ଅଧୁରା ରହିଗଲା ଝୁଲା ପୋଲ, କଚ୍ଛପ ଗତିରେ ଚାଲିଛି ନୂତନ ପୋଲର ନିର୍ମାଣ କାର୍ଯ୍ୟ ଜିଲ୍ଲା By Nitidin Last updated Oct 8, 2020 Share ବାରିପଦା, ଏନ୍ଏନ୍ଏସ୍: ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ବ୍ଲକ ଅଧୀନ ବ୍ରାହ୍ମଣଗାଁ ପଞ୍ଚାୟତର ଦୋମୁହାଁଣିଠାରେ ଝୁଲା ପୋଲ ନିର୍ମାଣର ସ୍ୱପ୍ନ ଅଧୁରା ରହିଗଲା। ବ୍ରାହ୍ମଣଗାଁ, ସୋରିଷପାଳ ଓ ଚାକିଡ଼ି ଆଦି ପଞ୍ଚୟତରେ ବସବାସ କରୁଥିବା ପ୍ରାୟ ୧୦ ହଜାରରୁ ଅଧିକ ଜନସାଧାରଣଙ୍କ ଗମନାଗମନର ସୁବିଧା ନିମନ୍ତେ ୨୦୧୫ରେ ତତ୍କାଳୀନ ଜିଲ୍ଲାପାଳ ରାଜେଶ ପ୍ରଭାକର ପାଟିଲ ଏକ ଝୁଲା ପୋଲ ନିର୍ମାଣର ସ୍ୱପ୍ନ ଦେଖିଥିଲେ। ଏହାକୁ ସାକାର କରାଇବା ପାଇଁ ବାରିପଦା ପିଏ ଆଇଟିଡ଼ିଏ ମାଧ୍ୟମରେ ପ୍ରଥମ କିସ୍ତିରେ ଏକ କୋଟି ୫୦ ଲକ୍ଷ ଓ ପରବର୍ତ୍ତୀ କିସ୍ତିରେ ୮୦ ଲକ୍ଷ ଟଙ୍କା ମଞ୍ଜୁରୀ ପ୍ରଦାନ କରାଇଥିଲେ। ପୋଲଟି ନିର୍ମାଣ ହେଲା ସତ, କିନ୍ତୁ ପୋଲର ଦୁଇ ମୁଣ୍ଡର ପିଲର ସହିତ ରାସ୍ତାକୁ ସଂଯୋଗ କରାଯାଇ ପାରିଲା ନାହିଁ। ଫଳରେ ବର୍ଷା ଦିନେ ନଦୀରେ ବନ୍ୟା ଆସି ପୋଲର ଗୋଟାଏ ପାଶ୍ୱର୍କୁ ଧୋଇ ନେଇଗଲା। ଫଳରେ ଝୁଲା ପୋଲଟି ନଦୀ କୁଳକୁ ସ୍ପର୍ଶ କରି ନ ପାରି ନଦୀରେ ଝୁଲି ରହିଲା। ପୁଣି ପରବର୍ତ୍ତୀ ସମୟରେ ପୋଲର ଦୁଇ ପାଶ୍ୱର୍ରେ ଥିବା ଦୁଇଟି ପିଲର ସହିତ ପ୍ରାୟ ୨ ଶହ ମିଟରର ବାକି ରହିଯାଇଥିବା ରାସ୍ତାକୁ ସଂଯୋଗ କରାଇବା ପାଇଁ ଜଳସମ୍ପଦ ବିଭାଗ ପକ୍ଷରୁ ନାବାର୍ଡ଼ ସହାୟତାରେ ୧୪ ଲକ୍ଷ ୫୫ ହଜାର ଟଙ୍କା ୩୦୦ ଟଙ୍କା ମଞ୍ଜୁରୀ ପ୍ରଦାନ କରିଥିଲେ ଏବଂ ମଝି ନଦୀରେ ଝୁଲି ଥିବା ପୋଲକୁ ସଂଯୋଗ କରାଇବା ନିମନ୍ତେ ଅସ୍ଥାୟୀ ରାସ୍ତା ନିର୍ମାଣ କାର୍ଯ୍ୟ ଆରମ୍ଭ ହେଲା। ହେଲେ ପୁଣି ଥରେ ବନ୍ୟାରେ ଧୋଇ ହୋଇଗଲା। ଫଳରେ ପାଣିରେ ପଡ଼ିଗଲା ମୋଟ ୨କୋଟି ୪୪ ଲକ୍ଷ ୫୫ ହଜାର ୩୦୦ ଟଙ୍କା। ଏହାପରେ ୨୦୧୯ ମାର୍ଚ୍ଚରେ ଓଡ଼ିଶା ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁଦାମ ମାର୍ଣ୍ଡି ୮ କୋଟି ୪୦ ଲକ୍ଷ ଟଙ୍କା ବ୍ୟୟ ଅଟକଳରେ ପୁଣି ଅନ୍ୟ ଏକ ନୂତନ ପୋଲର ନିର୍ମାଣ ପାଇଁ ଶିଳାନ୍ୟାସ କରିଥିଲେ। କିନ୍ତୁ ପୋଲ ଭିତ୍ତିପ୍ରସ୍ତର ସ୍ଥାପନକୁ ଏକ ବର୍ଷ ୭ ମାସରୁ ଅଧିକ ସମୟ ହୋଇ ସାରିଥିଲେ ମଧ୍ୟ କେବଳ ୬ଟି ସ୍ପାନ ବିଶିଷ୍ଟ ନୂତନ ପୋଲର ନିର୍ମାଣ କାର୍ଯ୍ୟ ମଧ୍ୟରୁ ମାତ୍ର ଗୋଟାଏ ସ୍ପାନ ଅଧା ନିର୍ମିତ ଅବସ୍ଥାରେ ରହିଛି। Share