ଆଜି ଆସିବ ଅଯୋଧ୍ୟା ମାମଲାର ରାୟ, ଅଯୋଧ୍ୟା ଓ ଜାମ୍ମୁ କାଶ୍ମୀରରେ ୧୪୪ଧାରା ଲାଗୁ
ଲକ୍ଷ୍ନୌ,ଏଜେନ୍ସି: ଅଯୋଧ୍ୟା ଫଇସଲାକୁ ଦୃଷ୍ଟିରେ ରଖି ଗୃହ ମନ୍ତ୍ରଣାଳୟ ସବୁ ରାଜ୍ୟଙ୍କୁ ସତର୍କ ରହିବାକୁ ନିର୍ଦ୍ଦେଶ ଦିଆଯାଇଛି। ବହୁଚର୍ଚ୍ଚିତ ତଥା ବହୁ ପ୍ରତୀକ୍ଷିତ ଅଯୋଧ୍ୟା ରାମ ଜନ୍ମଭୂମି-ବାବ୍ରି ମସଜିଦ ରାୟ ଆଜି ପ୍ରକାଶ ପାଇବ। ଏ ନେଇ ଉତ୍ତର ପ୍ରଦେଶର କେତେକ ସ୍ଥାନ ସମେତ ଜାମ୍ମୁ-କାଶ୍ମୀରରେ ୧୪୪ ଧାରା ଲାଗୁ କରାଯାଇଛି। ଏହି ପରିପ୍ରେକ୍ଷୀରେ ବାଣ ଫୁଟାଇବା ନିଷିଦ୍ଧ କରାଯାଇଥିବା ବେଳେ ମଦଦୋକାନ ଗୁଡିକୁ ବନ୍ଦ ରଖିବା ପାଇଁ ନିର୍ଦ୍ଦେଶ ଦିଆଯାଇଛି। ସବୁ ରାଜ୍ୟ ଏବଂ କେନ୍ଦ୍ରଶାସିତ ଅଂଚଳକୁ ସତର୍କ ରହିବାକୁ କୁହାଯାଇଛି ।
ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଖୋଦ୍ ପରିସ୍ଥିତି ଉପରେ ନଜର ରଖିଛନ୍ତି । ଏଥିସହ ୪ହଜାର ଅର୍ଦ୍ଧସୈନିକଙ୍କୁ ନିୟୋଜିତ କରାଯାଇଛି । ୭୮ଟି ଗୁରୁତ୍ୱପୂର୍ଣ୍ଣ ଷ୍ଟେସନରେ ସୁରକ୍ଷା ବାହୀନି ଆଲର୍ଟ କରାଯାଇଛି। ସେହିପରି ଅଯୋଧ୍ୟା ଅଞ୍ଚଳର ସମସ୍ତ କଲ ରେକର୍ଡ଼ଂ କରାଯିବ। ସୋସିଆଲ ମିଡିଆରେ ଯେପରି କେହି କୌଣସି ବିବାଦୀୟ ମନ୍ତବ୍ୟ ନଦେବେ ସେଥିପ୍ରତି ବିଶେଷ ଦୃଷ୍ଟି ରଖାଯାଇଛି । ଏପରିକି ଆବଶ୍ୟକ ପଡିଲେ ଇଂଟରନେଟ ସେବା ବନ୍ଦ କରି ଦିଆଯାଇପାରେ ।
ଜିଲ୍ଲା ଅଧିକାରୀ ଧର୍ମଗୁରୁଙ୍କ ସହ ଆଲୋଚନା କରୁଛନ୍ତି । ସେନା ଏବଂ ବାୟୁସେନାକୁ ମଧ୍ୟ ସଚେତନ ରହିବାକୁ ନିର୍ଦ୍ଦେଶ ଦିଆଯାଇଥିବା ସୂଚନା ମିଳିଛି । ଏହାସହ ୬ହଜାର ଲୋକଙ୍କୁ ଚିହ୍ନଟ କରାଯାଇଛି । ଯେଉଁମାନେ ରାୟ ଆସିଲା ପରେ ଅଶାନ୍ତ ପରିସ୍ଥିତି ସୃଷ୍ଟି କରିପାରନ୍ତି । କେବଳ ଅଯୋଧ୍ୟାରେ ୧୫ ହଜାର ଯବାନ ମୁତୟନ ହୋଇଥିବା ଜଣାପଡିଛି । ପ୍ରଧାନ ବିଚାରପତିଙ୍କୁ ଜେଡ୍ ପ୍ଲସ୍ ସୁରକ୍ଷା ସହିତ ମାମଲା ଶୁଣାଣି କରୁଥିବା ୫ ଜଣିଆ ପୀଠର ଅନ୍ୟ ବିଚାରପତିଙ୍କୁ ସ୍ବତନ୍ତ୍ର ସୁରକ୍ଷା ଗୃହ ମନ୍ତ୍ରଣାଳୟ ଦ୍ବାରା ପ୍ରଦାନ କରାଯାଇଛି।
ସୁରକ୍ଷା ଦୃଷ୍ଟିରୁ ଉତର ପ୍ରଦେଶ, ଜାମ୍ମୁ କାଶ୍ମୀର, ଦିଲ୍ଲୀ, ମଧ୍ୟପ୍ରଦେଶ ଓ କର୍ଣ୍ଣାଟକରେ ମଙ୍ଗଳବାର ଯାଏ ସ୍କୁଲ ଓ କଲେଜ ବନ୍ଦ ରଖାଯାଇଛି । ଏପଟେ ଐତିହାସିକ ଅଯୋଧ୍ୟା ମାମଲାର ରାୟ ଆସିବା ପୂର୍ବରୁ ଟୁଇଟ୍ କରି ଶାନ୍ତି ବଜାୟ ରଖିବାକୁ ଆହ୍ୱାନ ଦେଇଛନ୍ତି ପ୍ରଧାନମନ୍ତ୍ରୀ । ତିନିଟି ଟୁଇଟରେ ସେ ଲେଖିଛନ୍ତି ଯେ, ଅଯୋଧ୍ୟା ଉପରେ ସୁପ୍ରିମକୋର୍ଟଙ୍କ ଯେଉଁ ନିଷ୍ପତି ଆସିବ ତାହା କାହାର ବିଜୟ କିମ୍ବା ପରାଜୟ ହେବ ନାହିଁ । ଏହି ନିଷ୍ପତି ଭାରତର ଶାନ୍ତି, ଏକତା ଓ ସଦଭାବନାର ମହାନ ପରମ୍ପରାକୁ ଯେଭଳି ଅଧିକ ମଜଭୁତ କରିବ ସେଥିପ୍ରତି ପ୍ରାଥମିକତା ଦେବାକୁ ମୁଁ ଦେଶବାସୀଙ୍କୁ ଅନୁରୋଧ କରୁଛି ।
अयोध्या पर सुप्रीम कोर्ट का जो भी फैसला आएगा, वो किसी की हार-जीत नहीं होगा। देशवासियों से मेरी अपील है कि हम सब की यह प्राथमिकता रहे कि ये फैसला भारत की शांति, एकता और सद्भावना की महान परंपरा को और बल दे।
— Narendra Modi (@narendramodi) November 8, 2019
ଦେଶର ନ୍ୟାୟପାଳିକାର ମାନ ସମ୍ମାନକୁ ଶୀର୍ଷରେ ରଖି ସମାଜର ସମସ୍ତ ପକ୍ଷ, ସାମାଜିକ ଓ ସାଂସ୍କୃତିକ ସଂଗଠନ ଗୁଡିକ ଯେଭଳି ସୌହାଦ୍ଦ୍ୟପୂଣ୍ଣ ଓ ସକାରାତ୍ମକ ବାତାବରଣ ସୃଷ୍ଟି କରିବା ଲାଗି ପ୍ରୟାସ କରିଛନ୍ତି, ତାହା ଅତ୍ୟନ୍ତ ସ୍ୱାଗତ ଯୋଗ୍ୟ । କୋର୍ଟଙ୍କ ନିଷ୍ପତି ପରେ ମଧ୍ୟ ଆମକୁ ସେହିଭଳି ସୌହାର୍ଦ୍ଦ୍ୟପୂଣ୍ଣ ବାତାବରଣ ବଜାୟ ରଖିବାକୁ ହେବ ।
