ନୂଆଦିଲ୍ଲୀ,ଏଜେନ୍ସି: ଦେଶରେ କରୋନା ସଙ୍କଟକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରାୟ ୨୧ ଲକ୍ଷ କୋଟିର ଏକ ଆର୍ଥିକ ପ୍ୟାକେଜ୍ ଘୋଷଣା କରିଥିଲେ। ଏହି ପ୍ୟାକେଜର ସବିଶେଷ ତଥ୍ୟ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଦେଶବାସୀଙ୍କ ସମ୍ମୁଖରେ ରଖିଥିଲେ। ବର୍ତ୍ତମାନ ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (ଆରବିଆଇ) ଗଭର୍ଣ୍ଣର ଶକ୍ତିକାନ୍ତ ଦାସ ରେପୋ ରେଟ ହାର ହ୍ରାସ କରିବାକୁ ପୁଣି ଘୋଷଣା କରିଛନ୍ତି। ଆରବିଆଇ ଗଭର୍ଣ୍ଣର କହିଛନ୍ତି ଯେ ଗତ ୩ ଦିନ ମଧ୍ୟରେ ଏମପିସି ଘରୋଇ ତଥା ବିଶ୍ୱ ବଜାରର ସମୀକ୍ଷା କରିଛି। ଏହାପରେ ରେପୋ ରେଟ ହାରକୁ ୦.୪୦ ପ୍ରତିଶତ ହ୍ରାସ କରିବାକୁ ଆମେ ନିଷ୍ପତ୍ତି ନେଇଛୁ ବୋଲି କହିଛନ୍ତି।
ଲକଡାଉନରେ ଏହା ଦ୍ୱିତୀୟ ଥର ପାଇଁ ଆରବିଆଇ ରେପୋ ରେଟ ହାରରେ ହ୍ରାସ କରାଯାଇଛି। ଏହା ପୂର୍ବରୁ ମାର୍ଚ୍ଚ ୨୭ରେ ଆରବିଆଇ ଗଭର୍ଣ୍ଣର ୦.୭୫ ପ୍ରତିଶତ ହ୍ରାସ ଘୋଷଣା କରିଥିଲେ। ଏହାପରେ ବ୍ୟାଙ୍କଗୁଡ଼ିକ ଋଣ ଉପରେ ସୁଧ ହାର ହ୍ରାସ କରିଥିଲେ। ଏହା ଲୋକଙ୍କ ଋଣ ମାତ୍ରାକୁ ମଧ୍ୟ ହ୍ରାସ କରିବ। ଲକଡାଉନରେ ଦେଶର ଅର୍ଥନୈତିକ ଗତି ପ୍ରଣାଳୀରେ ହ୍ରାସ ଘଟିଛି। ମୁଖ୍ୟତଃ ୬ଟି ବୃହତ ଶିଳ୍ପ ରାଜ୍ୟ ବର୍ତ୍ତମାନ ରେଡ ଜୋନ୍ ରହିଛି। ମାର୍ଚ୍ଚରେ ପୁଞ୍ଜି ସାମଗ୍ରୀ ଉତ୍ପାଦନ ୩୬% ହ୍ରାସ ପାଇଛି। ଉପଭୋକ୍ତା ସ୍ଥାୟୀ ଉତ୍ପାଦନରେ ମଧ୍ୟ ୩୩% ହ୍ରାସ ହୋଇଛି। ମାର୍ଚ୍ଚରେ ଶିଳ୍ପ ଉତ୍ପାଦନରେ ୧୭ ପ୍ରତିଶତ ହ୍ରାସ ଓ ଖରିଫ ବୁଣିବା ୪୪% ବୃଦ୍ଧି ପାଇଛି।
ଏପ୍ରିଲରେ ଖାଦ୍ୟ ମୁଦ୍ରାସ୍ଫୀତି ପୁଣି ୮.୬ ପ୍ରତିଶତକୁ ବୃଦ୍ଧି ପାଇଛି। ଡାଲିର ମୁଦ୍ରାସ୍ଫୀତି ଆସନ୍ତା ମାସରେ ବିଶେଷ ଚିନ୍ତାର କାରଣ ହେବ ବୋଲି ସେ କହିଛନ୍ତି। ଆର୍ଥିକ ବର୍ଷରେ ଦେଶର ଜିଡିପି ଅଭିବୃଦ୍ଧି ନେଗେଟିଭ୍ ହେବ ବୋଲି ଆକଳନ କରାଯାଇଥିବା ଆରବିଆଇ ଗଭର୍ଣ୍ଣର କହିଛନ୍ତି।
