ଅନ୍ଧ ବିଶ୍ୱାସ: ଚିକିତ୍ସା ନାମରେ ମହିଳାଙ୍କୁ ଘୁଷୁରୀ ମଳ ଖୁଆଇଲେ ଗୁଣିଆ

ମାଲକାନଗିରି,ଏନ୍ଏନ୍ଏସ୍: ବିଜ୍ଞାନ ଯେତେ ଆଗେଇଲେ ମଧ୍ୟ ଅଧ୍ୟୁଷିତ ଅଞ୍ଚଳର କିଛିଲୋକ ଏବେବି ଅନ୍ଧବିଶ୍ୱାସରୁ ବାହାରି ପାରିନାହାଁନ୍ତି। ଫଳରେ କେତେବେଳେ କାହାର ଜୀବନ ଯାଉଛି ତ ଆଉ କେତେବେଳେ ବିପଦରେ ପଡୁଛି ଜୀବନ। ଏମିତି ଏକ ଘଟଣା ଆଜି ମାଲକାନଗିରି ଜିଲ୍ଲାରେ ଦେଖିବାକୁ ମିଳିଛି। ଜଣେ ରୋଗାଗ୍ରସ୍ତ ମହିଳାଙ୍କୁ ଡାକ୍ତରଖାନା ନେବା ପରିବର୍ତ୍ତେ ଗୁଣିଆ ଦ୍ୱାରା ଝଡାଫୁଙ୍କା ଚିକିତ୍ସା କରାଯାଉଥିଲା। ଗୁଣିଆ ଜଣକ ମହିଳାଙ୍କ ରୋଗ ଭଲକରିବା ପାଇଁ ଘୁଷୁରି ମଳ ଖୁଆଇ ଦେଇଥିବା ଘଟଣା ସାମ୍ନାକୁ ଆସିଛି। ସୂଚନା ଅନୁସାରେ, ଜିଲ୍ଲାର ଏମଭି -୬ ଗ୍ରାମର ଲିପିକା ଓରାଉ ନାମକ ଜଣେ ମହିଳା ଦୀର୍ଘଦିନ ଧରି ଅସୁସ୍ଥ ଥିଲେ।

ତାଙ୍କୁ ଜ୍ୱର, ଥଣ୍ଡା, କାଶ ହେବାସହ ବିଭିନ୍ନ ସମୟରେ ଅଚେତ ହୋଇପଡୁଥିଲେ। ତେବେ ତାଙ୍କର ଚିକିତ୍ସା ପାଇଁ ପରିବାର ଲୋକେ ଗୁଣିଆ ପାଖକୁ ନେଇଥିଲେ। ଗୁଣିଆ ଜଣକ ମହିଳାଙ୍କଦେହରୁ ଭୂତ ଛଡାଇବା ପାଇଁ ନିସ୍ତୁକ ମାଡ ମାରିବା ସହ ଘୁଷୁୁରୀ ମଳ ମଧ୍ୟ ଖୁଆଇଥିଲେ। ଖବରପାଇ ସ୍ଥାନୀୟ ଆଶା ଓ ଅଙ୍ଗନବାଡ଼ି କର୍ମୀ ମହିଳାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ମାଲକାନଗିରି ଜିଲ୍ଲା ସଦର ମହକୁମା ଚିକିତ୍ସାଳୟରେ ଭର୍ତ୍ତି କରିଛନ୍ତି। ଅନ୍ୟପକ୍ଷରେ ସମ୍ପୃକ୍ତ ଗୁଣିଆ ଜଣକ ଫେରାର ହୋଇଯାଇଥିବା ସ୍ଥାନୀୟ ଲୋକେ କହିଛନ୍ତି।