ଢେଙ୍କାନାଳ,ଏନ୍ଏନ୍ଏସ୍ : ଢେଙ୍କାନାଳ ଟାଉନ ଥାନା ଅନ୍ତର୍ଗତ ମାଣ୍ଡପା ସାହିଠାରେ ଆଜି ରାତି ସାଢେ ୬ଟା ବେଳେ ଏକ ଜଘନ୍ୟ ହତ୍ୟାକାଣ୍ଡ ଘଟିଯାଇଛି। ରାଧାକୃଷ୍ଣ ବଜାରର ପୂର୍ଣ୍ଣଚନ୍ଦ୍ର ବେହେରା (ମିଛୁ) ୪୭ ବର୍ଷକୁ ତାଙ୍କର ବଜାରର ଦୁଇ ଜଣ ଯୁବକ ହତ୍ୟା କରିଥିବା ପୁଲିସ ସୂତ୍ରରୁ ଜଣାପଡିଛି।
ସୂଚନା ଅନୁଯାୟୀ, ପୂର୍ଣ୍ଣଚନ୍ଦ୍ର ମାଣ୍ଡପା ସାହିର ତେଲି ସାହି ଛକଠାରେ ଥିବା ବେଳେ ଉକ୍ତ ଦୁଇ ଯୁବକ ମାରଣାସ୍ତ୍ର ଯୋଗେ ତାଙ୍କୁ ଆକ୍ରମଣ କରିଥିଲେ। ମିଛୁଙ୍କ ଗୋଡ ଓ ଶରୀରରେ ଏକାଧିକ ସ୍ଥାନରେ ଆଘାତ ଲାଗିବା ସହ ଅତ୍ୟଧିକ ରକ୍ତସ୍ରାବ ଯୋଗୁ ଘଟଣାସ୍ଥଳରେ ପ୍ରାଣ ହରାଇଥିଲେ। ଖବର ପାଇ ଟାଉନ ଥାନା ଆଇଆଇସି ଜ୍ଞାନରଞ୍ଜନ ସାମଲ ଘଟଣାସ୍ଥଳରେ ପହଂଚି ଶବ ଜବତ କରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ। ରାଧାକୃଷ୍ଣ ବଜାରର ବାବାଜି ଷଣ୍ଢ ଓ କାଳିଆ ମାଟି ଏହି ହତ୍ୟାକାଣ୍ଡ ଘଟାଇଥିବା ଆଇଆଇସି ଶ୍ରୀ ସାମଲ ସୂଚନା ଦେଇଛନ୍ତି। ପୂର୍ବ ଶତ୍ରୁତାକୁ କେନ୍ଦ୍ର କରି ଏହି ହତ୍ୟାକାଣ୍ଡ ଘଟିଥିବା କୁହାଯାଉଛି। ମଦ୍ୟପାନ ପରେ ଉଭୟଙ୍କ ମଧ୍ୟରେ ବଚସା ହେବା ଏହି ହତ୍ୟାକାଣ୍ଡର କାରଣ ବୋଲି ପୁଲିସ କହିଛି। ଏହି ହତ୍ୟାକାଣ୍ଡ ପରେ ପଦ୍ମ ବଜାର ଓ ମାଣ୍ଡପା ସାହିର ସମସ୍ତ ଦୋକାନ ବଜାର ବନ୍ଦ ହୋଇଯାଇଥିଲା।
