ନୂଆଦିଲ୍ଲୀ,ଏଜେନ୍ସି: ଆଫଗାନିସ୍ତାନରେ ତାଲିବାନର ଆତଙ୍କ ଜାରି ରହିଛି। ଏହାମଧ୍ୟରେ ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ପ୍ରଶାସନ ଶୁକ୍ରବାର ଆଫଗାନକୁ ୩୦୦୦ ସୈନ୍ୟଙ୍କୁ ପଠାଇଛି। ଆମେରିକୀୟ ଯବାନମାନେ କାବୁଲରେ ପହଁଚି ସାରିଛନ୍ତି। ସେଠାରେ ଥିବା ଆମେରିକାର ଦୂତାବାସରୁ ଅଧିକାରୀମାନଙ୍କୁ ସ୍ଥାନାନ୍ତର କରିବାରେ ଯବାନମାନେ ସାହାଯ୍ୟ କରିବେ। ଆମେରିକାର ଅଧିକାରୀ ଏବଂ କର୍ମଚାରୀଙ୍କ ନିରାପଦ ସ୍ଥାନାନ୍ତର ମଧ୍ୟରେ ତାଲିବାନ ଦେଶର ବହୁ ଅଂଶ ଦଖଲ କରିସାରିଛି।
ତାଲିବାନ ଶୁକ୍ରବାର ଦିନ ଆଫଗାନିସ୍ତାନର ଦକ୍ଷିଣ ଭାଗର ପ୍ରାୟ ସମ୍ପୂର୍ଣ୍ଣ ନିୟନ୍ତ୍ରଣକୁ ନେଇଥିଲା ଏବଂ ସେଠାରେ ଏହା ଆହୁରି ଚାରିଟି ପ୍ରଦେଶର ରାଜଧାନୀକୁ ନିୟନ୍ତ୍ରଣ କରିଥିଲା। ଏବେ ସଙ୍ଗଠନ ଧୀରେ ଧୀରେ କାବୁଲ ଆଡକୁ ଗତି କରୁଛି ।ଆଫଗାନିସ୍ତାନ ପାଇଁ ଶେଷ ବଡ ଝଟକା ସେତେବେଳେ ଲାଗିଥିଲା ଯେତେବେଳେ ହେଲମାଣ୍ଡ ପ୍ରଦେଶର ରାଜଧାନୀ ଉପରୁ ସରକାର ନିୟନ୍ତ୍ରଣ ହରାଇଥିଲେ।
ଆମେରିକାର ବୈଦେଶିକ ମନ୍ତ୍ରାଳୟ କହିଛି ଯେ ଦୂତାବାସ କାର୍ଯ୍ୟ ଜାରି ରଖିବ, କିନ୍ତୁ ହଜାର ହଜାର ଅତିରିକ୍ତ ଆମେରିକୀୟ ସୈନ୍ୟ ପଠାଇବାକୁ ଗୁରୁବାରର ନିଷ୍ପତ୍ତି ହୋଇଥିଲା। ତାଲିବାନର ପ୍ରାଧାନ୍ୟକୁ ରୋକିବା ପାଇଁ ଆଫଗାନିସ୍ତାନ ସରକାରଙ୍କ ଦକ୍ଷତା ଉପରେ ଆମେରିକାର ଆତ୍ମବିଶ୍ୱାସ ହ୍ରାସ ପାଇବାରେ ଲାଗିଛି। ଏହି ମାସ ଶେଷ ସୁଦ୍ଧା ଆଫଗାନିସ୍ତାନରେ ଆମେରିକାର ଅପରେସନକୁ ବନ୍ଦ କରିବାକୁ ଗୁରୁବାର ସକାଳେ ବାଇଡେନ୍ ନିର୍ଦ୍ଦେଶ ଦେଇଛନ୍ତି। ଏହାପୂର୍ବରୁ ସେ ଜାତୀୟ ସୁରକ୍ଷା ଅଧିକାରୀଙ୍କ ସହ ପରାମର୍ଶ କରିଥିଲେ। ଏହି ଯୋଜନାକୁ ସଂଯୋଜନା କରିବା ପାଇଁ ଆଫଗାନିସ୍ତାନ ରାଷ୍ଟ୍ରପତି ଆଶରଫ ଘାନିଙ୍କ ସହ ରାଜ୍ୟ ସଚିବ ଟନି ବ୍ଲିଙ୍କେନ୍ ଏବଂ ପ୍ରତିରକ୍ଷା ମନ୍ତ୍ରୀ ଲାଉଡ ଅଷ୍ଟିନ ଗୁରୁବାର ଫୋନରେ କଥା ହୋଇଛନ୍ତି। ତାଲିବାନ ଅଧିକାରୀଙ୍କୁ ମଧ୍ୟ ଆମେରିକା ସିଧାସଳଖ ଚେତାବନୀ ଦେଇଛି ଯେ ଯଦି ଆମେରିକାର ସାମରିକ ନିୟୋଜନ ସମୟରେ ଏହା ଆମେରିକୀୟଙ୍କ ଉପରେ ଆକ୍ରମଣ କରେ ତେବେ ଏହାର ପ୍ରତିଶୋଧ ନିଆଯିବ।
ଏଥି ସହିତ ବ୍ରିଟେନର ପ୍ରତିରକ୍ଷା ମନ୍ତ୍ରଣାଳୟ ଆଫଗାନିସ୍ତାନକୁ ପ୍ରାୟ ୬୦୦ ଅତିରିକ୍ତ ସୈନିକଙ୍କୁ ଅବଶିଷ୍ଟ ସୈନିକଙ୍କ ନିରାପଦ ପ୍ରତ୍ୟାବର୍ତ୍ତନ ପାଇଁ ପଠାଇବ। ସୂଚନାନୁସାରେ, କାବୁଲରୁ କାନାଡିୟ କର୍ମଚାରୀଙ୍କ ନିରାପଦ ସ୍ଥାନାନ୍ତର ପାଇଁ କାନାଡାର ସ୍ୱତନ୍ତ୍ର ବାହିନୀ ମଧ୍ୟ ନିୟୋଜିତ ହେବ। ପେଣ୍ଟାଗନ୍ର ମୁଖ୍ୟ ମୁଖପାତ୍ର ଜନ୍ କିର୍ବି କହିଛନ୍ତି ଯେ ପେଣ୍ଟାଗନ୍ କୁଏତକୁ ୩୫୦୦ ରୁ ୪୦୦୦ ସୈନ୍ୟ ପଠାଇବ । ଦରକାର ହେଲେ ଅଧିକ ଯବାନଙ୍କୁ ପଠାଯିବ।
ଏଥିସହ ଆସନ୍ତା ଦିନରେ ପ୍ରାୟ ୧୦୦୦ ହଜାର ସେନା ଏବଂ ବାୟୁସେନା କର୍ମଚାରୀ କାତାରକୁ ପଠାଯିବ ଏବଂ ଆମେରିକା ପାଇଁ କାର୍ୟ୍ୟ କରୁଥିବା ତଥା ତାଲିବାନକୁ ଭୟ କରୁଥିବା ଆଫଗାନିସ୍ତାନ ନାଗରିକଙ୍କ ପାଇଁ ସ୍ୱତନ୍ତ୍ର ଇମିଗ୍ରେସନ ଭିସା ଆବେଦନକୁ ତ୍ୱରାନ୍ୱିତ କରିବାରେ ସାହାଯ୍ୟ କରିବ ବୋଲି କିର୍ବି କହିଛନ୍ତି। ଯେଉଁଥିରେ ସେନା ପୁଲିସ ଏବଂ ଡାକ୍ତରୀ କର୍ମଚାରୀ ରହିବେ ବୋଲି ଜଣାପଡିଛି।
