ସିଆରପିଏଫ ତରଫରୁ କୌଶଳ ବିକାଶ କାର୍ଯ୍ୟକ୍ରମ

ରାୟଗଡ଼,ଏନ୍ଏନ୍ଏସ୍: ରାୟଗଡ଼ା ସିଆରପିଏଫ ୪ର୍ଥ ବାଟାଲିୟନ ତରଫରୁ ରାୟଗଡ଼ା-ଆନ୍ଧ୍ରପ୍ରଦେଶ ସୀମାନ୍ତବର୍ତ୍ତୀ ଗ୍ରାମଗୁଡ଼ିକରେ ଏକ ଜନସମ୍ପର୍କ ଶିବିର ସହ କୌଶଳ ବିକାଶ କାର୍ଯ୍ୟକ୍ରମ କରାଯାଇଛି। କୌଶଳ ବିକାଶ କାର୍ଯ୍ୟକ୍ରମରେ ଗ୍ରାମର ମହିଳା ଓ ଯୁବତୀମାନଙ୍କୁ ଏକ ମାସ ଧରି ସିଲେଇ ପ୍ରଶିକ୍ଷଣ ଦିଆଯିବ। ସିଆରପିଏଫ ୪ର୍ଥ ବାଟାଲିୟନ କମାଣ୍ଡାଣ୍ଟ ମନୋଜ କୁମାର ଯାଦବ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ।

ହାଟଶେଷଖାଲ, ଜାଙ୍ଗିର୍ତି, ଅତଡ଼ା, କାଞ୍ଚକାବାଲସା, ଜେମାଦେଇପେଣ୍ଠ ଏବଂ କୁଶା ଅଞ୍ଚଳର ୩୦ ଜଣ ମହିଳା ଓ ଯୁବତୀମାନଙ୍କୁ ପ୍ରଶିକ୍ଷଣ ଦିଆଯାଉଛି। ଆୟୋଜିତ କାର୍ଯ୍ୟକ୍ରମରେ ଶେଷଖାଲ କମାଣ୍ଡାଣ୍ଟ ଦେବରଥ ସିଂ, ଶେଷଖାଲ ଥାନା ଅଧିକାରୀ ବିଜୟଲକ୍ଷ୍ମୀ ହିକକା, ଶେଷଖାଲ ସରପଞ୍ଚ ବସନ୍ତ କୁମାର ବିଡିକା ପ୍ରମୁଖ ଉପସ୍ଥିତ ଥିଲେ। ଗ୍ରାମାଞ୍ଚଳ ମହିଳା ଓ ଯୁବତୀମାନଙ୍କୁ ସ୍ୱାବଲମ୍ବୀ କରିବା ପାଇଁ ସିଆରପିଏଫ ତରଫରୁ ଏକ ଛୋଟ ପ୍ରୟାସ କରାଯାଇଛି। ଏହି ପ୍ରଥା ଆଗକୁ ମଧ୍ୟ ଜାରି ରହିବ ବୋଲି ସିଆରପିଏଫ କମାଣ୍ଡାଣ୍ଟ ଶ୍ରୀ ଯାଦବ ପ୍ରକାଶ କରିଥିଲେ। ସିଆରପିଏଫ ଲୋକ ସମ୍ପର୍କ ଅଧିକାରୀ ସରୋଜ କାନ୍ତ ମହାନ୍ତି କାର୍ଯ୍ୟକ୍ରମକୁ ପରିଚାଳନା କରିଥିଲେ।