୧୮ ଗୁଣରୁ ଅଧିକ ସବ୍ସ୍କ୍ରାଇବ୍, ୬.୫ ଲକ୍ଷ କୋଟି ଟପିଲା ଚାହିଦା
ଭାରତୀୟ ସେୟାର ବଜାର ଇତିହାସର ସର୍ବବୃହତ ଆଇପିଓ ଭାବେ ରିଲାଏନ୍ସ ଜିଓ ପ୍ଲାଟଫର୍ମସ୍ ସୃଷ୍ଟି କରିଛି ଏକ ନୂଆ ମାଇଲଖୁଣ୍ଟ। ମାତ୍ର ୩ ଦିନରେ ନିବେଶକଙ୍କ ଏହି ଅଦ୍ଭୁତପୂର୍ବ ଉତ୍ସାହ ବଜାରରେ ଏକ ନୂଆ ଝଡ଼ ସୃଷ୍ଟି କରିଛି। ରିଲାଏନ୍ସ ଇଣ୍ଡଷ୍ଟ୍ରିଜ୍ର ଜିଓ ପ୍ଲାଟଫର୍ମସ୍ ଆଇପିଓ ବିପୁଳ ନିବେଶକଙ୍କୁ ଆକର୍ଷିତ କରିବା ସହ ୧୮ ଗୁଣ ସବ୍ସ୍କ୍ରିପସନ୍ ଏବଂ ୧.୩୫ କୋଟିରୁ ଅଧିକ ଆବେଦନ ସହିତ ଶେଷ ହୋଇଛି। କମ୍ପାନୀ ପକ୍ଷରୁ ସେୟାର କରାଯାଇଥିବା ସର୍ବଶେଷ ତଥ୍ୟ ଅନୁଯାୟୀ, ଆଙ୍କର ନିବେଶକଙ୍କୁ ବାଦ୍ ଦେଲେ କେବଳ ସାଧାରଣ ଲୋକଙ୍କ ଚାହିଦା ୪ ଲକ୍ଷ କୋଟିରୁ ଅଧିକ ରହିଥିବା ବେଳେ, ଆଙ୍କର ନିବେଶକଙ୍କ ସମେତ ମୋଟ ଚାହିଦା ୬.୫ ଲକ୍ଷ କୋଟି ଟପିଛି। ଭାରତର ସର୍ବବୃହତ୍ ଆକାରର ଏହି ଆଇପିଓ ଆସନ୍ତା ଅକ୍ଟୋବର ୨୮, ୨୦୨୬ରେ ଷ୍ଟକ୍ ମାର୍କେଟରେ ତାଲିକାଭୁକ୍ତ (ଲିଷ୍ଟିଂ) ହେବାକୁ ସ୍ଥିର ହୋଇଛି।
ଅକ୍ଟୋବର ୨୧ରୁ ୨୩ ପର୍ଯ୍ୟନ୍ତ ଚାଲିଥିବା ତିନି ଦିନିଆ ସବ୍ସ୍କ୍ରିପସନ୍ ଅବଧିରେ ୩୦,୨୦୦ କୋଟିରୁ ଅଧିକ ମୂଲ୍ୟର ଏହି ଆଇପିଓ ପାଇଁ ପ୍ରାୟ ୧.୩୫ କୋଟି ଆବେଦନ ଗ୍ରହଣ କରାଯାଇଛି। ମୁକେଶ ଅମ୍ବାନୀଙ୍କ ନେତୃତ୍ୱାଧୀନ ରିଲାଏନ୍ସ ଇଣ୍ଡଷ୍ଟ୍ରିଜ୍ର ଡିଜିଟାଲ୍ ସେବା ବ୍ୟବସାୟ ଯାହା ଭାରତର ସର୍ବବୃହତ ଟେଲିକମ୍ ନେଟୱାର୍କ ପରିଚାଳନା କରେ ଏବଂ ବ୍ରଡବ୍ୟାଣ୍ଡ, କ୍ଲାଉଡ୍ ସର୍ଭିସ୍ ତଥା କୃତ୍ରିମ ବୁଦ୍ଧିମତା (ଏଆଇ) କ୍ଷେତ୍ରରେ ବିସ୍ତାର କରିଛି। ତେବେ ‘ଜିଓ’ ପ୍ରତି ନିବେଶକଙ୍କ ଏହି ଅଦ୍ଭୁତପୂର୍ବ ଆଗ୍ରହ, ଉତ୍ସାହ ଏବଂ ସର୍ବୋପରି ବିଶ୍ୱାସ ଏକ ନୂଆ କୀର୍ତ୍ତିମାନ ସ୍ଥାପନ କରିଛି।
ତେବେ ଜିଓ ଆଇପିଓ ପାଇଁ ହୋଇଥିବା ଏହି ଆବେଦନ ସଂଖ୍ୟାଟି ବେଶ୍ ଗୁରୁତ୍ୱପୂର୍ଣ୍ଣ। ଶୁକ୍ରବାର ପୂର୍ବରୁ ମନିକଣ୍ଟ୍ରୋଲ୍ ରିପୋର୍ଟ କରିଥିଲା ଯେ, ଜିଓ ଏକ କୋଟିରୁ ଅଧିକ ଆବେଦନ ପାଇ ପୂର୍ବରୁ ୱାରୀ ଏନର୍ଜିଜ୍ ନାମରେ ଥିବା ପ୍ରାୟ ୯୭ ଲକ୍ଷ ଆବେଦନର ରେକର୍ଡକୁ ପଛରେ ପକାଇ ଦେଇଛି। ମୋଟାମୋଟି ଭାବେ କହିବାକୁ ଗଲେ ସାଧାରଣ ଲୋକଙ୍କ ପାଇଁ ଆଇପିଓ ଖୋଲିବା ପୂର୍ବରୁ ହିଁ ଜିଓ ପର୍ଯ୍ୟାପ୍ତ ପରିମାଣର ସାଂସ୍ଥାଗତ ନିବେଶକଙ୍କୁ ଆକର୍ଷିତ କରିସାରିଥିଲା। କମ୍ପାନୀ ଅକ୍ଟୋବର ୧୯ ତାରିଖରେ ୨୧୨ ଜଣ ଆଙ୍କର ନିବେଶକଙ୍କ ଠାରୁ ପ୍ରାୟ ୮,୧୧୦ କୋଟି ସଂଗ୍ରହ କରିଥିଲା। ଏଥିରେ ଉଭୟ ଜାତୀୟ ଏବଂ ଅନ୍ତର୍ଜାତୀୟ ସାଂସ୍ଥାଗତ ନିବେଶକମାନେ ସାମିଲ ଥିଲେ। ଜାତୀୟ ନିବେଶକଙ୍କ ଭଳି ଅନ୍ତର୍ଜାତୀୟ ନିବେଶକମାନେ ମଧ୍ୟ ଜିଓର ସେୟାର ଉପରେ ଯଥେଷ୍ଟ ବିଶ୍ୱାସ ପ୍ରକଟ କରିଥିଲେ ଏବଂ ପ୍ରଚୁର ପରିମାଣର ସ୍ଲଟ୍ ବୁକ୍ ଅଗ୍ରୀମ ଭାବେ କରିନେଇଥିଲେ। ଆଇପିଓର ଆକାର ବହୁତ ବଡ଼ ହୋଇଥିବା ସତ୍ତ୍ୱେ ଏହି ପ୍ରବଳ ଚାହିଦା ଦେଖିବାକୁ ମିଳିଥିଲା, ଯାହା ଏହାକୁ ୨୦୨୬ ମସିହାର ସବୁଠାରୁ ଅଧିକ ନଜର ରଖାଯାଇଥିବା ବଜାର ଘଟଣାଗୁଡ଼ିକ ମଧ୍ୟରୁ ଅନ୍ୟତମ କରିପାରିଛି।
ଜିଓ ପ୍ଲାଟଫର୍ମସର ଶେୟାରଗୁଡ଼ିକ ଅକ୍ଟୋବର ୨୮ ତାରିଖରେ ବିଏସ୍ଇ ଏବଂ ଏନ୍ଏସ୍ଇରେ ତାଲିକାଭୁକ୍ତ ହେବା ପାଇଁ ସ୍ଥିର ହୋଇଛି, ଏବଂ ଅକ୍ଟୋବର ୨୬ ତାରିଖ ସୁଦ୍ଧା ଶେୟାର ବଣ୍ଟନ ହେବାର ସମ୍ଭାବନା ରହିଛି। ଏହା ତାଲିକାଭୁକ୍ତିକରଣ ନିବେଶକମାନଙ୍କୁ ରିଲାଏନ୍ସର ଟେଲିକମ୍ ଏବଂ ଡିଜିଟାଲ୍ ସେବା ବ୍ୟବସାୟରେ ସାର୍ବଜନୀନ ଭାବେ କାରବାର ହୋଇପାରୁଥିବା ଅଂଶଧନ ପ୍ରଦାନ କରିବ। ସିଧାସଳଖ କହିଲେ ବର୍ତ୍ତମାନ ସମସ୍ତଙ୍କ ନଜର ଶେୟାର ବଣ୍ଟନ, ଅନ୍ତିମ ଇସ୍ୟୁ ମୂଲ୍ୟ ଏବଂ ଜିଓର ଷ୍ଟକ୍ ମାର୍କେଟ୍ ଡେବ୍ୟୁ ଉପରେ ରହିବ। ସବସ୍କ୍ରିପସନ୍ ପରିମାଣ ନିବେଶକଙ୍କ ଦୃଢ଼ ଆଗ୍ରହକୁ ସୂଚାଉଥିଲେ ମଧ୍ୟ କାରବାର ଆରମ୍ଭ ହେବା ପରେ ଏହା ଲାଭ ଦେବାର କୌଣସି ନିଶ୍ଚିତତା ପ୍ରଦାନ କରେ ନାହିଁ।
