ତମାଖୁ ମୁକ୍ତ ଓଡ଼ିଶା ସଚେତନାର ବାର୍ତ୍ତା ନେଇ ଓଡ଼ିଶା ଭ୍ରମଣରେ ୪୦ ସାଇକେଲ ଆରୋହୀ

ରାୟଗଡ଼ା,ଏନ୍ଏନ୍ଏସ୍: ତମାଖୁ ମୁକ୍ତ ଓଡ଼ିଶା ସଚେତନାର ବାର୍ତ୍ତା ବହନ କରି ଓଡ଼ିଶା ଭ୍ରମଣରେ ବାହାରିଛନ୍ତି ୪୦ଜଣ ସାଇକେଲ ଆରୋହୀ। ରାୟଗଡ଼ା ଠାରେ ସାଇକେଲ ଆରୋହୀ ପହଞ୍ଚିବା ପରେ ଉପ-ଜିଲ୍ଲାପାଳ ପ୍ରତାପ ଚନ୍ଦ୍ର ପ୍ରଧାନ ଏବଂ ପିଏ, ଆଇଟିଡିଏ ଟୁକୁ ବାରିକ ବିପୁଳ ସେମାନଙ୍କୁ ସ୍ୱାଗତ କରିଥିଲେ। ପରେ ୪୦ଜଣ ସାଇକେଲ ଆରୋହୀ କୋରାପୁଟ ଅଭିମୁଖେ ବାହାରିଥିଲେ। ପଞ୍ଚମ କୋଣାର୍କ ଅର୍ନ୍ତଜାତୀୟ ସାଇକ୍ଲୋଥେନ୍ ଯାତ୍ରା ଓଡ଼ିଶାର ଐକ, ଭାତୃତ୍ୱ, ସହନଶୀଳତା, ସ୍ୱଚ୍ଛତା ଓ କ୍ରୀଡ଼ାର ବିକାଶ ପାଇଁ ସହାୟକ ହେବ ବୋଲି କ୍ରୀଡା ଓ ଯୁବ ବ୍ୟାପାର ମନ୍ତ୍ରୀ ତୁଷାରକାନ୍ତ ବେହେରା କହିଛନ୍ତି।

ଭୁବନେଶ୍ୱର ଠାରୁ ୪୦ଜଣ ସାଇକଲ ଆରୋହୀଙ୍କୁ ନେଇ ୧୩ ଦିନରେ ୧୩୦୦ କିଲୋମିଟର ଯାତ୍ରା କରିବ ଏହି ସାଇକେଲ ଟିମ୍। ସବୁଜ ଭାରତ, ୟୁକୋ-ପର୍ଯ୍ୟଟନର ବିକାଶ, ସମସ୍ତଙ୍କ ପାଇଁ ଶିକ୍ଷା, ତମାଖୁମୁକ୍ତ ଓଡ଼ିଶା ପାଇଁ ଏହି ଯାତ୍ରା ଅନୁଷ୍ଠିତ ହେଉଥିବା ମନ୍ତ୍ରୀ ଶ୍ରୀ ବେହେରା ପ୍ରକାଶ କରିଥିଲେ। ରନର୍ସ ଅପ୍ ଓଡ଼ିଶା ଫାଉଣ୍ଡେସନ ଦ୍ୱାରା ଆୟୋଜିତ କାର୍ଯ୍ୟକ୍ରମରେ ଅର୍ଜୁନ ପୁରସ୍କାର ବିଜୟନୀ ମିନତୀ ସାହୁ, ସବୁଜ ସଂଗ୍ରାମୀ ଦିଲ୍ଲୀପ ଶ୍ରୀଚନ୍ଦନ, ଅଭିନେତ୍ରୀ ପ୍ରତିଭା ସାହୁ, ବିପିନ ମହାନ୍ତି ପ୍ରମୁଖ ଉପସ୍ଥିତ ଥିଲେ। ଏହିଯାତ୍ରା ଭୁବନେଶ୍ୱର ଠାରୁ ବାହାରି କୋଣାର୍କ, ପୁରୀ, ସାତପଡ଼ା, ବ୍ରହ୍ମପୁର, ରାୟଗଡ଼ା, କୋରାପୁଟ, ଫୁଲବାଣୀ, ନୟାଗଡ଼ ଦେଇ ଆସନ୍ତା ୨୦ ତାରିଖରେ ଭୁବନେଶ୍ୱରରେ ଯାତ୍ରା ଶେଷ ହେବ ବୋଲି ଜଣାଯାଇଛି।