ମାଲକାନଗିରି,ଏନ୍ଏନ୍ଏସ୍: ଆସନ୍ତା ଏପ୍ରିଲ ୨୬ରେ ମାଓବାଦୀ ଭାରତ ବନ୍ଦ ନେଇ ଡାକରା ଦେଇଛନ୍ତି। ସିପିଆଇ-ମାଓବାଦୀ ଏବଂ ଆନ୍ଧ୍ର ଓଡ଼ିଶା ସୀମା ସ୍ୱତନ୍ତ୍ର ଜୋନାଲ କମିଟି ଛତିଶଗଡରେ ପ୍ରହାର-୩ ମାଓବାଦୀ ବିପ୍ଳବୀ ଆନ୍ଦୋଳନକୁ ନେଇ କେନ୍ଦ୍ର ଓ ରାଜ୍ୟ ସରକାରଙ୍କ ଦ୍ୱାରା ଆଦିବାସୀଙ୍କୁ ଗିରଫ କରିବା ବିରୋଧରେ ଦେଶବ୍ୟାପୀ ବନ୍ଦ ପାଇଁ ଆହ୍ଵାନ ଦେଇଛନ୍ତି।
ଆନ୍ଧ୍ର ଓଡିଶା ବର୍ଡର ଡିଭିଜନର ମୁଖପାତ୍ର କୈଳାସମ ଏକ ବିବୃତ୍ତିରେ ଆହ୍ୱାନ କରିଛନ୍ତି। କେନ୍ଦ୍ରରେ ବିଜେପି, ଆନ୍ଧ୍ରରେ ଜଗନ୍ ଏବଂ ଓଡ଼ିଶାର ନବୀନ ପଟ୍ଟନାୟକ ସରକାର ମାଓବାଦୀ ଆନ୍ଦୋଳନକୁ ସମ୍ପୂର୍ଣ୍ଣ ରୂପେ ହଟାଇବା ଲକ୍ଷ୍ୟରେ ସାରା ଦେଶରେ ବିପ୍ଳବ ଉପରେ ଆକ୍ରମଣ ଜାରି ରଖିଛନ୍ତି ବୋଲି କୈଳାସମ ଦୁଃଖ ପ୍ରକାଶ କରିଛନ୍ତି। ନିକଟରେ ବିଚ୍ଛିନ୍ନ ଅଞ୍ଚଳରେ ପୁଲିସ କ୍ୟାମ୍ପ ସ୍ଥାପନ କରିଛି ଏବଂ ଆଉ କିଛି ଶିବିର ପାଇଁ ପ୍ରସ୍ତୁତି ଚାଲିଛି। ଏହି ସମୟରେ ତୋଟାଗୁଡା ଏବଂ ସେଲାରାମରେ ଗୁଳି ବିନିମୟରେ ୩ ଜଣ ମାଓବାଦୀଙ୍କ ମୃତ୍ୟୁ ଘଟିଥିବା ବେଳେ ଜଣେ କୃଷକଙ୍କ ମୃତ୍ୟୁ ଘଟିଛି।
ମୁଦୁଲିଗୁଡାରେ ଜଣେ ଆଦିବାସୀ ମହିଳାଙ୍କୁ ଦୁଷ୍କର୍ମ କରିଥିବା ଅଭିଯୋଗ ମଧ୍ୟ ହୋଇଛି। କୁମ୍ବିଂ ଅପରେସନ କରିବା ବାହାନାରେ ପୁଲିସ ଆଦିବାସୀମାନଙ୍କୁ ମାଡ ମାରିବା ସହ ନିର୍ଯାତନା ଦେଉଛି। ଆନ୍ଧ୍ର ଓଡିଶା ସୀମାରେ ଚାଲିଥିବା ବନ୍ଦୋବସ୍ତ ବିରୋଧରେ ରାଲି ଏବଂ ଧର୍ମ ମାଧ୍ୟମରେ ଆଦିବାସୀମାନେ ଗଣମାଧ୍ୟମ ସମ୍ମୁଖରେ ବାରମ୍ବାର ନିଜର ଉଦବେଗ ପ୍ରକାଶ କରିଛନ୍ତି ବୋଲି ସେ କହିଛନ୍ତି। ଏଥିସହିତ ମାଓବାଦୀଙ୍କ ଉପରେ ହେଉଥିବା ଅତ୍ୟାଚାର ବିରୋଧରେ ମାଓନେତାମାନେ ଆସନ୍ତା ୨୬ ତାରିଖରେ ଭାରତ ବନ୍ଦ ଡାକରା ଦେଇଛନ୍ତି।
