ମୁନିଗୁଡ଼ା,ଏନ୍ଏନ୍ଏସ୍: ରାୟଗଡ଼ା ଜିଲ୍ଲା ମୁନିଗୁଡ଼ାରେ ନିର୍ମାଣଧୀନ ନୂତନ ବସଷ୍ଟାଣ୍ଡର ନାମକରଣକୁ ନେଇ ବିବାଦ ଜୋର ଧରିଛି । ନିର୍ମାଣଧୀନ ବସଷ୍ଟାଣ୍ଡକୁ ସହିଦ ଲକ୍ଷ୍ମଣ ନାୟକ ବସଷ୍ଟାଣ୍ଡ ନାମରେ ନାମକରଣ କରିବାକୁ ପୂର୍ବରୁ ମୁଖ୍ୟମନ୍ତ୍ରୀଙ୍କୁ ମୁନିଗୁଡ଼ା ଅଞ୍ଚଳବାସୀ ଦାବୀ କରିଥିଲେ । ଏନେଇ ଆଜି ସହିଦ ଲକ୍ଷ୍ମଣ ନାୟକ କ୍ଲବ ସଭାପତି ପଦ୍ମନାଭ ବେହେରାଙ୍କ ନେତୃତ୍ୱରେ ଶତାଧିକ ସାଧାରଣ ଜନତା ମୁନିଗୁଡ଼ା ବ୍ଲକ କାର୍ଯ୍ୟାଳୟରେ ପହଞ୍ଚି ବିଡିଓ ପ୍ରିତମ କୁମାର ତନ୍ତିଙ୍କୁ ରାଜ୍ୟପାଳଙ୍କ ଉଦ୍ଦେଶ୍ୟରେ ଏକ ଦାବୀପତ୍ର ପ୍ରଦାନ କରିଥିଲେ । ଲୋକଙ୍କ ଯାତାୟତ ସୁବିଧାକୁ ଦୃଷ୍ଟିରେ ରଖି ପଞ୍ଚାୟତ ତରଫରୁ ୧୯୯୯ ମସିହାରେ ପଞ୍ଚାୟତରାଜ ମନ୍ତ୍ରୀ ସ୍ୱର୍ଗତ ଜନାବ ହବିବୁଲା ଖାନ୍ ଓ ତତ୍କାଳୀନ ବିଧାୟକ ଡମ୍ବୁରୁଧର ଉର୍ଲ୍ଲାକାଙ୍କ ଦ୍ୱାରା ଏଠାରେ ସହିଦ ଲକ୍ଷଣ ନାୟକଙ୍କ ନାଁରେ ଏକ ବସଷ୍ଟାଣ୍ଡ ଉଦଘାଟନ କରାଯ।।ଇଥିଲା । ରାଜ୍ୟ ସରକାରଙ୍କ ବସଷ୍ଟାଣ୍ଡର ଉନ୍ନତିକରଣ କ୍ରମେ ମୁନିଗୁଡ଼ାରେ ଥିବା ଏହି ସହିଦ ଲକ୍ଷ୍ମଣ ନାୟକ ବସଷ୍ଟାଣ୍ଡକୁ ଭାଙ୍ଗି ସେହି ସ୍ଥାନରେ ଓଏସଆରଟିସି ତରଫରୁ ଏକ ଉନ୍ନତ ଓ ଅତ୍ୟାଧୁନିକ ବସଷ୍ଟାଣ୍ଡ ନିର୍ମାଣ ହୋଇଛି । ନିକଟରେ ଏହାର ଉଦଘାଟନ ହେବାକୁ ଥିବାବେଳେ ନୂତନ ବସଷ୍ଟାଣ୍ଡ ନିର୍ମାଣ ସମୟରେ ଅଞ୍ଚଳବାସୀ ସହିଦଙ୍କ ସ୍ମୃତି ଉଦ୍ଦେଶ୍ୟରେ ଏହାର ନାମ ସହିଦ ଲକ୍ଷ୍ମଣ ନାୟକ ବସଷ୍ଟାଣ୍ଡ କରିବାକୁ ଜୋର୍ ଦେଇଥିଲେ । ହେଲେ ଏହି ବସଷ୍ଟାଣ୍ଡ ନାମକରଣକୁ ନେଇ ବହୁ ବିବାଦ ପରେ ମଧ୍ୟ ପ୍ରଶାସନ ସହିଦ ଲକ୍ଷଣ ନାୟକଙ୍କ ନାଁକୁ ଅଣଦେଖା କରିବା ପରିତାପ ଏବଂ ଅଞ୍ଚଳ ପ୍ରତି ଘୋର ଅପମାନଜନକ ବୋଲି ସଭାପତି କହିଛନ୍ତି । ଅନ୍ୟପଟେ ବସଷ୍ଟାଣ୍ଡ ଭାଙ୍ଗିଲା ବେଳେ ବହୁ ବ୍ୟବସାୟୀ ଜୀବିକା ହରାଇଥିଲେ । ସେତେବେଳେ ନୂଆ ବସଷ୍ଟାଣ୍ଡରେ ସେମାନଙ୍କୁ ଥଇଥାନ କରାଯିବ ବୋଲି ପ୍ରଶାସନ ପକ୍ଷରୁ ପ୍ରତିଶ୍ରୁତି ଦିଆଯାଇ ଥିଲା । ହେଲେ ଏବେ ସେମାନଙ୍କୁ ଅଣଦେଖା କରି ଅନ୍ୟମାନଙ୍କୁ ଦେବାର ଚକ୍ରାନ୍ତ ଚାଲୁଥିବା ସେ ଦାବୀରେ ଉଲ୍ଲେଖ କରିଛନ୍ତି । ତେବେ ଯଦି ଆଗାମୀ ଦିନରେ ସହିଦଙ୍କ ନାଁରେ ବସଷ୍ଟାଣ୍ଡ ନାମକରଣ ସହ ବ୍ୟବସାୟୀଙ୍କୁ ଥଇଥାନ କରାନଯାଏ ତେବେ ଆନ୍ଦୋଳନ ଜୋରଦାର କରାଯିବ ବୋଲି ଅଞ୍ଚଳବାସୀ ଚେତାବନୀ ଦେଇଛନ୍ତି । ଆଜି ବିଡିଓଙ୍କୁ ଦାବୀପତ୍ର ପ୍ରଦାନ କରିବାବେଳେ ମୁନିଗୁଡ଼ା ଗ୍ରାମପଞ୍ଚାୟତର ସରପଞ୍ଚ ସରସ୍ୱତୀ ଶବରଙ୍କ ସମେତ ସହିଦ ଲକ୍ଷ୍ମଣ ନାୟକ କ୍ଲବର ସଭାପତି ପଦ୍ମନାଭ ବେହେରା, ଜନନେତା ନୀଳାମ୍ବର ବିଭାର, ସାମାଜିକ ସମ୍ପାଦକ ମାଧବ ବଲ୍ଲଭାଇ ଓ କାର୍ଯ୍ୟକାରୀ ସଭ୍ୟ ସୋମନାଥ ମାର୍ଥା ପ୍ରମୁଖ ଉପସ୍ଥିତ ଥିଲେ ।
