ସମ୍ବଲପୁର,ଏନ୍ଏନ୍ଏସ୍: ଛୋଟ ବୟସରେ ବଡ଼ କାମ। ନବମ ଶ୍ରେଣୀରେ ପଢ଼ୁଥିବା ୧୪ ବର୍ଷର ନାବାଳକ ୧୩ଟି ଭାଷାରେ ତିଆରି କଲେ ଫେସବୁକ୍ର ବିକଳ୍ପ ଆପ୍ ‘ରାଉଟର’। ଉଦଘାଟନ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ନିମନ୍ତ୍ରଣ ପଠାଇ ଚର୍ଚ୍ଚାରେ ସମ୍ବଲପୁର ନାକଟିଦେଉଳ କୁଡାନାଳିର ଆୟୁଷ ରଞ୍ଜନ ରାଉତ।
ଗତ ବର୍ଷ ଲକ଼ଡାଉନ ସମୟରେ ଆୟୁଷ ନିର୍ମାଣ କରିଥିଲେ ଦେଶୀ ଫେସବୁକ୍ ଆପ ‘ରାଉଟର’ ଓ ଟିକଟକ୍ ଆପ ‘ରଙ୍ଗିଲା’। ରାଉଟରକୁ ୧୩ଟି ଭାଷାରେ ଡେଭଲପ କରିଛନ୍ତି ସେ। ଓଡିଆ, ବଙ୍ଗଳା, ଗୁଜରାଟି, ମରାଠୀ, ଇଂରାଜୀ, କନ୍ନଡ ପରି ୧୩ଟି ଭାଷାରେ ରାଉଟର ଆପକୁ ତିଆରି କରିଛନ୍ତି ଆୟୁଷ। ଫେସବୁକଠୁ ଆହୁରି ଭଲ ଭଲ ଫିଚର ଏଥିରେ ରହିଥିବା ଦାବି କରିଛନ୍ତି ଆୟୁଷ। ଏହାର ଲୋକାର୍ପଣ ପାଇଁ ସାଂସଦ ନୀତେଶ ଗଙ୍ଗଦେବଙ୍କୁ ଭେଟି ପ୍ରଧାନମନ୍ତ୍ରୀଙ୍କୁ ନିମନ୍ତ୍ରଣ ପଠାଇଛନ୍ତି ଆୟୁଷ।
ପୁଅର ସଫଳତାରେ ବାପା-ମାଆଙ୍କ ବହୁତ ଖୁସି ଅଛନ୍ତି। ଆୟୁଷ ନିଜ ଇନୋଭେସନ ପାଇଁ ଯାହା କିଛି ଦରକାର କରନ୍ତି ବାପା-ମାଆ ନିଜ ସାମର୍ଥ୍ୟ ହିସାବରେ ସବୁ ଯୋଗାଇବା ସହ ପୁଅକୁ ପୂର୍ଣ୍ଣ ସମର୍ଥନ କରନ୍ତି। ଭର୍ଚୁଆଲ ମାଧ୍ୟମରେ ପୁଅ ଡେଭଲପ୍ କରିଥିବା ଆପ୍ ଉଦଘା଼ଟନ ପାଇଁ ପ୍ରଧାନମନ୍ତ୍ରୀ ଅନୁମତି ଦେବେ ବୋଲି ପରିବାର ଲୋକେ ଆଶା ରଖିଛନ୍ତି। ଏପର୍ଯ୍ୟନ୍ତ ଆୟୁଷ ୧୫ଟି ୱେବସାଇଟ ନିର୍ମାଣ କରିସାରିଲେଣି। ଆଗକୁ ଆଇଏଏସ ଅଫିସର ହେବା ଲକ୍ଷ୍ୟ ରଖିଛନ୍ତି।
