ଶ୍ରୀନଗର,ଏଜେନ୍ସି: ଜମ୍ମୁ କଶ୍ମୀରର କୁଲଗାମ ଜିଲ୍ଲାରେ ବୁଧବାର ସୁରକ୍ଷାବାହିନୀକୁ ବଡ଼ ସଫଳତା ମିଳିଛି। ସୁରକ୍ଷା ବାହିନୀର ଯବାନମାନେ ଅମରନାଥ ଯାତ୍ରା ମାର୍ଗ ନିକଟରେ ଆତଙ୍କବାଦୀ ସଂଗଠନ ‘ଲଶ୍କର-ଏ-ତଏବା’ର ୨ ଜଣ ସଦସ୍ୟଙ୍କୁ ନିପାତ କରିଛନ୍ତି। ଜମ୍ମୁ କଶ୍ମୀର ପୋଲିସ ପକ୍ଷରୁ ଏହି ସୂଚନା ଦିଆଯାଇଛି। ଜଣେ ପୁଲିସ ଅଧିକାରୀ ଗଣମାଧ୍ୟମର ପ୍ରତିନିଧିଙ୍କୁ କହିଛନ୍ତି ଯେ, ଯେଉଁ ସ୍ଥାନରେ ଏନକାଉଣ୍ଟର ହୋଇଛି, ତାହା ଅମରନାଥ ଯାତ୍ରାପଥ ଠାରୁ ଅଳ୍ପ ଦୂରରେ।
ପୋଲିସ କହିଛି ଯେ. କୁଲଗାମ ଜିଲ୍ଲାରେ ମୀର ବଜାର ଅଞ୍ଚଳର ନଭାପୁରାରେ ଆତଙ୍କବାଦୀମାନେ ଉପଲବ୍ଧ ଥିବା ସୂଚନା ମିଳିଥିଲା। ଏହା ପରେ ସୁରକ୍ଷା ବାହିନୀ ସଂପୃକ୍ତ ଅଞ୍ଚଳକୁ ଘେରି ଯାଇଥିଲେ। ଅଧିକାରୀଙ୍କ କହିବା ଅନୁସାରେ ସର୍ଚ୍ଚ ଅପରେସନ୍ ସମୟରେ ଏନକାଉଣ୍ଟର ହୋଇଥିଲେ, ଯେଉଁଥିରେ କି ୨ ଜଣ ଆତଙ୍କବାଦୀ ଟଳିପଡ଼ିଥିଲେ।
କଶ୍ମୀର ଜୋନ୍ର ପୋଲିସ ମହାନିରୀକ୍ଷକ ବିଜୟ କୁମାର ଟୁଇଟ କରି କହିଛନ୍ତି ଯେ, ନିହତ ହେଶଇଥିବା ୨ ଜଣ ଆତଙ୍କବାଦୀଙ୍କ ପରିଚୟ ମିଳିଛି। ସେମାନେ ଆତଙ୍କବାଦୀ ସଂଗଠନ ଲଶ୍କର-ଏ-ତଇବା ସହିତ କାମ କରୁଥିଲେ। ଏହା ଏକ ଗୁରୁତ୍ୱପୂର୍ଣ୍ଣ ଏନକାଉଣ୍ଟର ବୋଲି ସେ କହିଛନ୍ତି। କାରଣ ଜାତୀୟ ରାଜପଥ ଠାରୁ ଏହି ଘଟଣାସ୍ଥଳ କମ୍ ଦୂରରେ ରହିଛି।
