ଭଦ୍ରକ/ବାସୁଦେବପୁର,ଏନ୍ଏନ୍ଏସ୍ : ପୋଖରୀରେ ବୁଡ଼ି ସୋମବାର ୨ ଜଣ ଶିଶୁପୁତ୍ରଙ୍କ ମୃତ୍ୟୁ ଘଟିଛି। ମୃତକମାନେ ହେଲେ ଭଦ୍ରକ ବ୍ଲକ ସାବରଙ୍ଗ ସମିଆ ଗ୍ରାମର ରଞ୍ଜନ ଧୂପାଳଙ୍କ ୮ ବର୍ଷର ଶିଶୁପୁତ୍ର ଦେବବ୍ରତ ଓ ବାସୁଦେବପୁର ଥାନା ମନ୍ଦାରୀ ଗ୍ରାମର ପାର୍ଥସାରଥୀ ବେହେରାଙ୍କ ୧୦ ବର୍ଷର ପୁତ୍ର ବିଶ୍ୱଜିତ୍ ବେହେରା। ପାର୍ଥସାରଥୀ ସମିଆ ଗ୍ରାମରେ ଭଡ଼ାଘରେ ରହୁଥିଲେ। ବିଶ୍ୱଜିତ୍ ଓ ଦେବବ୍ରତ ସୋମବାର ମଧ୍ୟାହ୍ନରେ ସାଙ୍ଗ ହୋଇ ଖେଳୁଥିଲେ। ଘର ପାଖରେ ଥିବା ପୋଖରୀ ଜେସିପି ଦ୍ୱାରା ଖୋଳା ହୋଇ ଗଭୀର ଥିଲା। ପୋଖରୀ କୂଳରେ ଖେଳୁଥିବା ବେଳେ ଅସାବଧାନତାରୁ ଦୁହେଁ ପାଣି ଭିତରକୁ ଖସି ପଡ଼ିଥିଲେ। ଖବର ପାଇ ଗ୍ରାମବାସୀ ତାଙ୍କୁ ଉଦ୍ଧାର କରି ଭଦ୍ରକ ମେଡିକାଲକୁ ଆଣିଥିଲେ ମଧ୍ୟ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
