ପାରାଦ୍ୱୀପ,ଏନ୍ଏନ୍ଏସ୍: ପାରାଦ୍ୱୀପ ଉପକୂଳରୁ ଆଉ ଏକ ମୃତ ବିଲୁପ୍ତପ୍ରାୟ ପ୍ରଜାତି ଲଙ୍ଗ ସ୍ନାଉଟେଡ୍ ସ୍ପିନର ଡଲଫିନ୍ (ଷ୍ଟେନେଲା ଡଲଫିନ୍) ଉଦ୍ଧାର କରାଯାଇଛି। ୫ ଫୁଟ୍ ୬ ଇଞ୍ଚ “ଲମ୍ବା ଡଲଫିନର ଓଜନ ପ୍ରାୟ ୫୦ କିଲୋଗ୍ରାମ ହେବ ବୋଲି ସୂଚନା ମିଳିଛି।
ଏହି ଷ୍ଟେନେଲା ଡଲଫିନ୍ ଭାରତୀୟ ମହାସାଗରରେ କ୍ୱଚିତ୍ ଦେଖିବାକୁ ମିଳେ। ୧୫ ଦିନ ତଳେ ପାରାଦ୍ୱୀପ ବନ୍ଦରର ଗେଟ୍ ନମ୍ବର ୫ ନିକଟରେ ଥିବା ହନୁମାନ ମନ୍ଦିର ପଛରେ ଥିବା ଏକ ପୁରୁଷ ଷ୍ଟେନେଲା ଡଲଫିନ୍ ମୃତଦେହ ଉଦ୍ଧାର କରାଯାଇଥିଲା ବେଳେ ଗତକାଲି ପାରାଦ୍ୱୀପ ବିଶୋଧନାଗାର ଦକ୍ଷିଣ ଗେଟ୍ ନିକଟରୁ ଏକ ମହିଳା ଷ୍ଟେନେଲା ଡଲଫିନ୍ ମୃତଦେହ ଉଦ୍ଧାର କରାଯାଇଛି। ଏହି ଖବର ପାଇବା ପରେ କୁଜାଙ୍ଗ ଜଙ୍ଗଲ ଅଧିକାରୀମାନେ ଡଲଫିନକୁ ବ୍ୟବଚ୍ଛେଦ ପାଇଁ ନେଇଥିଲେ।
ଏହି ପ୍ରଜାତିର ଡଲଫିନ୍ ବ୍ରାଜିଲ ଏବଂ ଫ୍ରାନ୍ସ ଭଳି ଦେଶରେ ଦେଖିବାକୁ ମିଳେ। ଗତ ୧୫ ଦିନ ମଧ୍ୟରେ ଦୁଇଟି ବିରଳ ଡଲଫିନ୍ ମୃତ୍ୟୁର କାରଣ ଜଣାପଡି ନାହିଁ। ଶବ ବ୍ୟବଚ୍ଛେଦ ପରେ ମୃତ୍ୟୁର କାରଣ ଜଣାପଡିବ ବୋଲି ଜଙ୍ଗଲ ଅଧିକାରୀ କହିଛନ୍ତି।
