ଖୋର୍ଦ୍ଧା,ଏନ୍ଏନ୍ଏସ୍: ୧୬ ନଂ ଜାତୀୟ ରାଜପଥ ଜିଲ୍ଲାପାଳ ଅଫିସ ନିକଟରେ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି। ଏଥିରେ ଭଉଣୀ ମୃତ ହୋଇଥିବା ବେଳେ ଭାଇ ଆହତ ହୋଇଥିବା ଜଣାପଡ଼ିଛି। ସୂଚନା ଅନୁଯାୟୀ ଭାଇ ଓ ଭଉଣୀ ଦୁହେଁ ହୋଣ୍ଡା ଆକ୍ଟିଭା ଯୋଗେ ଭୁବନେଶ୍ୱରରୁ ନିଜ ଘର ବ୍ରଜମୋହନପୁର ଫେରୁଥିବା ବେଳେ ପଛପଟୁ ଆସୁଥିବା ଏକ ୪୦୭ ଟ୍ରକ୍ ତାଙ୍କ ଉପରେ ଚଢିଯାଇଥିଲା।
ପରେ ସ୍ଥାନୀୟ ଲୋକେ ଓ ପୁଲିସ କର୍ମଚାରୀ ସେଠାରୁ ସେମାନଙ୍କୁ ଉଦ୍ଧାର କରି ଖୋର୍ଦ୍ଧା ମେଡିକାଲରେ ଭର୍ତ୍ତି କରିଥିଲେ। ଡାକ୍ତର ସେଠାରେ ଭଉଣୀ ବୈଜୟନ୍ତୀ ବରାଳଙ୍କୁ ମୃତ ଘୋଷଣା କରିଛନ୍ତି। ସେହିପରି ଭାଇ ଗୁରୁତର ଭାବେ ହସ୍ପିଟାଲରେ ଚିକିତ୍ସିତ ହେଉଥିବା ଜଣାପଡ଼ିଛି। ପୁଲିସ ଦୁଇଟି ଗାଡିକୁ ଜବତ କରି ତଦନ୍ତ ଆରମ୍ଭ କରିଛି।
