କାର ଦୁର୍ଘଟଣାରେ ୨ ଯୁବକ ମୃତ

ଦେବଗଡ଼,ଏନ୍ଏନ୍ଏସ୍: ଦେବଗଡ଼ ଥାନା ଅନ୍ତର୍ଗତ ଆମ୍ବପାଳ ଗ୍ରାମ ରାଞ୍ଚି- ବିଜୟୱାଡା ଜାତୀୟ ରାଜପଥରେ ଏକ କାର ଦୁର୍ଘଟଣାଗ୍ରସ୍ତ ହୋଇ ୨ ଯୁବକଙ୍କ ମୃତ୍ୟୁ ଘଟିଛି।
ସୂଚନା ଅନୁସାରେ ଦେବଗଡ଼ପୌରାଞ୍ଚଳର ରାକେଶ ପାଣିଙ୍କ ସ୍ୱିଫ୍ଟ ଡିଜାୟାର କାରକୁ ବୁଢ଼ିବିଲ ଗ୍ରାମର ସଞ୍ଜୟ ନାୟକ (୨୨) ନିଜ ଘରକୁ ଯିବାକୁ କହି କାର ନେଇ ଦେବଗଡ଼ରୁ ବୁଢ଼ିବିଲ ବାହାରି ଥିଲେ। ତେବେ ଚାଳକ ସଞ୍ଜୟ କାର ନେଇ ନିଜ ଘରକୁ ଯିବା ପରିବର୍ତ୍ତେ  ନିକ୍ତିମାଲ ଗ୍ରାମର ଦେବାନନ୍ଦ ବେହେରା (୧୯)ଙ୍କ ସହ କୌଣସି କାମରେ ଖିଲେଇ ଗ୍ରାମ ପଟକୁ ଯାଇଥିଲେ।

ରାତି ପ୍ରାୟ ୧୧ଟା ସମୟରେ ସଞ୍ଜୟ ଘରକୁ ଫେରୁଥିବା ବେଳେ ଆମ୍ବପାଳ ପୋଲ ନିକଟରେ ଗାଡି ଭାରସାମ୍ୟ ହରାଇ ପୋଲ ନିକଟରେ ଦୁର୍ଘଟଣା ଗସ୍ତ  ହୋଇଥିଲା। ଦୁର୍ଘଟଣାରେ ଗାଡିଟି ସମ୍ପୂର୍ଣ୍ଣ ଭାଙ୍ଗି ଯାଇଥିବାବେଳେ ଗାଡ଼ିରେ ଥିବା ସଞ୍ଜୟ ଓ ଦେବାନନ୍ଦ ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକେ ଉଭୟଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ନିକଟସ୍ଥ ଦେବଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ।

ମାତ୍ର ସେଠାରେ ଡାକ୍ତର ଦେବାନନ୍ଦଙ୍କୁ ମୃତ ଘୋଷଣା କରିଥିଲେ। ପରେ ସଞ୍ଜୟଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିବା ଜଣାପଡ଼ିଛି। ସୂଚନା ପାଇ ଦେବଗଡ଼ ଥାନା ପୁଲିସ ଦୁର୍ଘଟଣା ଗସ୍ତ କାର  ଓ ମୃତ ଦେହକୁ ଜବତ କରି ଘଟଣାର ତଦନ୍ତ ଆରମ୍ଭ କରିଛି।