ଧର୍ମଶାଳା,ଏନ୍ଏନ୍ଏସ୍ : ଯାଜପୁର ଜିଲ୍ଲା ୧୬ ନଂ ଜାତୀୟ ରାଜପଥର ଧର୍ମଶାଳା ଥାନା ଅନ୍ତର୍ଗତ ସାରୋଇ ଛକ ନିକଟରେ ଆଜି ପୂର୍ବାହ୍ନରେ ଘଟିଯାଇଛି ଏକ ମର୍ମନ୍ତୁଦ ସଡ଼କ ଦୁର୍ଘଟଣା । ଦୁର୍ଘଟଣାରେ ଜଳିଯାଇଛି ବାଇକ୍ ସହ ଟ୍ରକ୍ । ବାଇକରେ ଥିବା ଦମ୍ପତି ଗୁରୁତର ହୋଇ କଟକ ବଡ ମେଡିକାଲରେ ଚିକିତ୍ସିତ ହେଉଥିବା ଜଣାପଡିଛି ।
ଘଟଣାରୁ ପ୍ରକାଶ ଯେ, ଆଜି ପୂର୍ବାହ୍ନରେ ଧର୍ମଶାଳା ଥାନା ଅନ୍ତର୍ଗତ ୧୬ ନଂ ଜାତୀୟ ରାଜପଥର ସରୋଇ ଛକ ନିକଟରେ ଦୁଇଟି ଦୁର୍ଘଟଣା ଗ୍ରସ୍ତ ଗାଡି ଜଳିଯାଇଛି । ଏହି ଘଟଣାରେ ବାଇକରୁ ପଡି ଗୁରୁତର ଦମ୍ପତିଙ୍କୁ ପ୍ରଥମେ ବଡଚଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଓ ପରେ ଅବସ୍ଥା ସଙ୍କଟାପନ୍ନ ହେବାରୁ କଟକ ବଡ ମେଡିକାଲକୁ ସ୍ଥାନାନ୍ତରିତ କରାଯାଇଛି । ଏହି ଦମ୍ପତି ହେଲେ ଭଦ୍ରକ ବନ୍ତ ଅଂଚଳର ତାପସ ତରାଇ ଓ ଶୁଭଲକ୍ଷ୍ମୀ ନାୟକ । ଦୁହେଁ ଏକ ବାଇକରେ ଭୁବନେଶ୍ୱରୁ ଭଦ୍ରକ ଅଭିମୁଖେ ଆସୁଥିବା ସମୟରେ ଘଟିଥିଲା ଦୁର୍ଘଟଣା ।
ଖବର ପାଇ ଚଣ୍ଡିଖୋଲ ଅଗ୍ନିଶମ ବାହିନୀ ଘଟଣାସ୍ଥଳରେ ପଂହଚି ଗାଡିରେ ଲାଗିଥିବା ନିଆଁକୁ ଲିଭାଇଥିଲେ । ନିଆଁ ଲିଭିବା ପୂର୍ବରୁ ବାଇକଟି ସମ୍ପୂର୍ଣ୍ଣ ଭାବେ ଜଳିଯାଇଥିବା ଜଣାପଡିଛି । ଏହି ଦୁଇ ଗାଡି ଜଳିଯିବା ଫଳରେ ଜାତୀୟ ରାଜପଥରେ କିଛି ସମୟ ଧରି ଯାନବାହନ ଚଳାଚଳ ବାଧାପ୍ରାପ୍ତ ହୋଇଥିଲା । ଘଟଣାସ୍ଥଳରେ ଧର୍ମଶାଳା ପୁଲିସ ପଂହଚିବା ପରେ ଗାଡି ଚଳାଚଳ ସ୍ୱାଭାବିକ ହୋଇଥିଲା । ଦୁର୍ଘଟଣାଗ୍ରସ୍ତ ୨ ଗାଡିକୁ ଜବତ କରି ଘଟଣାର ତଦନ୍ତ ଚଳାଇଛି ପୋଲିସ ।
