ନବରଙ୍ଗପୁର,ଏନ୍ଏନ୍ଏସ୍: ରେଡକ୍ରସ ଓଡ଼ିଶା ରାଜ୍ୟ ଶାଖା, ଭୁବନେଶ୍ୱରଙ୍କ ନିର୍ଦ୍ଦେଶକ୍ରମେ ନବରଙ୍ଗପୁର ମହାବିଦ୍ୟାଳୟରେ ଯୁବ ରେଡକ୍ରସର ଜିଲ୍ଲାସ୍ତରୀୟ ସମାବେଶ ଆୟୋଜିତ ହୋଇଯାଇଛି । ଉକ୍ତ କାର୍ଯ୍ୟକ୍ରମରେ ଜିଲ୍ଲାର ୪୨ଟି ଉଚ୍ଚ ମାଧ୍ୟମିକ ବିଦ୍ୟାଳୟ ଏବଂ୧୩ଟି ସ୍ନାତକ ମହାବିଦ୍ୟାଳୟରୁ ପ୍ରାୟ ୭୦ ଜଣ ଅଧ୍ୟକ୍ଷ ଓ କାଉନସିଲର ଯୋଗ ଦେଇଥିଲେ । ପ୍ରଥମ ପର୍ଯ୍ୟାୟରେ ରେଡକ୍ରସର ଆଜୀବନ ସଦସ୍ୟ ଜଗନ୍ନାଥ ମହାପାତ୍ର ଓ ଅଧ୍ୟକ୍ଷ ଡା. ଭାସ୍କର ନାଥ ବିଶ୍ୱାଳ ସମଗ୍ର ଜିଲ୍ଲା ପାଇଁ “ମୋ ବର ଗଛ’ ପ୍ରକଳ୍ପର ଉଦଘାଟନ କରିବା ସହିତ ସାଙ୍କେତିକ ଭାବେ ୨ଟି ବର ଗଛ ଲଗାଇଥିଲେ । ପର୍ଯ୍ୟାୟକ୍ରମେ ଓଡ଼ିଶା ତଥା ଭାରତରେ ପ୍ରକଳ୍ପର ପ୍ରସାର ସହ ଜିଲ୍ଲା ରେଡକ୍ରସର କାର୍ଯ୍ୟକୁ ଜାତୀୟ ସ୍ତରରେ ପହଞ୍ଚାଇବା ପାଇଁ କାର୍ଯ୍ୟ କରାଯାଉଛି ବୋଲି ଅଧ୍ୟକ୍ଷ ପ୍ରକାଶ କରିଥିଲେ । ଦ୍ୱିତୀୟ ପର୍ଯ୍ୟାୟ କାର୍ଯ୍ୟକ୍ରମରେ ଅତିରିକ୍ତ ଜିଲ୍ଲାପାଳ ମହେଶ୍ୱର ଚନ୍ଦ୍ର ନାୟକ ମୁଖ୍ୟଅତିଥି ରୂପେ ଯୋଗ ଦେଇଥିବାବେଳେ ଜିଲ୍ଲା ଆପାତକାଳୀନ ଅଧିକାରୀ ପି.ମନସ୍ମିତା, ବିଶିଷ୍ଟ ସମାଜସେବୀ ଜଗନ୍ନାଥ ମହାପାତ୍ର ସମ୍ମାନିତ ଅତିଥିଭାବେ ସାମିଲ ହୋଇଥିଲେ । ମହାବିଦ୍ୟାଳୟ ଅଧ୍ୟକ୍ଷ ତଥା ଯୁବ ରେଡକ୍ରସ ଅଧ୍ୟକ୍ଷ ଡା. ଭାସ୍କର ନାଥ ବିଶ୍ୱାଳ ସମସ୍ତଙ୍କୁ ସ୍ୱାଗତ କରିବା ସହ ଆଗାମୀ ଦିନରେ ରେଡକ୍ରସକୁ ଏକ ଅଭିଯାନରେ ପରିଣତ କରିବା ପାଇଁ ଆହ୍ୱାନ ଦେଇଥିଲେ । ମୁଖ୍ୟଅତିଥି ଶ୍ରୀ ନାୟକ ବିଶେଷ ପରିସ୍ଥିତିରେ ରେଡକ୍ରସ ହିଁ ଏକ ପ୍ରମୁଖ ବିକଳ୍ପ ବୋଲି ପ୍ରକାଶ କରିଥିଲେ । ରେଡକ୍ରସର ସମସ୍ତ କାର୍ଯ୍ୟକ୍ରମରେ ଜିଲ୍ଲା ରେଡକ୍ରସର ଦ୍ୱାର ସର୍ବଦା ଖୋଲା ରହିବ ବୋଲି ଅଧିକାରୀ ମନସ୍ମିତା ପ୍ରତିଶ୍ରୁତି ଦେଇଥିଲେ । ଯୁବ ରେଡକ୍ରସ୍ ଜିଲ୍ଲା ସମ୍ପାଦକ ଅଧ୍ୟାପକ ଦିଲ୍ଲୀପ ହୋତାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଜିଲ୍ଲା ସଂଯୋଜକ ଅଧ୍ୟାପକ ଅଖିଳ କୁମାର ଭଟ୍ଟ ସମଗ୍ର କାର୍ଯ୍ୟକ୍ରମର ପରିଚାଳନା କରିଥିଲେ । ଅଧ୍ୟାପକ ଶମ୍ଭୁ ପ୍ରାସାଦ ହୋତ୍ତା ଓ କୁମାରୀ ରଜନୀ ମିଞ୍ଜ ବିଭିନ୍ନ ବିଭାଗକୁ ସଂଯୋଜନା କରିଥିଲେ । ଯୁବ କାଉନସିଲର ଅଶ୍ୱିନୀ କୁମାର ବେହେରା ଓ ନିର୍ମଳା ହିକ୍କା ଯୁବ ରେଡକ୍ରସର ବାର୍ଷିକ ରିପୋର୍ଟ ଉପସ୍ଥାପନ କରିଥିଲେ । ଜିଲ୍ଲା ଡାକ୍ତରଖାନା ଦିଶା ତରଫରୁ ଚନ୍ଦ୍ର ଶେଖର ପଟ୍ଟନାୟକ ଏଚଆଇଭି ଉପରେ କହିବା ସହ ରେଡ ରିବନ୍ କ୍ଲବ ସବୁ ଅନୁଷ୍ଠାନରେ ଖୋଲିବା ପାଇଁ ଆହ୍ୱାନ ଦେଇଥିଲେ । ରେଡକ୍ରସର କ୍ରମ ବିକାଶ ଓ ବର୍ତ୍ତମାନର ଆବଶ୍ୟକତାକୁ ଏକ ବୃତ୍ତ ଚିତ୍ର ମାଧ୍ୟମରେ ଜିଲ୍ଲା ସଂଯୋଜକ ଉପସ୍ଥାପନ କରିଥିଲେ । ଅଶୋକ ପାତ୍ର ସ୍ୱାଗତ ସଙ୍ଗୀତ ପରିବେଷଣ କରିଥିଲେ । ପ୍ରଶାନ୍ତ ମିଶ୍ର, ରାଜନ ତ୍ରିପାଠୀ, ଗୋପି ଗୌଡ଼, ଗୁପ୍ତ ,ସାଇ, ସୀତାରାମ, ମହେନ୍ଦ୍ର, ବନମାଳୀ, ବାସନ୍ତୀ ଓ ମୁରଲୀ ପ୍ରମୁଖ ସହଯୋଗ କରିଥିଲେ । ସର୍ବୋପରି ପ୍ରାୟ ୧୦୦ ସଭ୍ୟସଭ୍ୟାଙ୍କୁ ନେଇ ଅନୁଷ୍ଠିତ ଉତ୍ସବରେ ଅନେକଗୁଡ଼ିଏ ପ୍ରସ୍ତାବକୁ ବିଚାରକୁ ନିଆଯାଇଥିଲା । ସ୍ନାତକ ମହିଳା ମହାବିଦ୍ୟାଳୟ ଅଧ୍ୟାପିକା ଡା. ସଂଯୁକ୍ତା ପଣ୍ଡା ସମସ୍ତଙ୍କ ଉପସ୍ଥିତି ତଥା ଗଠନମୂଳକ ମତାମତ ପାଇଁ ଧନ୍ୟବାଦ ଦେଇଥିଲେ ।
