ଢ଼େଙ୍କାନାଳ,ଏନ୍ଏନ୍ଏସ୍: ଢ଼େଙ୍କାନାଳ ଜିଲ୍ଲା ସଦର ଥାନା ଅନ୍ତର୍ଗତ ତାଳବରକୋଟ ଗାଁରେ ଗତକାଲି ଜଣେ ବୃଦ୍ଧାଙ୍କ ଘରୁ ଡକାୟତି ବେଳେ ଧରାପଡ଼ିଲେ ଜଣେ ଯୁବକ। ଗାଁ ଲୋକେ ଉକ୍ତ ଯୁବକକୁ କାବୁ କରି ପୁଲିସରେ ଜିମା ଦେଇଥିବା ଜଣାପଡ଼ିଛି।
ସୂଚନା ଅନୁସାରେ ତାଳବରକୋଟ ଗାଁ’ର ଉର୍ମିଳା ବିଶ୍ୱାଳ ନାମକ ଜଣେ ବୟସ୍କ ମହିଳା ଘରେ ଏକୁଟିଆ ରହୁଥିଲେ। ଏହାର ସୁଯୋଗ ନେଇ ଗତକାଲି ୪ ଡକାୟତ ଘରେ ପଶିଥିଲେ। ଏହି ସମୟରେ ମହିଳା ଜଣଙ୍କ ଜ୍ୱାଇଁଙ୍କ ସହିତ ଫୋନରେ କଥା ହେଉଥିଲେ। ଫୋନରେ ଶାଶୂଙ୍କ ଚିତ୍କାର ଶୁଣି ଜ୍ୱାଇଁ ଗାଁର ଅନ୍ୟ ଲୋକଙ୍କୁ ଫୋନ ଯୋଗେ ସୂଚନା ଦେଇଥିଲେ। ଏହାପରେ ଗାଁର କିଛି ଲୋକ ଏକାଠି ହୋଇ ମହିଳାଙ୍କ ଘରକୁ ଯାଇ ଜଣେ ଡକାୟତକୁ କାବୁ କରିଥିଲେ।
ସେହିପରି ଅନ୍ୟ ୩ ଡକାୟତ ଖସି ପଳାଇବାରେ ସକ୍ଷମ ହୋଇଛନ୍ତି। ପରେ ସଦର ଥାନା ପୁଲିସ ଘଟଣାସ୍ଥଳରେ ପହଞ୍ଚିବା ପରେ ଉକ୍ତ ଡକାୟତକୁ ଗାଁ ଲୋକେ ପୁଲିସକୁ ଜିମା ଦେଇଥିଲେ। ସେହିପରି ମହିଳାଙ୍କ କିଛି ସୁନା ଟଙ୍କା ଲୁଟ ହୋଇଥିବା ଅଭିଯୋଗ ହୋଇଛି।
