କ୍ଲାସ୍‌ ରୁମ୍‌ରେ ଶିକ୍ଷକ ସାଜିଲେ ଜିଲ୍ଲାପାଳ, ଛାତ୍ରଛାତ୍ରୀଙ୍କୁ ପଢାଇଲେ ବିଜ୍ଞାନ

ପାଟଣାଗଡ଼,ଏନ୍ଏନ୍ଏସ୍: ଆଜି ବଲାଙ୍ଗିର ଜିଲ୍ଲାପାଳ ଚଞ୍ଚଳ ରାଣା ଖପ୍ରାଖୋଲ ଗସ୍ତରେ ଯାଇଥିଲେ। ଏହି ସମୟରେ ଖପ୍ରାଖୋଲ ବ୍ଲକ୍‌ରେ ଅବସ୍ଥାପିତ ସରକାରଙ୍କ ଅନୁସୂଚୀତ ଜାତି ଓ ଅନୁସୂଚିତ ଜନଜାତି ବିଭାଗ ଦ୍ଵାରା ପରିଚାଳିତ ସରକାରୀ ଉଚ୍ଚ ମାଧ୍ୟମିକ ବିଦ୍ୟାଳୟରେ ନିଜେ ଜିଲ୍ଲାପାଳ କ୍ଲାସ୍‌ ରୁମ୍‌ରେ ପିଲାମାନଙ୍କୁ ପାଠପଢ଼ାଇଛନ୍ତି। ଏହି ଘଟଣା ଏବେ ସାରା ଜିଲ୍ଲାରେ ଚର୍ଚ୍ଚାର ବିଷୟ ହୋଇଛି।

ଜିଲ୍ଲାପାଳ ସେହି ସ୍କୁଲରେ ଦୀର୍ଘ ସମୟ ଧରି ଛାତ୍ରଛାତ୍ରୀଙ୍କୁ ବିଜ୍ଞାନ ପାଠ ପଢ଼ାଇବା ସହ ବିଭିନ୍ନ ପାଠ୍ୟକ୍ରମ ବିଷୟରେ ଛାତ୍ରଛାତ୍ରୀଙ୍କୁ ପ୍ରଶ୍ନ କରିଥିଲେ। ଜିଲ୍ଲାପାଳ ପାଠପଢ଼ାଉ ଥିବା ବେଳେ ଛାତ୍ରଛାତ୍ରୀ ମାନଙ୍କ ଠାରେ ବେଶ୍‌ ଉତ୍ସାହ ଦେଖାଦେଇଥିଲା। ଏହି ସମୟରେ ପାଟଣାଗଡ଼ ଉପଜିଲ୍ଲାପାଳ ଡକ୍ତର ବିଜୟା ନନ୍ଦ ସେଠୀ ସମେତ ବ୍ଲକର ଅତିରିକ୍ତ ବିଡିଓ ସହକାରୀ ଯନ୍ତ୍ରୀ ସମ୍ୟଶେଖର ଜୟପୁରିଆ ପ୍ରମୁଖ ଉପସ୍ଥିତ ଥିଲେ।