ପାଟନା,ଏଜେନ୍ସି: ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଆଜି ତାଙ୍କ କ୍ୟାବିନେଟକୁ ସମ୍ପ୍ରସାରଣ କରିବାକୁ ଯାଉଛନ୍ତି। ବିହାର ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏହି ସୂଚନା ଦିଆଯାଇଛି। କୁହାଯାଉଛି ଯେ ଆଜି କ୍ୟାବିନେଟର ସମ୍ପ୍ରସାରଣରେ ୯ ଜଣ ବିଜେପି ନେତା ଏବଂ ୮ ଜେଡିୟୁ ନେତା ମନ୍ତ୍ରୀ ପଦ ପାଇଁ ଶପଥ ଗ୍ରହଣ କରିବେ।
ଏହି ସମ୍ପ୍ରସାରଣ ପୂର୍ବରୁ କେନ୍ଦ୍ର ମନ୍ତ୍ରୀ ଥିବା ଶାହନାୱାଜ ହୁସେନ୍ ବିହାରରେ ମନ୍ତ୍ରୀ ଭାବରେ ଶପଥ ଗ୍ରହଣ କରିବେ। ଏହି କ୍ୟାବିନେଟ୍ ବିସ୍ତାରରେ ବିକାଶୀଳ ଇନ୍ସାନ୍ ପାର୍ଟିର ମୁକେଶ ସାହନିଙ୍କ ନାମ ମଧ୍ୟ ସାମିଲ ଅଛି। ବିହାରରେ ବର୍ତ୍ତମାନ ୨୪୩ ଜଣ ବିଧାୟକଙ୍କ ସଦନରେ ମୁଖ୍ୟମନ୍ତ୍ରୀଙ୍କ ସମେତ ୧୫ ଜଣ ମନ୍ତ୍ରୀ ଅଛନ୍ତି। ବିହାର କ୍ୟାବିନେଟରେ ୩୬ ଜଣ ମନ୍ତ୍ରୀ ରହିପାରିବେ।
ଆଜିର ବିହାର କ୍ୟାବିନେଟ ସମ୍ପ୍ରସାରଣରେ ବିଜେପିର ଶାହନାୱାଜ ହୁସେନ୍, ପୂର୍ବତନ ସାଂସଦ ଜନକ ଚାମର, ସୁବାସ ସିଂ, ନୀତିନ ନବୀନ, କୃଷ୍ଣ କୁମାର ଋଷି, ସଞ୍ଜୟ ସର୍ବଗୀ, ନୀରଜ ବବଲୁ, ପ୍ରମୋଦ କୁମାର ଏବଂ ଭାଗୀରଥି ଦେବୀଙ୍କ ନାମ ସାମିଲ ଅଛି। ଅନ୍ୟପକ୍ଷରେ ଜେଡିୟୁ ଦଳରୁ ଶ୍ରବଣ କୁମାର, ଲେସି ସିଂ, ସଞ୍ଜୟ ଝା, ସୁନୀଲ କୁମାର ଏବଂ ଜାମା ଖାନଙ୍କ ନାମ ଚର୍ଚ୍ଚାରେ ରହିଛି। ଜାମା ଖାନ ନିକଟରେ ବିଏସପିରୁ ଜେଡିୟୁରେ ଯୋଗ ଦେଇଥିଲେ।
