ଭିଜିଲାନ୍ସ ଜାଲରେ ତିନି ସରକାରୀ ବାବୁ
ବଲାଙ୍ଗିର/ଗଞ୍ଜାମ/ଅନୁଗୁଳ,ଏନ୍ଏନ୍ଏସ୍: ପୁଣି ଭିଜିଲାନ୍ସ ଜାଲରେ ଛନ୍ଦି ହେଲେ ତିନି ସରକାରୀ ବାବୁ। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ବଲାଙ୍ଗିର, ଗଞ୍ଜାମ ଓ ଅନୁଗୁଳର ତିନି ସରକାରୀ ବାବୁଙ୍କ ଘରେ ରେଡ ହୋଇଛି। ବଲାଙ୍ଗିର କେନ୍ଦ୍ର ସମବାୟ ବ୍ୟାଙ୍କ ଆକାଉଣ୍ଟ ମ୍ୟାନେଜର ସୁଧୀର ନନ୍ଦଙ୍କ ଘରେ ଭିଜିଲାନ୍ସ ଚଢ଼ଉ କରିଛି।
ସମ୍ବଲପୁର ଭିଜିଲାନ୍ସ ଏସପିଙ୍କ ନିର୍ଦ୍ଦେଶରେ ଭିଜିଲାନ୍ସ ବିଭାଗର ୪ଟି ଟିମ ତାଙ୍କର ବଲାଙ୍ଗିର ସହର ଭିତରେ ଥିବା ବ୍ୟାଙ୍କ କାର୍ଯ୍ୟାଳୟ, ପ୍ୟାଲେସଲାଇନ ଏବଂ ରୁଗୁଡିପଡା ଘର, ବରଗଡ଼, ସମ୍ବଲପୁର ଓ ସୋନପୁରରେ ଥିବା ଘରେ ଏକକାଳୀନ ଚଢ଼ଉ କରିଛି। ଚଢ଼ଉ ବେଳେ କିଛି ନଗଦ ଟଙ୍କା, ସୁନା ଅଳଙ୍କାର ମିଳିଥିବା ବେଳେ ଘରବାଡି ସମ୍ପତ୍ତିର ଆକଳନ ଜାରି ରହିଛି। ସେପଟେ ଆକାଉଣ୍ଟାଣ୍ଟ ଏହି ଭିଜିଲାନ୍ସ ରେଡକୁ ନେଇ ପ୍ରତିକ୍ରିୟା ରଖିଛନ୍ତି। ତାଙ୍କର କୌଣସି ଆୟ ବହିର୍ଭୂତ ସମ୍ପତ୍ତି ନଥିବା ସେ କହିଛନ୍ତି।
