ଝାରସୁଗୁଡ଼ା,ଏନ୍ଏନ୍ଏସ୍: ଝାରସୁଗୁଡ଼ା ଜିଲ୍ଲା ବିଟିଏମ ଫାଣ୍ଡି ଅଞ୍ଚଳରୁ ଜଣେ ନାବାଳିକାକୁ ଅପହରଣ ଓ ଦୁଷ୍କର୍ମ ମାମଲାରେ ପୁଲିସ ୨ ଜଣଙ୍କୁ ଗିରଫ କରିଛି। ଏନେଇ ଜିଲ୍ଲା ଆରକ୍ଷୀ ଅଧିକାରୀ ରାହୁଲ ପିଆର ସୂଚନା ଦେଇଛନ୍ତି। ଗିରଫ ଅଭିଯୁକ୍ତଦ୍ୱୟ ହେଲେ ବୀଣା ଧୁରୁଆ ଓ ବବଲୁ ବାନଛୋର।
ମିଳିଥିବା ରିପୋର୍ଟ ମୁତାବିକ, ଗତ ୨୧ ତାରିଖରେ ବୀଣା ବଜାର ବୁଲିବାକୁ ଯିବା କହି ନାବାଳିକାକୁ ସାଙ୍ଗରେ ନେଇଥିଲା। ହେଲେ ଦୀର୍ଘ ସମୟ ଧରି ସେମାନେ ନ ଫେରିବାରୁ ପରିବାର ଲୋକେ ଥାନାରେ ଅଭିଯୋଗ କରିଥିଲେ। ପୁଲିସ ତଦନ୍ତ କରି ନାବାଳିକାଙ୍କୁ କୁଚିଣ୍ଡା ବ୍ଲକ ମହୁଲପାଲି ଥାନା ଅନ୍ତର୍ଗତ ପରୁଆଭାଡ଼ିରୁ ଉଦ୍ଧାର କରିଥିଲା। ଅଭିଯୁକ୍ତ ନାବାଳିକାଙ୍କୁ ଅପହରଣ କରି ପରୁଆଭାଡ଼ିର ବବଲୁ ଘରେ ଛାଡ଼ି ଦେଇଥିଲା। ବବଲୁ ନାବାଳିକାଙ୍କୁ ୩ ଦିନ ଧରି ଦୁଷ୍କର୍ମ କରି ଆସୁଥିଲା। ମୋବାଇଲ ଲୋକେସନ ଓ କଲ ରେକର୍ଡ ଆଧାରରେ ପୁଲିସ ଉଭୟ ଅଭିଯୁକ୍ତକୁ ଗିରଫ କରିବାରେ ସକ୍ଷମ ହୋଇଥିଲା। ଏହି ଘଟଣାରେ ଆଉ କେଉଁମାନେ ସମ୍ପୃକ୍ତ ଅଛନ୍ତି ସେନେଇ ପୁଲିସ ତଦନ୍ତ କରୁଥିବା ଜିଲ୍ଲା ଆରକ୍ଷୀ ଅଧିକାରୀ ଶ୍ରୀ ପିଆର ସୂଚନା ଦେଇଛନ୍ତି।
