କୋରାପୁଟ,ଏନ୍ଏନ୍ଏସ୍: କରୋନାର ଭୟାବହତାକୁ ଦୃଷ୍ଟିରେ ରଖି ସମସ୍ତ ଶିକ୍ଷାନୁଷ୍ଠାକୁ ବନ୍ଦ ରଖାଯାଇଛି। କିନ୍ତୁ କେନ୍ଦ୍ରୀୟ ବିଶ୍ୱବିଦ୍ୟାଳୟ ଓଡ଼ିଶାର କୁଳପତି ପ୍ରଫେସର ଆଇ.ରାମାବ୍ରହ୍ମମ୍ ଜୟପୁର ଓ କୋରାପୁଟରେ ଥିବା ଛାତ୍ରଛାତ୍ରୀଙ୍କ ଘରକୁ ଯାଇ ପାଠପଢ଼ା କଥା ବୁଝିଛନ୍ତି। କୋରାପୁଟରେ ରହୁଥିବା ଫାଇନାଲ ସେମିଷ୍ଟାର ଛାତ୍ରୀ ଶ୍ୱେତା ଚୌଧୁରୀ ଓ ଦୁଇଗ୍ରୀଂ ଶବରଙ୍କ ଘରକୁ ଯାଇ ଶ୍ରୀ ରାମାବ୍ରହ୍ମମ୍ ସେମାନଙ୍କ ଅଭିଭାବକଙ୍କ ସହ ଆଲୋଚନା କରିଥିଲେ ଓ ଅନଲାଇନ ପରୀକ୍ଷା ସମ୍ପର୍କରେ ପଚାରି ବୁଝିଥିଲେ। ସେହିପରି ଜୟପୁରର ୮ଜଣ ଛାତ୍ରଛାତ୍ରୀଙ୍କ ଘରକୁ ଯାଇ ସେମାନଙ୍କ ପାଠପଢ଼ା ସମ୍ପର୍କରେ ପଚାରି ବୁଝିଥିବା ଜଣାପଡ଼ିଛି। ଏହି ସମୟରେ ସମାଜ ବିଜ୍ଞାନ ବିଭାଗର ପ୍ରଫେସର ପି.ଦୁର୍ଗା ପ୍ରସାଦ, ଲୋକ ସମ୍ପର୍କ ଅଧିକାରୀ ଡା. ଫଗୁନାଥ ଭୋଇ ଓ ସୁଧାକର ପଟ୍ଟନାୟକ ପ୍ରମୁଖ କୁଳପତିଙ୍କ ସହ ଉପସ୍ଥିତ ଥିଲେ।
