ଆହାର କେନ୍ଦ୍ର ଖାଦ୍ୟରୁ ବାହାରିଲା ମୃତ ଝିଟିପିଟି : ନିର୍ବାହୀ ଅଧିକାରୀଙ୍କ ଘଟଣା ଚପାଇବାକୁ ଉଦ୍ୟମ
ଦେବଗଡ଼,ଏନ୍ଏନ୍ଏସ୍: ଦେବଗଡ଼ ପୌରାଞ୍ଚଳ ଅଧୀନରେ ରହିଥିବା ଆହାର କେନ୍ଦ୍ରର ପରିଚାଳନାଗତ ତୃଟି ଜନସାଧାରଣଙ୍କ ପାଇଁ ବିପଦ ସାଜିଛି। ଦାୟିତ୍ୱରେ ଥିବା କର୍ମଚାରୀଙ୍କ ଅବହେଳା ଯୋଗୁ ଆହାର କେନ୍ଦ୍ରର ଆହାରରେ ମାଛି ଏବଂ ଝିଟିପିଟି ଆଦି ବାହାରୁଥିବା ଜଣାପଡ଼ିଛି। ଫଳରେ ଏହି କେନ୍ଦ୍ରକୁ ଆହାର ପାଇଁ ଆସୁଥିବା ଗରିବ ଜନସାଧାରଣଙ୍କ ଜୀବନ ପ୍ରତି ବିପଦ ଦେଖାଦେଇଛି। ମିଳିଥିବା ରିପୋର୍ଟ ମୁତାବିକ, ଆଜି ମଧ୍ୟାହ୍ନରେ କଚେରୀ ରୋଡସ୍ଥିତ ଆହାର କେନ୍ଦ୍ରରେ ଅନ୍ୟଦିନମାନଙ୍କ ଭଳି ଖାଦ୍ୟ ପ୍ରସ୍ତୁତ କରାଯାଇଥିଲା। କେତେକ ଶ୍ରମିକ ଆଜି ମଧ୍ୟାହ୍ନ ଭୋଜନ ପାଇଁ ଆହାର କେନ୍ଦ୍ରରେ ଖାଦ୍ୟ ଗ୍ରହଣ କରୁଥିବା ସମୟରେ ଉକ୍ତ ଆହାର କେନ୍ଦ୍ରରୁ ଅନ୍ୟ କେନ୍ଦ୍ରକୁ ଖାଦ୍ୟ ପରିବହନରେ ନିୟୋଜିତ ଆରସିଏମଏସ ସାହି ଅଞ୍ଚଳର ଜଣେ ମହିଳାଙ୍କ ଆହାର ଥାଳିରୁ ମଲା ଝିଟିପିଟି ବାହାରିଥିଲା। ଏହା ଦେଖି ସଂପୃକ୍ତ ମହିଳା ଜଣକ ଖାଦ୍ୟ ଖାଇବା ବନ୍ଦ କରି ବାନ୍ତି କରିଥିଲେ। ପରେ ସେଠାରେ ଖାଉଥିବା ଅନ୍ୟ କେତେକ ଶ୍ରମିକ ମଧ୍ୟ ବାନ୍ତି କରି ପକାଇଥିଲେ। ଘଟଣା ଜଣାପଡ଼ିବା ପରେ ଆହାର କେନ୍ଦ୍ରର କର୍ମଚାରୀମାନେ ଉକ୍ତ ମହିଳା ଶ୍ରମିକଙ୍କୁ ସେଠାରୁ ବିଦା କରି ଦେଇ ମୃତ ଝିଟିପିଟିକୁ ଥାଳିରୁ କାଢ଼ି ଦେଇଥିଲେ। ଏନେଇ ଶ୍ରମିକଙ୍କଠାରୁ ସୂଚନା ପାଇ ଆଖପାଖ ଅଞ୍ଚଳର ଜନସାଧାରଣ ସେଠାରେ ପହଂଚି ଘଟଣା ସମ୍ପର୍କରେ ଜାଣିବା ପାଇଁ ଚେଷ୍ଟା କରିଥିଲେ। ଖବର ପାଇ ବିଭିନ୍ନ ଗଣମାଧ୍ୟମ ପ୍ରତିନିଧିମାନେ ସେଠାରେ ପହଂଚି ଘଟଣା ସମ୍ପର୍କରେ ପଚାରିବାରୁ ଦାୟିତ୍ୱରେ ଥିବା କର୍ମଚାରୀମାନେ ଖାଦ୍ୟରୁ ମୃତ ଝିଟିପିଟି ବାହାରିଥିବା କଥା ସ୍ୱୀକାର କରିବା ସହ ତୁରନ୍ତ ଆହାର କେନ୍ଦ୍ରକୁ ବନ୍ଦ କରି ରନ୍ଧା ଖାଦ୍ୟ ସବୁକୁ ଅନ୍ୟତ୍ର ଉଠାଇ ନେଇଥିଲେ।
