ଭୁବନେଶ୍ବର,ଏନ୍ଏନ୍ଏସ୍: ଅନ୍ତିମ ପର୍ଯ୍ୟାୟରେ ପହଞ୍ଚିଛି ଅଲଟିମେଟ ଖୋ ଖୋ । ଆଜି (ରବିବାର) ଅଲଟିମେଟ ଖୋ ଖୋ ପ୍ରଥମ ସିଜିନର ଫାଇନାଲ ଖେଳାଯିବ । ଏଥିରେ ଓଡିଶା ଜଗର୍ନଟ୍ସ ତେଲୁଗୁ ଯୋଦ୍ଧାସ ପରସ୍ପରକୁ ଭେଟିବେ । ଶୁକ୍ରବାର ପ୍ରଥମ କ୍ବାଲିଫାୟର ମ୍ୟାଚ୍ ଖେଳାଯାଇଥିଲା । ଲିଗ୍ ପର୍ଯ୍ୟାୟ ଶେଷ କରିଥିବା ଦୁଇ ଟିମ ଗୁଜରାଟ ଜାଏଣ୍ଟ୍ସ ଓ ଓଡିଶା ଜଗର୍ନଟ୍ସ ମଧ୍ୟରେ କ୍ବାଲିଫାୟର ମ୍ୟାଚ୍ ହୋଇଥିଲା । ବିଜୟୀ ଦଳ ଓଡିଶା ଜଗର୍ନଟ୍ସ ସିଧାସଳଖ ଫାଇନାଲରେ ପହଞ୍ଚିଥିଲା । ଆଜି ରାତି ୮ଟାରେ ଫାଇନାଲ ମୁକାବିଲାରେ ଓଡିଶା ଜଗର୍ନଟ୍ସ ଓ ତେଲୁଗୁ ଯୋଦ୍ଧାସ ମଧ୍ୟରେ କଡା ଲଢେଇ ହେବ ।
ଶେଷ ଦୁଇଟି ଲିଗ୍ ମ୍ୟାଚରେ ଓଡିଶା ଜଗର୍ନଟ୍ସ ଭଲ ପ୍ରଦର୍ଶନ କରିନଥିଲେ ବି କ୍ବାଲିଫାୟର ୧ରେ ଗୁଜୁରାଟ ଜିଆଣ୍ଟସକୁ ୧୪ ପଏଣ୍ଟରେ ହରେଇ ଫାଇନାଲରେ ସ୍ଥାନ ପକ୍କା କରିଥିଲା । ଶନିବାର ଖେଳାଯାଇଥିବା ଲିଗ ପର୍ଯ୍ୟାୟର କ୍ବାଲିଫାୟର-୨ରେ ତେଲୁଗୁ ଯୋଦ୍ଧାସ ୬୭-୪୪ ଲିଗ ପର୍ଯ୍ୟାୟରେ ଟେବୁଲ ଟପର ଗୁଜୁରାଟ ଜାଏଣ୍ଟସକୁ ପରାସ୍ତ କରି ଫାଇନାଲରେ ପ୍ରବେଶ କରିଥିଲା । ଲିଗ୍ ମ୍ୟାଚରେ ଓଡିଶା ଜଗର୍ନଟ୍ସ ତେଲୁଗୁ ଯୋଦ୍ଧାସ ଠାରୁ ଶୋଚନୀୟ ଭାବରେ ପରାସ୍ତ ହେଇଥିଲା । ଚଳିତ ସିଜନରେ ଆକ୍ରମଣାତ୍ମକ ପ୍ରଦର୍ଶନ କରିଥିବା ତେଲୁଗୁ ଯୋଦ୍ଧାସ ଅଲରାଉଣ୍ଡ ପ୍ରଦର୍ଶନ କରିଛି । ତେଣୁ ଆଜିର ଫାଇନାଲ ମ୍ୟାଚ କଡା ମୁକାବିଲା ହେବ ବୋଲି ଆଶା କରାଯାଉଛି ।
ଅନ୍ୟପଟେ ଓଡିଶା ଜଗର୍ନଟ୍ସ ଫାଇନାଲରେ ପ୍ରବେଶ କରିବା ପରେ ଗତକାଲି (ଶନିବାର ) ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଭୟ କୋଚ୍ ଏବଂ ଖେଳାଳିମାନଙ୍କ ସହିତ ଭିଡିଓ କନଫରେନ୍ସିଂ ଜରିଆରେ କଥା ହୋଇ ସେମାନଙ୍କୁ ଶୁଭେଚ୍ଛା ଜଣେଇ ସେମାନଙ୍କ ମନୋବଳ ବଢ଼ାଇଛନ୍ତି । ଖେଳାଳି ମାନେ ମଧ୍ୟ ଓଡ଼ିଶାକୁ ଟ୍ରଫି ନେଇକି ଆସିବୁ ବୋଲି ପ୍ରତିଶ୍ରୁତି ଦେଇଛନ୍ତି ।
ପ୍ରଥମ ସଂସ୍କରଣରେ ମୋଟ ୨ କୋଟି ଟଙ୍କାର ପୁରସ୍କାର ରାଶି ରହିଛି । ଚମ୍ପିଆନ ଦଳକୁ ୧ କୋଟି ରନର୍ସଅପ ଦଳରୁ ୫୦ ଲକ୍ଷ ଏବଂ ତୃତୀୟ ସ୍ଥାନ ହାସଲ କରିଥିବା ଦଳକୁ ୩୦ ଲକ୍ଷ ଏବଂ ଅବଶିଷ୍ଟ ୨୦ ଲକ୍ଷ ଟଙ୍କାର ଅନ୍ୟାନ୍ୟ ପୁରସ୍କାର ପ୍ରଦାନ କରାଯିବ । ପ୍ରଥମ ସଂସ୍କରଣରେ ୬ଟି ଫ୍ରାଞ୍ଚାଇଜ ଦଳ ଭାଗ ନେଇଛନ୍ତି । ଅଗଷ୍ଟ ୧୪ରୁ ପୁଣେର ଛତ୍ରପତି ସ୍ପୋର୍ଟ୍ସ କମ୍ପ୍ଲେକ୍ସରେ ଅଲଟିମେଟ ଖୋ ଖୋ ଲିଗ ଆରମ୍ଭ ହୋଇଥିଲା । ଆଜି ଏହାର ଫାଇନାଲ ଖେଳାଯିବ । ଭାରତର ପ୍ରଥମ ଫାଞ୍ଚାଇଜ ଖୋ ଖୋ ଲିଗ୍ ଦର୍ଶକଙ୍କ ଗ୍ରହଣୀୟତା ହାସଲ କରିବାରେ ସଫଳ ହୋଇଛି । ଆଗକୁ ମହିଳା ଲିଗ ଆୟୋଜନ କରିବାକୁ ଯୋଜନା ହେଉଛି ।
