ବଜ୍ରପାତରେ ଜଳିଗଲା କ୍ୟାମ୍ପ : ଶ୍ରମିକ ଦଗ୍ଧିଭୂତ

ବରଗଡ,ଏନ୍ଏନ୍ଏସ୍: ମେଲେଛାମୁଣ୍ଡା ଥାନା ବେହେରାପାଲି ପଞ୍ଚାୟତର ବୈଦେଶପାଲି ଗ୍ରାମରେ ବଜ୍ରପାତ ଘଟି ଏକ ଠିକାଦାର କ୍ୟାମ୍ପ ଜଳିଯିବା ସହ ଏଥିରେ ଜଣେ ଶ୍ରମିକ ଦଗ୍ଧିଭୂତ ହୋଇଯାଇଛନ୍ତି। ମୃତ ଶ୍ରମିକ ଜଣକ ଉସଦ ଭୋଇ (୩୫) ବୋଲି ସୂଚନା ମିଳିଛି। ସେହିପରି ଅନ୍ୟ ୬ ଜଣ ଶ୍ରମିକ ଆହତ ହୋଇଥିବା ବେଳେ ସେମାନଙ୍କୁ ସୋହେଲା ଡାକ୍ତରଖାନାରେ ଭର୍ତ୍ତି କରାଯାଇଛି।

ସୂଚନା ଅନୁସାରେ, ମେଲେଛାମୁଣ୍ଡା ଥାନା ବେହେରାପାଲି ପଞ୍ଚାୟତର ଏକ ନିର୍ମାଣଧୀନ ପୋଲରେ କାର୍ଯ୍ୟରତ ଶ୍ରମିକଙ୍କ ପାଇଁ ଏକ କ୍ୟାମ୍ପ କରାଯାଇଥିଲା। ବୁଧବାର ଅପରାହ୍ନରେ ବଜ୍ରପାତ ଘଟି କ୍ୟାମ୍ପଟି ଜଳିଯାଇଥିଲା । କ୍ୟାମ୍ପ ଭିତରୁ ଉସଦ ଭୋଇ ବାହାରି ନ ପାରିବାରୁ ସମ୍ପୂର୍ଣ୍ଣ ଜଳି ଯାଇଥିଲେ। ଅନ୍ୟ ଶ୍ରମିକମାନେ ସାମାନ୍ୟ ଆହତ ହୋଇଥିଲେ। ମେଲେଛାମୁଣ୍ଡା ପୁଲିସ ଘଟଣାସ୍ଥଳରେ ପହଞ୍ଚି ଆହତ ଶ୍ରମିକଙ୍କୁ ଡାକ୍ତରଖାନା ପଠାଇଥିଲେ।