ଦୁବାଇ,ଏଜେନ୍ସି: ଆଇସିସି ପକ୍ଷରୁ ଆଜି ଏକ ଗୁରୁତ୍ୱପୂର୍ଣ୍ଣ ବୈଠକର ଆୟୋଜନ କରାଯାଇଛି। ଏହି ବୈଠକରେ ଆଇସିସିର ପରବର୍ତ୍ତୀ ଅଧ୍ୟକ୍ଷ ପଦ ପୂରଣ ନେଇ ପ୍ରକ୍ରିୟା ଆରମ୍ଭ ହେବ। ସୂଚନା ଅନୁଯାୟୀ ଆଇସିସି ଅଧ୍ୟକ୍ଷ ଭାବେ ଶଶାଙ୍କ ମନୋହରଙ୍କ କାର୍ଯ୍ୟକାଳ ଶେଷ ହୋଇଛି। ତେଣୁ ଏହି ଅଧ୍ୟକ୍ଷ ପଦ ନିମନ୍ତେ ନିର୍ବାଚନ ହେଉ କି ସର୍ବସମ୍ମତିକ୍ରମେ ମନୋନୟନ ହେଉ, ସମସ୍ତ ପ୍ରକ୍ରିୟା ଆସନ୍ତା ୪ ସପ୍ତାହ ମଧ୍ୟରେ ଶେଷ ହେବ। ଏ ସମ୍ପର୍କରେ ଜଣେ ବୋର୍ଡ ସଦସ୍ୟ ଗଣମାଧ୍ୟମକୁ ସୂଚନା ଦେଇଛନ୍ତି।
ଆସନ୍ତା ଦୁଇସପ୍ତାହ ମଧ୍ୟରେ ଅଧ୍ୟକ୍ଷ ପଦ ନିମନ୍ତେ ନାମାଙ୍କନ ପତ୍ର ଦାଖଲ କରିପାରିବେ ଆଶାୟୀ। ଆଇସିସି ବୋର୍ଡରେ ୧୭ ଜଣ ସଦସ୍ୟ ଅଛନ୍ତି। ଟେଷ୍ଟ ଖେଳୁଥିବା ୧୨ଟି ଦେଶର କ୍ରିକେଟ୍ ବୋର୍ଡ ପ୍ରତିନିଧି, ୩ଟି ସହଯୋଗୀ ଦେଶର କ୍ରିକେଟ୍ ବୋର୍ଡ ପ୍ରତିନିଧି, ମଧ୍ୟବର୍ତ୍ତୀକାଳୀନ ଅଧ୍ୟକ୍ଷ ଓ ଜଣେ ନିର୍ଦେଶକ ସଦସ୍ୟ ରହିଛନ୍ତି। ସେହିପରି ଆଇସିସି ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ବୋର୍ଡର ସଦସ୍ୟ ଥିଲେ ମଧ୍ୟ ତାଙ୍କର ଭୋଟଦାନ କ୍ଷମତା ନାହିଁ। ତେବେ ସର୍ବସମ୍ମତିକ୍ରମେ ନୂଆ ଅଧ୍ୟକ୍ଷ ନିଯୁକ୍ତି ପାଇଁ ବୋର୍ଡ ବୈଠକରେ ଉଦ୍ୟମ କରାଯିବ ବୋଲି ଜଣାପଡ଼ିଛି।
ଆଇସିସିର ନୂଆ ଅଧ୍ୟକ୍ଷ ଦୌଡ଼ରେ ଆଗରେ ରହିଛନ୍ତି ଇଂଲଣ୍ଡ କ୍ରିକେଟ୍ ବୋର୍ଡର ପୂର୍ବତନ ମୁଖ୍ୟ କଲିନ୍ ଗ୍ରେଭସ। ୱେଷ୍ଟଇଣ୍ଡିଜ କ୍ରିକେଟ୍ ବୋର୍ଡର ପୂର୍ବତନ ମୁଖ୍ୟ ଡେଭ୍ କାମେରୁନ, ଦକ୍ଷିଣ ଆଫ୍ରିକା କ୍ରିକେଟ୍ ବୋର୍ଡ ସହ ଜଡ଼ିତ କ୍ରିସ୍ ନେନଜାଜି ଅଧ୍ୟକ୍ଷ ପଦ ପାଇଁ ଇଚ୍ଛୁକ ଥିବାବେଳେ ଏହି ବୋର୍ଡର ନିର୍ଦ୍ଦେଶକ ଗ୍ରାହାମ୍ ସ୍ମିଥ୍ କିଛିଦିନ ତଳେ ବିସିସିଆଇ ସଭାପତି ସୌରଭ ଗାଙ୍ଗୁଲି ଆଇସିସିର ପରବର୍ତ୍ତୀ ଅଧ୍ୟକ୍ଷ ହେବା ଉଚିତ୍ ବୋଲି କହିଥିଲେ। ଅନ୍ୟପକ୍ଷରେ ବର୍ତ୍ତମାନ ଆଇସିସିର ମଧ୍ୟବର୍ତ୍ତୀକାଳୀନ ଅଧ୍ୟକ୍ଷ ଭାବେ ଦାୟିତ୍ୱ ତୁଲାଉଥିବା ଇମ୍ରାନ୍ ଖାୱାଜା ମଧ୍ୟ ନିର୍ବାଚନ ଲଢ଼ିପାରନ୍ତି ବୋଲି ଆଲୋଚନା ହେଉଛି।
