ଡାହାଣୀ ଭୟରେ ଗାଁ ବାହାରେ ଗୁଣ୍ଡରାବାଡ଼ି ବାସୀ, ବିବାହ କଲେ ରକ୍ତବାନ୍ତିରେ ହେଉଛି ମୃତ୍ୟୁ
ନୟାଗଡ଼,ଏନ୍ଏନ୍ଏସ୍: ବିଜ୍ଞାନକୁ ନେଇ କାହିଁ କେତେ ଆଗରେ ପହଞ୍ଚିଥିବା ଆମ ଦେଶରେ ଏବେ ବି ଅନ୍ଧବିଶ୍ୱାସର ଶିକାର ହେଉଛନ୍ତି ଲୋକେ। ବିବାହ କରିବା ପରେ ଯୁବକଙ୍କ ରକ୍ତବାନ୍ତିରେ ମୃତ୍ୟୁ ଘଟୁଥିବା କାରଣ ପାଇଁ ଗାଁ ଛାଡ଼ି ଦେଇଛନ୍ତି ଗୁଣ୍ଡରାବାଡ଼ି ଗ୍ରାମବାସୀ। ସୂଚନାନୁସାରେ, ରଣପୁର ବ୍ଲକ ଗୁଣ୍ଡରାବାଡ଼ି ଗାଁରେ ରହଛି ସମସ୍ତ ପ୍ରକାର ସୁବିଧା। ଲୋକଙ୍କୁ ମିଳିଛି ଇନ୍ଦିରା ଆବସ, ପିଇବା ପାଣି ପାଇଁ ରହିଛି ଟ୍ୟୁବ୍ ୱେଲ୍, ଗାଁ ରାସ୍ତା ମଧ୍ୟ ଚକାଚକ୍। ଏଥି ସହିତ ଗାଁକୁ ବିଜୁଳି ସଂଯୋଗ ମଧ୍ୟ ରହିଛି। ଦର୍ପନାରାୟଣପୁର ସୁନାଖଳା ରାସ୍ତାରୁ ଅଳ୍ପକେଇ ଦୂରରେ ରହିଥିବା ଏହି ଗାଁରେ କାହିଁ କେଉଁ କାଳରୁ ଲୋକେ ବାସ କରୁଥିଲେ। ମାତ୍ର ଗ୍ରାମବାସୀ ଏବେ ସେମାନଙ୍କ ଗାଁର ଭିଟାମାଟି ଛାଡ଼ି ଅନ୍ୟତ୍ର ଆଶ୍ରୟ ନେଇଛନ୍ତି।
୨୦୧୫-୧୬ ମସିହାରେ ମିଳିଥିବା ଇନ୍ଦିରା ଆବସ ଘରର ଦୁଆର ଛରକା ମଧ୍ୟ ଗାଁ ଲୋକେ ତାଡ଼ି ନେଇଛନ୍ତି। ଫାଙ୍କା ପଡ଼ିଥିବା ଘର ଗୁଡ଼ିକରେ ଝୁଲୁଛି ମନ୍ତ୍ରତନ୍ତ୍ରର ବୁଜୁଳି। ଏହି ଗ୍ରାମବାସୀ ଗାଁ ଛାଡ଼ି ବାହାରେ ରହିବାର କାରଣ ପାଲଟିଛି ଡାହାଣୀର ଭୟ। ଅନେକ ଦିନ ହେବ ଗାଁରେ ଡାହାଣୀର ଭୟ ସୃଷ୍ଟି ହୋଇଛି। ଗ୍ରାମବାସୀଙ୍କ କହିବା ଅନୁସାରେ, ଗାଁରେ ବିବାହ କରୁଥିବା ଯୁବକମାନେ କିଛିଦିନ ମଧ୍ୟରେ ରକ୍ତବାନ୍ତିରେ ମୃତ୍ୟୁ ବରଣ କରୁଛନ୍ତି।
