ଅନୁଗୁଳ,ଏନ୍ଏନ୍ଏସ୍: ଅନୁଗୁଳ ଜିଲ୍ଲା ଛେଣ୍ତିପଦା ଥାନା ପୁରୁଣାଗଡ଼ ଗ୍ରାମରେ ଶନିବାର ବିଳମ୍ବିତ ରାତ୍ରିରେ କେତେକ ଦୁର୍ବୃତ୍ତ ଘରେ ପଶି ବନ୍ଧୁକ ଦେଖାଇ ଲୁଟ କରିଥିବା ଜଣାପଡ଼ିଛି। ଲକ୍ଷ୍ୟାଧିକ ଟଙ୍କାର ସୁନାଗହଣା ଲୁଟ ହୋଇଥିବା ଅଭିଯୋଗ ହୋଇଛି। ଘଟଣାରୁ ପ୍ରକାଶ ଯେ, ପୁରୁଣାଗଡ ଗ୍ରାମର ପତିତପାବନ ମହାପାତ୍ରଙ୍କ ଘରେ ୫ରୁ ୬ଜଣ ଦୁର୍ବୁତ୍ତ ଏକ ଚାରିଚକିଆ ଗାଡ଼ିରେ ଆସି ଘରେ ପଶି ପରିବାରର ସମସ୍ତଙ୍କୁ ଛୁରି, ଖଣ୍ଡା ସହ ବନ୍ଧୁକ ଦେଖାଇଥିଲେ। ଫଳରେ ଘରେ ଥିବା ସୁନା ଗହଣା, ଟଙ୍କା ଆଦି ନେଇ ପଳେଇଯାଇଥିଲେ।
ଅନ୍ୟ ପକ୍ଷରେ ପତିତପାବନ ଆହତ ହୋଇଥିଲେ। ଯାହା ଫଳରେ ତାଙ୍କୁ ଛେଣ୍ତିପଦା ମେଡିକାଲରେ ଭର୍ତ୍ତି କରାଯାଇଛି। ତେବେ ମାର୍ଚ୍ଚ ୨୪ତାରିଖ ଦିନ ପତିତପାବନଙ୍କ ଝିଅର ବାହାଘର ହେବାକୁ ଥିବାରୁ ପରିବାର ପକ୍ଷରୁ ସମସ୍ତ ପ୍ରସ୍ତୁତି କରାଯାଉଥିବା ଜଣାପଡିଛି। ଫଳରେ ଦୁର୍ବୁତ୍ତ ମାନେ ୯ ଭରି ସୁନା ସହ ୧ଲକ୍ଷ୍ୟ ୨୦ ହଜାର ଅଧିକ ଟଙ୍କା ଲୁଟୁକରିନେଇଥିବା ପରିବାର ପକ୍ଷରୁ ଅଭିଯୋଗ ଆସିଛି। ଖବରପାଇ ଛେଣ୍ତିପଦା ପୋଲିସ ପହଞ୍ଚି ଘଟଣାର ଛାନଭିନ୍ ଆରମ୍ଭ କରିଛି।
