ମୁନିଗୁଡା,ଏନ୍ଏନ୍ଏସ୍: ରାୟଗଡା ଜିଲ୍ଲା ମୁନିଗୁଡା ସଦର ମହକୁମାରେ ଥିବା ସୁଣ୍ଡିସାହି ଗୁଡ଼ିଆ ବନ୍ଧରେ ଜଣେ ଯୁବକ ଶୌଚ ହେଉଥିବା ବେଳେ ତା’ଉପରେ ମାଟି ଅତଡା ଖସି ପଡ଼ିବାରୁ ଘଟଣାସ୍ଥଳରେ ତା’ର ମୃତ୍ୟୁ ହୋଇଥିବା ଜଣାପଡ଼ିଛି। ସୂଚନା ଅନୁଯାୟୀ ସୁଣ୍ଡି ସାହିର ଦେବରାଜ ବେହେରାଙ୍କ ପୁଅ ମୁକେଶ ବେହେରା(୨୦) ସକାଳୁ ଶୌଚ ପାଇଁ ପ୍ରତିଦିନ ଭଳି ଆଜି ହାଇସ୍କୁଲ ପଛପଟେ ଥିବା ଗୁଡ଼ିଆ ବନ୍ଧକୁ ଯାଇଥିଲା।
ପୋଖରୀ ମଧ୍ୟରେ ପଶି ଶୌଚ ହେଉଥିବା ବେଳେ ପୋଖରୀର ୧୦ଫୁଟ ଉଚ୍ଚର ବନ୍ଧଟି ହଠାତ ତା ଉପରକୁ ଖସି ପଡ଼ିଥିଲା। ଦୁଇ ଦିନ ପୂର୍ବରୁ ବର୍ଷା ହୋଇଥିବା କାରଣରୁ ବନ୍ଧ ତଳେ ପାଣି ଜମି ବନ୍ଧ ଭିଜିକରି ଥିଲା। ସେଠାରେ ମାଟି ଅତଡା ମୁକେଶ ଉପରେ ଗଦା ହୋଇ ପଡିଥିଲା। ଫଳରେ ସେ ମାଟି ଜରେ ପୋତି ହୋଇଯାଇଥିଲା। ଫଳରେ ମୁକେଶର ଅଣନିଶ୍ୱାସୀ ହୋଇ ମୃତ୍ୟୁ ଘଟିଛି।
ଏହି ସମୟରେ ପୋଖରୀରେ ଶୌଚ ଓ ସ୍ନାନ କରୁଥିବା ଅନ୍ୟ ବ୍ୟକ୍ତିମାନେ ତୁରନ୍ତ ଉଧାର କରିବା ସହ ମୁକେଶର ଘରକୁ ଖବର ଦେଇଥିଲେ। ପରେ ଆଖପାଖ ପଡୋଶୀ ଲୋକ ରୁଣ୍ଡ ହୋଇ ମୁକେଶକୁ ଉଦ୍ଧାର କରିବାକୁ ଚେଷ୍ଟା କରିଥିଲେ ହେଁ ମର ଶରୀର ହିଁ ଉଦ୍ଧାର ହୋଇଥିଲା। ପରେ ମୁନିଗୁଡା ପୁଲିସ ଖବରପାଇ ଘଟଣା ସ୍ଥଳରେ ପହଞ୍ଚି ଥିଲେ। ଶବ ବ୍ୟବଚ୍ଛେଦ ପାଇଁ ମୁକେଶର ମର ଶରୀରକୁ ମୁନିଗୁଡା ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରକୁ ପଠାଯାଇଛି।
