ନେପାଳରେ ଫସି ରହିଥିବା ଓଡ଼ିଆ ଶ୍ରମିକଙ୍କ ଦୁଃଖ ବୁଝିଲେ ଧର୍ମେନ୍ଦ୍ର

ଖଇରା,ଏନ୍ଏନ୍ଏସ୍: କରୋନା ପାଇଁ ସାରା ଦେଶ ଏବେ ଲକଡ଼ାଉନ ରହିଛି। ଯେଉଁଥିପାଇଁ ବାହାର ରାଜ୍ୟରେ ଫସି ରହିଛନ୍ତି ଦାଦନ ଶ୍ରମିକ। ସେଠାରେ ସମସ୍ତ କାର୍ଯ୍ୟ ବନ୍ଦ ହୋଇଯିବାରୁ ଫଳରେ ସେମାନଙ୍କର ମାଲିକ ଦରମା ମଧ୍ୟ ବନ୍ଦ କରିଦେଇଛନ୍ତି। ଫଳରେ ସେମାନଙ୍କ ନିକଟରେ ଟଙ୍କା ପଇସା ନଥିବାରୁ ଖାଇବା ପିଇବା ପାଇଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି।

ସେହିଭଳି ବାଲେଶ୍ଵର ଜିଲ୍ଲା ଖଇରା ବ୍ଲକ୍ ଅଧିନ କୁରୁଣ୍ଟା ପଞ୍ଚାୟତ ରାଇକୁଳା ରଘୁନାଥପୁର ଗ୍ରାମର ରମାକାନ୍ତ ନାୟକ ଓ ଖାଡ଼ିଗୋଛି ଗ୍ରାମର ମିଥୁନ କୁମାର ପାତ୍ରଙ୍କ ସମେତ ୩୦ରୁ ଊର୍ଦ୍ଧ୍ୱ ଶ୍ରମିକ ନେପାଳ କାଠମାଣ୍ଡୁରେ ଖାଦ୍ୟ ନପାଇ ଭୋକ ଉପାସରେ ଫସି ରହିଥିଲେ। ଏନେଇ ଖଇରା ଅଞ୍ଚଳର କିଛି ଜନସାଧାରଣ ବିଜେପି ଯୁବମୋର୍ଚ୍ଚାର ରାଷ୍ଟ୍ରୀୟ ଉପାଧ୍ୟକ୍ଷ ଠାକୁର ରଞ୍ଜିତ ଦାସଙ୍କୁ ଏ ସମ୍ପର୍କରେ ଅବଗତ କରାଇଥିଲେ। ପରେ ଶ୍ରୀ ଦାସ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଏ ବିଷୟରେ ଜଣାଇଥିଲେ। କେନ୍ଦ୍ରମନ୍ତ୍ରୀ ଭାରତ ଦୂତାବାସ ସହ ଯୋଗାଯୋଗ କରି ସେମାନଙ୍କ ପାଖରେ ଶୁଖିଲା ଖାଦ୍ୟ ଓ ରାସନ ସାମଗ୍ରୀ ପହଞ୍ଚାଇଛନ୍ତି।

ଏହି ଦୁଃଖ ସମୟରେ କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ଓ ତାଙ୍କ ଅଫିସର କାର୍ୟ୍ୟକର୍ତା ଦୁଃଖର ସାଥି ହୋଇଥିବାରୁ ଓଡ଼ିଆ ଶ୍ରମିକମାନେ ଏକ ଭିଡିଓ ଜରିଆରେ ଆନ୍ତରିକ ଧନ୍ୟବାଦ ଜଣାଇଛନ୍ତି। ଓଡ଼ିଆ ଶ୍ରମିକ ଜାରି କରିଥିବା ଏହି ଭିଡ଼ିଓ ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି। ଏନେଇ ସ୍ଥାନୀୟ ବାସିନ୍ଦା ମଧ୍ୟ ଠାକୁରରଞ୍ଜିତ ଦାସଙ୍କୁ କୃତଜ୍ଞତା ଜଣାଇଛନ୍ତି।