ଉମରକୋଟ,ଏନ୍ଏନ୍ଏସ୍: ନବରଙ୍ଗପୁର ଜିଲ୍ଲାରେ ଏବେ ବ୍ୟବସାୟୀଙ୍କୁ ଟାର୍ଗେଟ କରିଛନ୍ତି ଲୁଟେରା। ବିଚ୍ ରାସ୍ତାରୁ ହିଁ ଲୁଟି ନେଉଛନ୍ତି ଲକ୍ଷ ଲକ୍ଷ ଟଙ୍କା। କେବଳ ସେତିକି ନୁହେଁ, ଲୁଟେରାଙ୍କ ଆକ୍ରମଣରେ କିଏ ଆଖି ବୁଜୁଛି ତ କିଏ ମୃତ୍ୟୁ ସହ ସଂଗ୍ରାମ କରୁଛି।
ଗତ ୧୮ ତାରିଖରେ ଝରିଗାଁ ଅଞ୍ଚଳରୁ ଜଣେ ବ୍ୟବସାୟୀଙ୍କୁ ହାଣି ଲୁଟେରା ୪ ଲକ୍ଷ ନେଇଯାଇଥିବା ବେଳେ ଗତକାଲି ହୋଇଛି ୨ଟି ବଡ଼ ଧରଣର ଲୁଟପାଟ। ଜିଲ୍ଲାର ରାଇଘର ଥାନା ଭାରସୁଣ୍ଡି ଗ୍ରାମ ନିକଟରୁ ଜଣେ ବ୍ୟବସାୟୀଙ୍କ ନିକଟରୁ ୧୧ ଲକ୍ଷ ଟଙ୍କା ସୁନା, ରୂପା ଲୁଟ ହୋଇଥିବା ବେଳେ କୋଡିଙ୍ଗା ଥାନା ଅଞ୍ଚଳରୁ ଜଣେ ବ୍ୟବସାୟୀଙ୍କ ମୁହଁରେ ଗାମୁଛା ପକାଇ ଲୁଟେରା ଅଢେଇ ଲକ୍ଷ ନେଇ ପଳାଇଥିଲେ।
ଗତ ୧୮ ତାରିଖ ଲୁଟ୍ ଘଟଣାରେ ପୁଲିସ୍ ଗତକାଲି ୪ ଜଣଙ୍କୁ ଗିରଫ କରି କୋର୍ଟଚାଲାଣ କରିବା ପରେ ଏହି ୨ଟି ଘଟଣା ଘଟିଥିବାରୁ ନବରଙ୍ଗପୁର ଜିଲ୍ଲାରେ ଏବେ ଲୁଟେରାଙ୍କ ରାଜ ଚାଲିଥିବା କୁହାଯାଉଛି।
ସୂଚନାଯୋଗ୍ୟ ଯେ, ଗତକାଲି ସନ୍ଧ୍ୟାରେ ସୁନା ବ୍ୟବସାୟୀ ରାଇଘର ଥାନା ମହୁଭାଟ୍ଟା ଗ୍ରାମର ଆଶାରାମ ଗଣ୍ଡଙ୍କ ନିକଟରୁ ୧୧ ଲକ୍ଷରୁ ଊର୍ଦ୍ଧ୍ୱ ଟଙ୍କାର ସୁନା ଗହଣା ଲୁଟ୍ ହୋଇଛି। ଗତକାଲି ନିକଟସ୍ଥ ଗୋନା ସପ୍ତାହିକ ହାଟରୁ ବ୍ୟବସାୟ ସାରି ଆଶାରାମ ନିଜ ବାଇକ୍ ଯୋଗେ ଘର ମହୁଭାଟ୍ଟାକୁ ଫେରୁଥିଲେ। ଭାରସୁଣ୍ଡି ଗ୍ରାମ ନିକଟରେ ଦୁଇଟି ବାଇକରେ ମୁଖା ପିନ୍ଧା ୪ ଦୁର୍ବୃତ୍ତ ହଠାତ୍ ପହଞ୍ଚି ଆଶାରାମଙ୍କୁ ଅଟକାଇଥିଲେ। ଏହାପରେ ବିଭିନ୍ନ ପ୍ରକାର ଧମକ ଚମକ ଦେବା ସହ ଏକ ଛୁରିରେ ଆକ୍ରମଣ କରି କାଠ ବାକ୍ସରେ ଥିବା ୩୦ ଗ୍ରାମ ସୁନା ଗହଣା ଏବଂ ୧୫ କେଜି ରୂପା ଗହଣା ଲୁଟି ନେଇଥିବା ଜଣାପଡିଛି।
ଆହତ ଆଶାରାମଙ୍କୁ ସ୍ଥାନୀୟ ଲୋକେ ଉଦ୍ଧାର କରି ନିକଟସ୍ଥ ଡାକ୍ତରଖାନାରେ ଭର୍ତ୍ତି କରିଛନ୍ତି। ଖବରପାଇ ରାଇଘର ଥାନା ପୁଲିସ ରାଇଘରକୁ ସଂଯୋଗ କରୁଥିବା ସମସ୍ତ ରାସ୍ତାକୁ ସିଲ୍ କରି ତଦନ୍ତ ଆରମ୍ଭ କରିଛନ୍ତି।
ସେହିପରି କାଲି ସନ୍ଧ୍ୟାରେ ଜିଲ୍ଲାର କୋଡିଙ୍ଗା ଥାନା ଅନ୍ତର୍ଗତ ଦେଉଧରା ଗ୍ରାମ ନିକଟରେ ଜଣେ ବ୍ୟବସାୟୀଙ୍କ ମୁହଁରେ ଗାମୁଛା ପକାଇ ୨ ଦୁର୍ବୃତ୍ତ ଅଢ଼େଇ ଲକ୍ଷ ଟଙ୍କା ଲୁଟି ନେଇଥିଲେ। ସହର ମଧ୍ୟରେ ତଥା ସହର ବାହାରେ ବେଧଡ଼କ ଭାବେ ଏପରି ଘଟଣା ଘଟୁଥିବାରୁ ଲୋକେ ଆତଙ୍କିତ ଅବସ୍ଥାରେ ରହୁଛନ୍ତି।
