ନୂଆଦିଲ୍ଲୀ,ଏଜେନ୍ସି: ମୁସଲିମ ପୁରୁଷମାନଙ୍କୁ ଏକରୁ ଅଧିକ ବିବାହ କରିବାକୁ ଅନୁମତି ଦେଇଥିବା ଆଇପିସି ଧାରା ଏବଂ ଶାରିଆ ଆଇନକୁ ରଦ୍ଧ କରିବା ନେଇ ସୁପ୍ରିମକୋର୍ଟରେ ଦାୟର ହୋଇଛି ମାମଲା। ଅନ୍ୟ ଧର୍ମରେ ବହୁ ବିବାହ ଉପରେ ସମ୍ପୂର୍ଣ୍ଣ ନିଷେଧାଦେଶ ଥିବାବେଳେ କେବଳ ଗୋଟିଏ ସମ୍ପ୍ରଦାୟକୁ ଏକାଧିକ ବିବାହ କରିବାକୁ ଅନୁମତି ଦିଆଯାଇପାରିବ ନାହିଁ ବୋଲି ଆବେଦନକାରୀ ତାଙ୍କ ଆବେଦନରେ ଦର୍ଶାଇଛନ୍ତି। ଏହା ସହିତ, ଆଇପିସିର ଧାରା -୪୯୪ ଏବଂ ଶାରିଆ ଆଇନର ଧାରା -୨ ର ବ୍ୟବସ୍ଥାକୁ ଅସାମ୍ବିଧାନିକ ଘୋଷଣା କରିବା ନେଇ ଅନୁରୋଧ କରିଛନ୍ତି। ଯେଉଁଥିରେ ଜଣେ ମୁସଲମାନ ବ୍ୟକ୍ତିଙ୍କୁ ଏକରୁ ଅଧିକ ବିବାହ କରିବାକୁ ଅନୁମତି ଦିଆଯାଇଛି।
ସୁପ୍ରିମକୋର୍ଟରେ ଆବେଦନକାରୀଙ୍କ ତରଫରୁ ଆଡଭୋକେଟ୍ ବିଷ୍ଣୁ ଶଙ୍କର ଜୈନ କହିଛନ୍ତି ଯେ ମୁସଲିମ୍ ପର୍ସନାଲ୍ ଆଇନ (ଶରିୟା) ଆବେଦନ ଅଧିନିୟମ ୧୯୩୭ ଏବଂ ଆଇପିସିର ଧାରା ୪୯୪ ଅନୁଯାୟୀ ମୁସଲିମ ପୁରୁଷମାନଙ୍କୁ ଏକରୁ ଅଧିକ ବିବାହ କରିବାକୁ ଅନୁମତି ଦେଇଥାଏ, ଯାହା ଅସାମ୍ବିଧାନିକ ଅଟେ। ଏହି ନିୟମାବଳୀକୁ ସମ୍ପୂର୍ଣ୍ଣ ଅସାମ୍ବିଧାନିକ ଘୋଷିତ କରିବା ନେଇ ଆବେଦନକାରୀ ସୁପ୍ରିମକୋର୍ଟରେ ଦାବି କରିଛନ୍ତି।
ଆବେଦନକାରୀ ସୁପ୍ରିମକୋର୍ଟରେ ଯୁକ୍ତି ଦର୍ଶାଇଛନ୍ତି ଯେ ଯଦି ମୁସଲମାନ ସମ୍ପ୍ରଦାୟ ବ୍ୟତୀତ ଜଣେ ହିନ୍ଦୁ, ପାର୍ସୀ ଏବଂ ଖ୍ରୀଷ୍ଟିଆନ ପୁରୁଷ ଏକର ଅଧିକ ଥର ବିବାହ କରିଥାନ୍ତି, ତେବେ ସେ ଆଇପିସିର ଧାରା ୪୯୪ ଅନୁଯାୟୀ ଦୋଷୀ ସାବ୍ୟସ୍ତ ହେବେ। ଆବେଦନରେ କୁହାଯାଇଛି ଯେ ଯଦି ଏହି ଉପାୟରେ ଦେଖାଯାଏ, ତେବେ ଧର୍ମ ନାମରେ ଦ୍ୱିତୀୟ ବିବାହକୁ ଅନୁମତି ଦେବା ଆଇପିସି ବ୍ୟବସ୍ଥାରେ ଭେଦଭାବ ଅଟେ। ଆହୁରି ମଧ୍ୟ, ଏପରି ବ୍ୟବସ୍ଥା ହେଉଛି ସମ୍ବିଧାନର ଧାରା ୧୪, ସମାନତା ଅଧିକାର ଏବଂ ଧାରା ୧୫ (ଧର୍ମ ଏବଂ ଜାତି ଆଧାରରେ ଭେଦଭାବ କରିପାରିବା ନାହିଁ) ର ସିଧାସଳଖ ଉଲ୍ଲଂଘନ।
ସୁପ୍ରିମକୋର୍ଟରେ ତାଙ୍କ ପିଟିସନରେ ଆବେଦନକାରୀଙ୍କ ଓକିଲ କହିଛନ୍ତି ଯେ ଆଇପିସିର ଧାରା ୪୯୪ ଅନୁଯାୟୀ ଏକ ବ୍ୟବସ୍ଥା ଅଛି ଯେ ଯଦି ଜଣେ ବ୍ୟକ୍ତି ପତ୍ନୀ ଥିବାବେଳେ ଅନ୍ୟକୁ ବିବାହ କରନ୍ତି, ତେବେ ଏପରି କରିଥିବା ବ୍ୟକ୍ତି ସାତ ବର୍ଷ ପାଇଁ ଜେଲଦଣ୍ଡ ଭୋଗୁଛନ୍ତି। ହେଲେ ମୁସଲିମ ସମ୍ପ୍ରଦାୟ ପୁରୁଷ ମାନଙ୍କ କ୍ଷେତ୍ରରେ ଏହି ଆଇନ ଲାଗୁ ହେଉନାହିଁ ବୋଲି ସେ ଅବଗତ କରାଇଛନ୍ତି।
