ନୂଆଦିଲ୍ଲୀ,ଏଜେନ୍ସି: ‘ମନ କି ବାତ’ କାର୍ଯ୍ୟକ୍ରମ ମାଧ୍ୟମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶବାସୀଙ୍କୁ ସମ୍ବୋଧିତ କରିଛନ୍ତି। ଏହା ମାସିକ ରେଡିଓ କାର୍ଯ୍ୟକ୍ରମର ଅଣସ୍ତରିତମ ଅଧ୍ୟାୟ। ଉଭୟ ଆକାଶବାଣୀ ଓ ଦୂରଦର୍ଶନର ସମସ୍ତ ନେଟୱାର୍କରେ ଏହା ପ୍ରସାରିତ ହୋଇଛି। ମନ କି ବାତ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ କହିଛନ୍ତି, କରୋନା ମହାମାରୀ ସମୟରେ ସମଗ୍ର ବିଶ୍ୱ ପରିବର୍ତ୍ତନର ଏକାଧିକ ଚକ୍ର ଦେଇ ଗତି କରୁଛି। ଏଥିସହ ସମସ୍ତଙ୍କ ପାଇଁ ସାମାଜିକ ଦୂରତା ଏକ ବାଧ୍ୟତାମୂଳକ ଆବଶ୍ୟକତା ହୋଇଗଲାଣି ବୋଲି କହିଛନ୍ତି।
ପ୍ରଧାନମନ୍ତ୍ରୀ କହିଛନ୍ତି ଯେ କାହାଣୀ ଆମର ଭାବନାକୁ ଆଲୋକିତ କରିଥାଏ। ଜଣେ ମା’ ନିଜ ଛୋଟ ଛୁଆକୁ ଶୋଇବା କିମ୍ବା ଖାଇବାକୁ ଦେବା ପାଇଁ ଏକ କାହାଣୀ ବର୍ଣ୍ଣନା କରୁଥିବା ବେଳେ କାହାଣୀର ଶକ୍ତି ହୃଦୟଙ୍ଗମ କରିହୁଏ ଏବଂ କାହାଣୀ ସମସ୍ତଙ୍କୁ ଭାବିବାକୁ ବାଧ୍ୟ କରେ। ବିଶେଷକରି ପିଲାମାନଙ୍କ ପାଇଁ କାହାଣୀଗୁଡିକ ସେମାନଙ୍କର ସୃଜନଶୀଳତାକୁ ବୃଦ୍ଧି କରିଥାଏ ଏବଂ ସେମାନଙ୍କର ପରିଚୟ, ବ୍ୟକ୍ତିତ୍ୱକୁ ବ୍ୟାଖ୍ୟା କରିଥାଏ। ଭାରତରେ କାହାଣୀ କହିବାର ଏକ ସମୃଦ୍ଧ ପରମ୍ପରା ରହିଆସିଛି ବୋଲି ପ୍ରଧାନମନ୍ତ୍ରୀ କହିଛନ୍ତି। ଆମେ ଯେତେବେଳେ ସ୍ୱାଧୀନତାର ୭୫ ବର୍ଷ ପାଳନ କରିବାକୁ ଯାଉଛୁ, ଆମେ ଆମର କାହାଣୀରେ ସ୍ୱାଧୀନତା ପୂର୍ବର ସମ୍ପୂର୍ଣ୍ଣ ଦାସତ୍ୱ ସମୟର ପ୍ରେରଣାଦାୟକ ଘଟଣା କହି କରିପାରିବା କି? ବିଶେଷକରି ୧୮୫୭ରୁ ୧୯୪୭ ପର୍ଯ୍ୟନ୍ତ, ପ୍ରତ୍ୟେକ ଛୋଟ ଘଟଣା ବର୍ତ୍ତମାନ କାହାଣୀ ମାଧ୍ୟମରେ ଆମର ନୂତନ ପିଢ଼ି ସହିତ ପରିଚିତ ହୋଇପାରିବ। ମୁଁ ନିଶ୍ଚିତ ଯେ ଆପଣମାନେ ନିଶ୍ଚିତ ଭାବରେ ଏହି କାର୍ଯ୍ୟ କରିବେ। ତେଣୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅନୁରୋଧ କରିଛନ୍ତି ଯେ, ପ୍ରତି ପରିବାରରେ ସପ୍ତାହରେ କାହାଣୀ ପାଇଁ କିଛି ସମୟ ଦିଆଯାଉ ଏବଂ ପ୍ରତ୍ୟେକ ପରିବାର ସଦସ୍ୟଙ୍କୁ ପ୍ରତ୍ୟେକ ସପ୍ତାହ ପାଇଁ ଏକ ପ୍ରସଙ୍ଗ ସ୍ଥିର କରିପାରିବେ, କେଉଁ ଦିନ ପରିବାରର ସମସ୍ତ ସଦସ୍ୟ ଗୋଟିଏ ଗୋଟିଏ କାହାଣୀ କହିବେ।
ସେହିପରି ମନ କି ବାତ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶରେ କୃଷକମାନଙ୍କ ଗୁରୁତ୍ୱ ଉପରେ ଆଲୋଚନା କରି ଦେଶକୁ ଆତ୍ମନିର୍ଭର କରିବାରେ କୃଷକଙ୍କ ଭୂମିକା କେତେ ଗୁରୁତ୍ୱପୂର୍ଣ୍ଣ ସେ ବିଷୟରେ କହିଥିଲେ। ତାଙ୍କ କହିବା ମୁତାବକ, କରୋନା ସଙ୍କଟ ସମୟରେ କୃଷି କ୍ଷେତ୍ର ମଧ୍ୟ ନିଜର ଶକ୍ତି ପ୍ରଦର୍ଶନ କରିଛି। ଦେଶର କୃଷକମାନେ ଯେତେ ଶକ୍ତିଶାଳୀ ହେବେ, ଗାଁ ସେତେ ଅଧିକ ଶକ୍ତିଶାଳୀ ହେବ, ଦେଶ ସେତେ ଆତ୍ମନିର୍ଭର ହେବ। ଆତ୍ମନିର୍ଭରଶୀଳ ଭାରତର ମୂଳଦୁଆ କେବଳ କୃଷକଙ୍କ ଶକ୍ତିରେ ନିର୍ମାଣ ହେବ। ଯଦି କୃଷକ ଶକ୍ତିଶାଳୀ ହୁଏ, ତେବେ ଭାରତ ଆତ୍ମନିର୍ଭରଶୀଳ ହେବ। କଥାରେ ଅଛି ଯିଏ ଭୂମି ସହ ଯେତେ ଜଡ଼ିତ, ତାକୁ ସବୁଠୁ ବଡ଼ ଝଡ଼ ମଧ୍ୟ ଦୋହଲାଇ ପାରିବ ନାହିଁ। ଆମର କୃଷି କ୍ଷେତ୍ର କରୋନାର ଏହି କଠିନ ସମୟରେ ଏହାର ଏକ ଜୀବନ୍ତ ଉଦାହରଣ। ଆଜି କୃଷକମାନେ ନିଜ ଇଚ୍ଛାରେ ଉତ୍ପାଦ ବିକ୍ରୟ କରିବାର ସ୍ୱାଧୀନତା ପାଇଛନ୍ତି। ସାମ୍ପ୍ରତିକ ଅତୀତରେ, ଏହି କ୍ଷେତ୍ରଗୁଡିକ ନିଜକୁ ଅନେକ ପ୍ରତିବନ୍ଧକରୁ ମୁକ୍ତ କରିଛନ୍ତି।
