ମୁନିଗୁଡ଼ା,ଏନ୍ଏନ୍ଏସ୍: ରାୟଗଡ଼ା ଜିଲ୍ଲା ମୁନିଗୁଡ଼ା କ୍ଲଷ୍ଟର୍ ହାଉସ୍ ପରିସରରେ ଓଡ଼ିଶା ଜୀବିକା ମିଶନ, ମୁନିଗୁଡ଼ା ବ୍ଲକ ଦ୍ୱାରା ଆୟୋଜିତ ଓ ଓଡ଼ିଶା ଦକ୍ଷତା ବିକାଶ ପ୍ରାଧିକରଣ ତଥା ଜିଲ୍ଲା ପ୍ରଶାସନ ପ୍ରାୟୋଜିତ ବ୍ଲକସ୍ତରୀୟ ନିଯୁକ୍ତି ପରାମର୍ଶ ଶିବିର ଅନୁଷ୍ଠିତ ହୋଇଯାଇଛି । ଓଡ଼ିଶା ଜୀବିକା ମିଶନ ବ୍ଲକ ସଂଯୋଜକ କ୍ଷିରୋଦ କୁମାର ଭୂୟାଁଙ୍କ ସଭାପତିତ୍ୱ ଓ ଗ୍ରାମ ରୋଜଗାର ସେବକ ଅଜିତ ନାଗଙ୍କ ସଂଯୋଜନାରେ ମୁଖ୍ୟଅତିଥି ଭାବେ ବିଡିଓ ପ୍ରିତମ କୁମାର ତନ୍ତୀ, ମୁଖ୍ୟବକ୍ତା ଜିଲ୍ଲା ଦକ୍ଷତା ଭିତ୍ତିକ କର୍ମ ନିୟୋଜନ ଅଧିକାରୀ ତତ୍ୱମେଶି ମହାପାତ୍ର, ସମ୍ମାନିତ ଅତିଥିଭାବେ ଘମଟଗୁଡ଼ା ସରପଞ୍ଚ ଅନନ୍ତ ନୁଣ୍ଡ୍ରୁକା ଓ ୟଙ୍ଗ ପ୍ରଫେସନାଲ ଅଧିକାରୀ ଶିବମ ମିଶ୍ର ପ୍ରମୁଖ ଉପସ୍ଥିତ ରହି ଆନୁଷ୍ଠାନିକ ଭାବେ କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ । ଏହି କାର୍ଯ୍ୟକ୍ରମରେ ସିଟିଟିସି ୟୁଜିଏମ ଆଇଟି, ଗ୍ରାମତରଙ୍ଗ, ସିପେଟ, ସରକାରୀ ଆଇଟିଆଇ ରାୟଗଡ଼ା ଓ ବିଷମକଟକ ଭଳି ଅନେକ ତାଲିମ୍ ଦାତା ସଂସ୍ଥା ଯୋଗଦେଇ ଉପସ୍ଥିତ ୧୮ରୁ ୩୫ବର୍ଷ ଯୁବକ ଯୁବତୀଙ୍କୁ ନିଜ ନିଜ ସଂସ୍ଥାରେ ଦକ୍ଷତା ଭିତ୍ତିକ ତାଲିମ ଦେଇ ରୋଜଗାରକ୍ଷମ କରାଇବାକୁ ପରାମର୍ଶ ଦେଇଥିଲେ । ସେମାନଙ୍କୁ ମାଗଣାରେ ତାଲିମ, ରହିବା ଓ ଖାଇବା ସହିତ ଷ୍ଟାଇପେଣ୍ଡ ଦେବାର ବ୍ୟବସ୍ଥା ଥିବା କହିବା ସହ ନିଯୁକ୍ତି ଓ ଆତ୍ମନିଯୁକ୍ତି ବିଷୟରେ ଲୋଭନୀୟ ପ୍ରସ୍ତାବ ରଖିଥିଲେ । ଦକ୍ଷତା ଭିତ୍ତିକ ନିଯୁକ୍ତି ଆଶାୟୀ ଯୁବକ ଯୁବତୀମାନେ ସଂସ୍ଥାଙ୍କ ପାଖକୁ ଯାଇ ସେମାନଙ୍କ ନାମ ରେଜିଷ୍ଟ୍ରି କରିବା ସହିତ ସେସବୁ ସଂସ୍ଥାରୁ ପାଇବାକୁ ଥିବା ସୁବିଧାକୁ ପଚାରି ବୁଝିଥିବା ଦେଖିବାକୁ ମିଳିଥିଲା । ଏହି ଅବସରରେ ମୁନିଗୁଡ଼ା ବ୍ଲକ୍ର ୧୭ଟି ପଞ୍ଚାୟତର ବେକାର ଯୁବକ ଯୁବତୀମାନେ ଏହି ଶିବିରରେ ପହଞ୍ଚି ଦକ୍ଷତା ଭିତ୍ତିକ ସଂସ୍ଥାଠାରୁ ବିଭିନ୍ନ ତାଲିମ ବିଷୟରେ ପଚାରି ବୁଝିଥିଲେ । ପରେ ଜିଲ୍ଲା କର୍ମ ନିୟୋଜନ ଅଧିକାରୀ ଶ୍ରୀ ମହାପାତ୍ର ଶିବିରାର୍ôଥଙ୍କୁ ଦକ୍ଷତା ଭିତ୍ତିକ ନିଯୁକ୍ତି, ଆତ୍ମ ନିଯୁକ୍ତି ଓ ଆତ୍ମନିର୍ଭରଶୀଳ ଉପରେ ବିସ୍ତୃତ ଆଲୋଚନା କରିଥିଲେ । ଯୁବକ ଓ ଯୁବତୀମାନେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ବିଭିନ୍ନ ଅନୁଷ୍ଠାନରେ ତାଲିମ ଗ୍ରହଣ କରି ନିଯୁକ୍ତି ହାସଲ କରିବାକୁ ବିଡିଓ ଶ୍ରୀ ତନ୍ତୀ ଆହ୍ୱାନ ଦେବାସହ ମୁନିଗୁଡ଼ାରେ ଏକ ଦକ୍ଷତା ତାଲିମ କେନ୍ଦ୍ର ଖୋଲିବାକୁ ଜିଲ୍ଲା ଅଧିକାରୀଙ୍କୁ ଅନୁରୋଧ କରିଥିଲେ । ୧୫୫ଜଣ ବେକାର ଯୁବକ ଯୁବତୀ ଦକ୍ଷତା ତାଲିମ ପାଇଁ ପଞ୍ଜିକରଣ କରିଥିଲେ । ଏହି କାର୍ଯ୍ୟକ୍ରମକୁ ବ୍ଲକର ସମସ୍ତ ଓଏଲ୍ଏମ କର୍ମଚାରୀ, ଏମ୍ବୀକେ, ସିଆରସି ଓ ଜିଆରଏସମାନେ ସହଯୋଗ କରିଥିଲେ । ଶେଷରେ ବିପିଏମ ଶ୍ରୀ ଭୂୟାଁ ସଭିଙ୍କୁ ଧନ୍ୟବାଦ ଜଣାଇଥିଲେ ।
