ଦେବଗଡ଼,ଏନ୍ଏନ୍ଏସ୍: ଦେବଗଡ଼ ଥାନା ତିଳେଇବଣି ଫାଣ୍ଡି ଅଞ୍ଚଳରେ ୪୯ ନମ୍ବର ଜାତୀୟ ରାଜପଥରେ ରାତି ସମୟରେ ବିଶ୍ରାମ କରୁଥିବା ମାଲ ବୋଝେଇ ଟ୍ରକରୁ ଡିଜେଲ ଚୋରି ରାକେଟର ୩ ଜଣଙ୍କୁ ପୁଲିସ ଗିରଫ କରିଛି । ଅଭିଯୁକ୍ତମାନେ ହେଲେ ଜମନକିରା ଥାନାଞ୍ଚଳର ଟିକଲିପଡ଼ା ଗ୍ରାମର ଅନ୍ତର୍ଯ୍ୟାମୀ ସେଠୀ, ଜମନକିରାର ଦୀପକ ଖଡ଼ିଆ ଓ ସେମାନଙ୍କଠାରୁ ଚୋରା ଡିଜେଲ କିଣୁଥିବା ଗୁଣ୍ଡେଇମରାର ହିଜବୁଲ ଶେଖ । ଅନ୍ତର୍ଯ୍ୟାମୀ ଓ ଦୀପକଠାରୁ ଏକ ପଲସର ବାଇକ ଓ ତେଲ ଟାଙ୍କି ଭାଙ୍ଗିବାରେ ବ୍ୟବହୃତ ସାମଗ୍ରୀ ଜବତ ହୋଇଛି । ଏହାସହ ଚୋରା ଡିଜେଲ କିଣୁଥିବା ହବିଜୁଲ ଶେଖ ନିକଟରୁ ୫୦ ଲିଟରରୁ ଊର୍ଦ୍ଧ୍ୱ ଚୋରା ଡିଜେଲ ଜବତ ହୋଇଥିବା ଜଣାପଡ଼ିଛି ।
ମିଳିଥିବା ରିପୋର୍ଟ ମୁତାବକ, ତିଳେଇବଣି ଫାଣ୍ଡି ଅଞ୍ଚଳ ଦେଇ ଯାଇଥିବା ୪୯ ନମ୍ବର ଜାତୀୟ ରାଜପଥରେ ରାତି ସମୟରେ ବିଶ୍ରାମ କରୁଥିବା ମାଲ ବୋଝେଇ ଟ୍ରକମାନଙ୍କରୁ ଡିଜେଲ ଚୋରି ଅଭିଯୋଗ ଆସୁଥିବାବେଳେ ଚୋରଙ୍କ ସମ୍ପର୍କରେ କୌଣସି ସୁରାକ ମିଳୁନଥିଲା । ତେବେ ଗତକାଲି ବିଳମ୍ବିତ ରାତିରେ ଫାଣ୍ଡି ପୁଲିସ ପେଟ୍ରୋଲିଙ୍ଗ କରୁଥିବାବେଳେ କୈଳାସ ଛକ ନିକଟରେ ୨ଜଣ ଦୁର୍ବୁତ୍ତ ଏକ ପଲସର ବାଇକରେ ସନ୍ଦେହଜନକ ଅବସ୍ଥାରେ ବୁଲୁଥିବାବେଳେ ପୁଲିସ ସେମାନଙ୍କୁ ଅଟକାଇବାକୁ ଚେଷ୍ଟା କରିଥିଲା । ମାତ୍ର ପୁଲିସକୁ ଦେଖି ଦୁର୍ବୁତ୍ତମାନେ ବାଇକକୁ ଛାଡ଼ି ଦୌଡ଼ି ପଳାଇବାକୁ ଉଦ୍ୟମ କରୁଥିବାବେଳେ ପୁଲିସ ସେମାନଙ୍କୁ କାବୁ କରି ଥାନାକୁ ଆଣି ପଚରାଉଚୁରା କରିଥିଲା । ପଚରାଉଚୁରା ବେଳେ ଅଭିଯୁକ୍ତ ଅନ୍ତର୍ଯ୍ୟାମୀ ଓ ଦୀପକ ଚୋରିରେ ଲିପ୍ତ ଥିବା ସ୍ୱୀକାର କରିବା ସହ ସେମାନେ ଗୁଣ୍ଡେଇମରାର ହିଜବୁଲକୁ ବିକୁଥିବା ପୁଲିସ ନିକଟରେ କହିଥିଲେ । ପରେ ପୁଲିସ ୩ଜଣଙ୍କୁ ଗିରଫ କରିବା ସହ କୋର୍ଟ ଚାଲାଣ କରିଛି ।
