ଜୟପୁର,ଏଜେନ୍ସି: ଦେଶରେ କରୋନା ଭୂତାଣୁର ୨ୟ ସ୍ୱରୂପ ଦେଖାଯାଇଥିବା ବେଳେ ଆଗକୁ ନୂଆ ବର୍ଷ ଆସୁଛି। ଲୋକମାନେ ନୂଆବର୍ଷ ପାଳନ କରିବାକୁ ଭିଡ ଜମାଇପାରନ୍ତି। ଏହାକୁ ଦୃଷ୍ଟିରେ ରଖି ଆସନ୍ତା ୩୧ ତାରିଖ ରାତି ୮ ଟାରୁ ୨୦୨୧ ଜାନୁଆରୀ ୧ ତାରିଖ ସକାଳ ୬ଟା ପର୍ଯ୍ୟନ୍ତ ରାଜସ୍ଥାନ ସରକାର ରାତ୍ରିକାଳୀନ କର୍ଫ୍ୟୁ ଲାଗୁ କରିବାକୁ ନିଷ୍ପତ୍ତି ନେଇଛନ୍ତି। ଯେଉଁ ସହରର ଲୋକ ସଂଖ୍ୟା ୧ ଲକ୍ଷରୁ ଅଧିକ ଥିବ ସେଠାରେ ଏହି ନିୟମ ପାଳନ କରାଯିବ। ଗୃହ ବିଭାଗ ପକ୍ଷରୁ ଏନେଇ ସୂଚନା ଦିଆଯାଇଛି। ରାଜ୍ୟରେ ନୂଆବର୍ଷ ପାଳନକୁ ବାରଣ କରାଯାଇଥିବା ବେଳେ ଆତିସବାଜିକୁ ମଧ୍ୟ ବାରଣ କରାଯାଇଛି।
ଡିସେମ୍ବର ୩୧ ତାରିଖ ରାତି ୭ଟାରୁ ସମସ୍ତ ବଜାର ବନ୍ଦ ରହିବ। ରାଜ୍ୟର ମୁଖ୍ୟ ସହର ଯଥା- କୋଟା, ଜୟପୁର, ଯୋଧପୁର, ବିକାନେର, ଉଦୟପୁର, ଆଜମେର, ଆଲୱର, ଭିଲୱାରା, ନାଗୋର, ପାଲି, ଟୋଙ୍କ, ଶିକାର ଏବଂ ଗଙ୍ଗାନଗରରେ ଡିସେମ୍ବର ୩୧ ତାରିଖ ରାତି ୮ଟାରୁ ଜାନୁଆରୀ ୧ ତାରିଖ ସକାଳ ୬ଟା ପର୍ଯ୍ୟନ୍ତ କର୍ଫ୍ୟୁ ବଳବତ୍ତର ରହିବ।
ରାଜସ୍ଥାନରେ କରୋନା ପଜିଟିଭ ସଂଖ୍ୟା ୩ ଲକ୍ଷ ୧ ହଜାର ୭୦୮କୁ ବୃଦ୍ଧି ପାଇଛି। ମୃତକଙ୍କ ସଂଖ୍ୟା ୨୬୪୨କୁ ବୃଦ୍ଧି ପାଇଛି। ଏପର୍ଯ୍ୟନ୍ତ ୨ ଲକ୍ଷ ୮୭ ହଜାର ୪୧୮ ଜଣ ସୁସ୍ଥ ହୋଇଥିବା ବେଳେ ୧୭୩୬ ଜଣ ଆକ୍ରାନ୍ତ ସକ୍ରିୟ ଅଛନ୍ତି ।
