ପୁରୀ ପାଇଁ ମୁଁ ପରିଚୟ ପାଇଛି: ସମ୍ବିତ ପାତ୍ର

ଭୁବନେଶ୍ୱର, ଏନ୍ଏନ୍ଏସ୍: ବିଜେପି ରାଜ୍ୟ ସାଧାରଣ ସମ୍ପାଦିକା ଡ. ଲେଖାଶ୍ରୀ ସାମନ୍ତସିଂହାରଙ୍କ ବିବାଦୀୟ ବୟାନ ପରେ ବିଜେପି ରାଷ୍ଟ୍ରୀୟ ପ୍ରବକ୍ତା ସମ୍ବିତ ପାତ୍ର ମୁହଁ ଖୋଲିଛନ୍ତି। ସୋସିଆଲ ମିଡିଆରେ ସମ୍ବିତ ନିଜର ମତ ପ୍ରକାଶ କରି କହିଛନ୍ତି ପୁରୀ ପାଇଁ ସେ ପରିଚୟ ପାଇଛନ୍ତି। ଲେଖାଶ୍ରୀଙ୍କ ବୟାନ ଉପରେ ପ୍ରତିକ୍ରିୟା ନଦେଇ ଚତୁରତାର ସହ ପ୍ରସଙ୍ଗକୁ ପ୍ରସମିତ କରିବାକୁ ସମ୍ବିତ ଭିଡ଼ିଓ ଜାରି କରିଥିବା ଅନୁମାନ କରାଯାଉଛି।

ଜଗନ୍ନାଥ ଧାମ ପୁରୀ ପାଇଁ ଓଡିଶା ପରିଚିତ। ପୁରୀ ଧାମ ସମଗ୍ର ଭାରତ ଏବଂ ଓଡିଶାର ଗର୍ବ ।
କରୋନାର SOP ଅନୁସରଣ କରି ଭକ୍ତମାନଙ୍କ ପାଇଁ ପ୍ରଭୁ ଶ୍ରୀ ଜଗନ୍ନାଥଙ୍କ ମନ୍ଦିରର ଦ୍ୱାର ଖୋଲିବା ପାଇଁ ଓଡ଼ିଶା ରାଜ୍ୟ ସରକାରଙ୍କୁ ଅନୁରୋଧ କରୁଛୁ।
ଜୟ ଜଗନ୍ନାଥ🙏 pic.twitter.com/7os8khOp1P

— Sambit Patra (@sambitswaraj) November 18, 2020

ନିଜ ଟ୍ୱିଟର ପେଜରେ ଏକ ଭିଡ଼ିଓ ବାର୍ତ୍ତା ମାଧ୍ୟମରେ କହିଛନ୍ତି, ପୁରୀ ହେଉଛି ସମଗ୍ର ବିଶ୍ୱର, ସମଗ୍ର ବ୍ରହ୍ମାଣ୍ଡର କେନ୍ଦ୍ର। ସ୍ୱୟଂ ମଣିମା, ସ୍ୱୟଂ ଜଗନ୍ନାଥ, ସ୍ୱୟଂ ନାରାୟଣ ପୁରୀରେ ଅନାଦି କାଳରୁ ନିବାସ କରି ଆସୁଛନ୍ତି। ତାଙ୍କ ଆର୍ଶିବାଦ ମାଧ୍ୟମରେଆମ ସମସ୍ତଙ୍କୁ ଆଚ୍ଛାଦିତ କରୁଛନ୍ତି । ଆଜି ଓଡ଼ିଶାର ଯଦି କିଛି ପରିଚୟ ଅଛି, ଯଦି ଓଡ଼ିଶାକୁ ସାରାବିଶ୍ୱରେ ଚିହ୍ନୁଛୁ, ଏହାର ମୁଖ୍ୟ କାରଣ ହେଉଛି ପୁରୀଧାମ, ମଖ୍ୟ କାରଣ ହେଉଛି ମହାପ୍ରଭୂ ଜଗନ୍ନାଥ। ପୁରୀ ଧାମ ସମଗ୍ର ଭାରତ ଏବଂ ଓଡିଶାର ଗର୍ବ।
ମୋ ପାଇଁ ଏକ ଗୌରବର ବିଷୟ ୨୦୧୯ ନିର୍ବାଚନରେ ମହାଧାମ ପୁରୀରୁ ଭାଗ ନେଇଥିଲି। ଆପଣମାନଙ୍କର ସ୍ନେହ ପାଇଥିଲି ଓ ମଣିମାଙ୍କ ଆର୍ଶିବାଦ ପାଇଥିଲା। ଏହା ମୋ ପାଇଁ ଏକ ସୌଭାଗ୍ୟ। ମୁଁ ଏକ ସାଧାରଣ ଘରର ପିଲା, ମୋତେ କିଏ ଜାଣିଥିଲା? ମୁଁ ଯେତେବେଳେ ପୁରୀଧାମକୁ ଆସିଲି, ସେତେବେଳେ ମୋତେ ଆପଣମାନେ ଚିହ୍ନିଲେ, ଭଲପାଇବା ଦେଲେ। ସେଥିପାଇଁ ଆପଣଙ୍କ ପାଇଁ ସ୍ୱର ଉଠାଇବା ମୋର କର୍ତ୍ତବ୍ୟ। ମୋ ପାଖକୁ ଅନେକ ଫୋନ ଆସିଲାଣି, ଲୋକେ ଚାହୁଁଛନ୍ତି ମନ୍ଦିର ଖୋଲୁ। ତେଣୁ ଭକ୍ତ ଓ ଭଗବାନଙ୍କ ମଧ୍ୟରେ ଆଉ ଦୂରତା ନରଖି ରାଜ୍ୟ ସରକାର ଶ୍ରୀମନ୍ଦିରକୁ ଖୋଲନ୍ତୁ। କରୋନାର ଏସଓପି ଅନୁସରଣ କରି ଭକ୍ତମାନଙ୍କ ପାଇଁ ପ୍ରଭୁ ଶ୍ରୀ ଜଗନ୍ନାଥଙ୍କ ମନ୍ଦିରର ଦ୍ୱାର ଖୋଲିବା ପାଇଁ ସେ ଅନୁରୋଧ କରିଛନ୍ତି।