ଟ୍ରେନିଂ ସମୟରେ ଗ୍ଲାଇଡର୍ ଦୁର୍ଘଟଣାଗ୍ରସ୍ତ, ୨ ନୌସେନା ଅଧିକାରୀଙ୍କ ମୃତ୍ୟୁ

କୋଚି,ଏଜେନ୍ସି: ଆଜି ସକାଳେ ୨ ଜଣ ନୌସେନା ଅଧିକାରୀଙ୍କ ମୃତ୍ୟୁ ଘଟିଛି। ସେମାନେ ଉଡ଼ାଉଥିବା ପାୱାର ଗ୍ଲାଇଡର ନିୟନ୍ତ୍ରଣ ହରାଇ କୋଚିରେ ଦୁର୍ଘଟଣାଗ୍ରସ୍ତ ହେବା ପରେ ସେମାନଙ୍କ ମୃତ୍ୟୁ ଘଟିଛି। ମୃତ ଦୁଇ ଅଧିକାରଙ୍କ ନାଁ ରାଜୀବ ଝା ଏବଂ ସୁନୀଲ କୁମାର ବୋଲି ଜଣାପଡ଼ିଛି। ଦୁହିଁଙ୍କ ମଧ୍ୟରୁ ରାଜୀବ ଡେରାଡ଼ୁନର ବାସିନ୍ଦା ଥିବା ବେଳେ ସୁନୀଲ ବିହାରର ବାସିନ୍ଦା ଥିଲେ।

ନୌସେନା ମୁଖପାତ୍ରଙ୍କ କହିବା ଅନୁସାରେ, ଗ୍ଲାଇଡର୍ ସକାଳ ପ୍ରାୟ ୭ଟାରେ ସାଉଥ୍ ନେଭାଲ୍ କମାଣ୍ଡର ନାଭାଲ୍ ଏୟାର ଷ୍ଟେସନ ଆଇଏନଏସ ଗରୁଡରୁ ଉଡ଼ାଣ ଭରିଥିଲା। ଅଧିକାରୀ ଲେଫ୍ଟନାଣ୍ଟ ରାଜୀବ ଝା ଏବଂ ପେଟି ଅଫିସର (ଇଲେକ୍ଟ୍ରିକାଲ୍ ଏୟାର) ସୁନୀଲ କୁମାର ଏକ ରୁଟିନ୍ ଟ୍ରେନିଂ କରୁଥିବା ବେଳେ ଗ୍ଲାଇଡରରେ ଏକ ବୈଷୟିକ ତ୍ରୁଟି ବିକଶିତ ହୋଇଥିଲା ​​ଏବଂ ସକାଳ ପ୍ରାୟ ୭ଟା ୧୫ରେ ଥୋପୁମ୍ପାଡି ସ୍ଥିତ ବିଓଟି ବ୍ରିଜ୍ ନିକଟରେ ଏହା ଦୁର୍ଘଟଣା ଗ୍ରସ୍ତ ହୋଇଥିଲା। ଏଥିରେ ଅଧିକାରୀମାନେ ଗୁରୁତର ଭାବେ ଆହତ ହୋଇଥିଲେ। ଏକ ନୌସେନା ଆମ୍ବୁଲାନ୍ସ ସେମାନଙ୍କୁ ଆଇଏନଏସ ସଞ୍ଜିବନିକୁ ସ୍ଥାନାନ୍ତର କରିଥିଲା। ଦୁର୍ଭାଗ୍ୟବଶତଃ ଚିକିତ୍ସିତ ଅବସ୍ଥାରେ ସେମାନଙ୍କ ମୃତ୍ୟୁ ଘଟିଛି। ଏହି ଘଟଣା ପରେ ସାଉଥ୍ ନାଭାଲ୍ କମାଣ୍ଡ ଦ୍ୱାରା ତଦନ୍ତ ନିର୍ଦ୍ଦେଶ ଦିଆଯାଇଛି।