ଭାରତ ଓ ବାଂଲାଦେଶର ପ୍ରଥମ ଦିବାରାତ୍ରି ଟେଷ୍ଟ ମ୍ୟାଚ୍ ଆରମ୍ଭ

କୋଲକତା,ଏଜେନ୍ସି: କୋଲକତାର ଇଡେନ ଗାଡେନ୍ସରେ ଶୁକ୍ରବାର ଦିବା ରାତ୍ରି ଟେଷ୍ଟ ମ୍ୟାଚ୍ ଆରମ୍ଭ ହୋଇଯାଇଛି। ଏହି ମ୍ୟାଚକୁ ବାଂଲାଦେଶର ପ୍ରଧାନମନ୍ତ୍ରୀ ଶେଖ ହସୀନା, କୋଲକାତାର ମୁଖ୍ୟମନ୍ତ୍ରୀ ମମତା ବାନାର୍ଜୀ ପହଞ୍ଚି ଉଦଘାଟନ କରିବା ସହ ଖେଳାଳୀମାନଙ୍କୁ ଭେଟିଥିଲେ। ଏହି ପରିପ୍ରେକ୍ଷୀରେ ଭାରତ ଓ ବାଂଲାଦେଶ ମଧ୍ୟରେ ଚାଲିଥିବା ଐତିହାସିକ ପିଙ୍କ୍‌ ବଲ ମ୍ୟାଚରେ ବାଂଲାଦେଶ ଦଳର ବ୍ୟାଟିଂ ବିପର୍ୟ୍ୟୟ ହୋଇଛି ।

ମଧ୍ୟାହ୍ନ ଭୋଜନ ବିରତି ସୁଦ୍ଧା ମାତ୍ର ୨୩ ଓଭର ବୋଲିଂ ହୋଇଥିବାବେଳେ ବାଂଲାଦେଶ ୭୩ ରନ୍ କରି ୬ଟି ଓ୍ଵିକେଟ ହରାଇଛି । ଦଳର ୩ ଜଣ ବ୍ୟାଟ୍ସମ୍ୟାନ ମୋଇନୁଲ ହକ, ମହମ୍ମଦ ମିଥୁନ ଓ ମୁସ୍ତାଫିକୁର ରହିମ ଶୂନ୍ୟରେ ଆଉଟ ହୋଇଛନ୍ତି । ସେହିପରି ଅନ୍ୟ ଦୁଇ ବ୍ୟାଟ୍ସମ୍ୟାନ ଇମରୁଲ କେୟସ ଓ ମହମ୍ମଦୁଲ୍ଲା ୪ ଓ ୬ ରନ କରି ଆଉଟ ହୋଇଥିବା ବେଳେ ସଦମାନ ଇସଲାମ ୨୯ ରନ କରି ଆଉଟ ହୋଇଛନ୍ତି। ସେହିପରି ଫିଲ୍ଡରେ ଲିଟନ ଦାସ ୨୪ରନ କରି ଅପରାଜିତ ଅଛନ୍ତି ।

ଭାରତ ପକ୍ଷରୁ ଉମେଶ ଯାଦବ ୩ଟି, ଇଶାନ୍ତ ଶର୍ମା ୨ଟି ଓ ମହମ୍ମଦ ସାମି ଗୋଟିଏ ଓ୍ଵିକେଟ ହାସଲ କରିଛନ୍ତି । ତେବେ ଆଜି ଭାରତୀୟ ଦଳ ନିଜର ପ୍ରଥମ ଦିବାରାତ୍ର ଟେଷ୍ଟ ମ୍ୟାଚ ଖେଳୁଥିବା ବେଳେ ଏହା ପିଙ୍କ ବଲରେ ଖେଳାଯାଉଛି। ତେବେ ଏହି ମ୍ୟାଚକୁ ସ୍ମରଣୀୟ କରିବା ପାଇଁ କୋଲକତାର ପ୍ରମୁଖ ଲ୍ୟାଣ୍ଡମାର୍କ ଓ ପ୍ରତିଷ୍ଠାନଗୁଡ଼ିକୁ ଗୋଲାପୀ ରଙ୍ଗ ଦିଆଯାଇଛି ।