍ପୂର୍ଣ୍ଣ ସମୟରେ ବନ୍ତାରାର ପ୍ରାଣୀ ଚିକିତ୍ସକ, ପାରାଭେଟ୍ ଓ ଯତ୍ନକାରୀଙ୍କ ଏକ ସ୍ୱତନ୍ତ୍ର ଟିମ୍ ରାଜା ସହିତ ରହିବେ। ତା’ର ହୃତ୍ସ୍ପନ୍ଦନ, ଶ୍ୱାସକ୍ରିୟା, ଶରୀରର ତାପମାତ୍ରା, ଜଳୀୟ ଅଂଶ ଓ ରକ୍ତରେ ଶର୍କରାର ସ୍ତର ନିରନ୍ତର ଯାଞ୍ଚ କରାଯିବ। ଆବଶ୍ୟକ ଔଷଧ, ତରଳ ପଦାର୍ଥ ଓ କ୍ଷୀର ମଧ୍ୟ ବିମାନରେ ରଖାଯାଇଛି। ସଡ଼କ ପଥରେ ଦିନ ଦିନ ଲାଗିବା ପରିବର୍ତ୍ତେ ବିମାନ ଯୋଗେ ମାତ୍ର କିଛି ଘଣ୍ଟାରେ ରାଜାକୁ ଗନ୍ତବ୍ୟସ୍ଥଳରେ ପହଞ୍ଚାଇବା ଦ୍ୱାରା ତା’ର ମାନସିକ ଚାପ ଓ ସ୍ୱାସ୍ଥ୍ୟଗତ ବିପଦ କମ୍ ହେବ ବୋଲି ଆଶା କରାଯାଉଛି।
ବନ୍ତାରାରେ ରାଜା ପାଇଁ ରହିବ ସ୍ୱତନ୍ତ୍ର ଚିକିତ୍ସା ବ୍ୟବସ୍ଥା
ଜାମନଗରରେ ପହଞ୍ଚିବା ପରେ ରାଜାକୁ ବନ୍ତାରାର ହାତୀ ହସ୍ପିଟାଲ୍ରେ ଭର୍ତ୍ତି କରାଯିବ। ସେଠାରେ ପ୍ରଥମେ ତା’ର ସମ୍ପୂର୍ଣ୍ଣ ସ୍ୱାସ୍ଥ୍ୟ ପରୀକ୍ଷା କରାଯିବ। ଏହାପରେ ଯନ୍ତ୍ରଣା ନିୟନ୍ତ୍ରଣ, ଔଷଧ ପ୍ରୟୋଗ, ଚଳପ୍ରଚଳ କ୍ଷମତା ବୃଦ୍ଧି ପାଇଁ ଥେରାପି ଓ ପୁଷ୍ଟିକର ଖାଦ୍ୟ ମାଧ୍ୟମରେ ପୁନର୍ବାସ ଚିକିତ୍ସା ଜାରି ରହିବ। ରାଜାର ଆଘାତର ପ୍ରକୃତିକୁ ଦୃଷ୍ଟିରେ ରଖି ତାକୁ ଜୀବନସାରା ପ୍ରାଣୀ ଚିକିତ୍ସା ଓ ନିୟମିତ ସ୍ୱାସ୍ଥ୍ୟ ନିରୀକ୍ଷଣର ଆବଶ୍ୟକତା ପଡ଼ିପାରେ। ଏଥିପାଇଁ ବନ୍ତାରା ପକ୍ଷରୁ ଦୀର୍ଘକାଳୀନ ଯତ୍ନ ଯୋଗାଇଦେବାକୁ ପ୍ରତିଶ୍ରୁତି ଦିଆଯାଇଛି।
ବନ୍ତାରା ସମ୍ପର୍କରେ
ଗୁଜରାଟର ଜାମନଗରରେ ଅବସ୍ଥିତ ‘ବନ୍ତାରା’ ଏକ ଅନ୍ତର୍ଜାତୀୟ ବନ୍ୟପ୍ରାଣୀ ଉଦ୍ଧାର, ଚିକିତ୍ସା, କଲ୍ୟାଣ ଓ ସଂରକ୍ଷଣ ପଦକ୍ଷେପ। ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍ର କାର୍ଯ୍ୟନିର୍ବାହୀ ନିର୍ଦ୍ଦେଶକ ଅନନ୍ତ ଅମ୍ବାନୀ ଏହାର ପ୍ରତିଷ୍ଠାତା। ଅତ୍ୟାଧୁନିକ ପ୍ରାଣୀ ଚିକିତ୍ସା, ବିଶେଷ ଭିତ୍ତିଭୂମି ଓ ବିଭିନ୍ନ କ୍ଷେତ୍ରର ବିଶେଷଜ୍ଞଙ୍କ ସହଯୋଗରେ ବନ୍ତାରା ପକ୍ଷରୁ ବନ୍ୟପ୍ରାଣୀଙ୍କ ଉଦ୍ଧାର, ଚିକିତ୍ସା, ପୁନର୍ବାସ ଓ ଦୀର୍ଘକାଳୀନ ଯତ୍ନ ନିଆଯାଉଛି। ଭାରତ ଓ ବିଦେଶର ସରକାରୀ ସଂସ୍ଥା ଏବଂ ବନ୍ୟପ୍ରାଣୀ ସଂରକ୍ଷଣ ସଂଗଠନ ସହ ମିଶି ଏହା କାର୍ଯ୍ୟ କରୁଛି। ପ୍ରାଣୀଙ୍କୁ ଉପଯୁକ୍ତ ସ୍ଥିତିରେ ସେମାନଙ୍କ ପ୍ରାକୃତିକ ବାସସ୍ଥାନକୁ ଫେରାଇବା, ସ୍ୱଦେଶୀ ପ୍ରଜାତିର ସଂରକ୍ଷଣ, ପ୍ରାକୃତିକ ବାସସ୍ଥଳୀର ପୁନରୁଦ୍ଧାର ଏବଂ ମଣିଷ-ବନ୍ୟପ୍ରାଣୀ ସଂଘର୍ଷ ହ୍ରାସ ଦିଗରେ ମଧ୍ୟ ବନ୍ତାରା କାର୍ଯ୍ୟ କରୁଛି।