ଟ୍ରକ ତଳେ ଶୋଇବା ହେଲା କାଳ, ଦୁର୍ଘଟଣାରେ ଚକା ତଳେ ଚାପି ହୋଇଗଲେ ଡ୍ରାଇଭର

ଟାଙ୍ଗୀ,ଏନ୍ଏନ୍ଏସ୍: ଟାଙ୍ଗୀ ଥାନା ଅନ୍ତର୍ଗତ ଗରୁଡଗାଁ ପଞ୍ଚାୟତ ବିଶ୍ୱାଳ ଫାଣ୍ଡି ନିକଟସ୍ଥ ଓସିଏଲ ସିମେଣ୍ଟ କାରଖାନା ପାଖରେ ଆଜି ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି। ସିମେଣ୍ଟ ମିକ୍ସଚର ଟ୍ରକକୁ ଅନ୍ୟ ଏକ ଟ୍ରକ ପଛରୁ ଧକ୍କା ଦେବାରୁ ଚକା ତଳେ ଶୋଇଥିବା ଡ୍ରାଇଭର ଚାପି ହୋଇ ମୃତ୍ୟୁ ହୋଇଥିବା ଜଣାପଡ଼ିଛି। ମୃତକଙ୍କ ନାମ ହେଲା ପ୍ରେମ ରାଓ। ସେ ଝାରଖଣ୍ଡର ଚମ୍ପାରଣ ଜିଲ୍ଲାର ସାତଗତିଆ ଗ୍ରାମର।

ପୁଲିସ ଘଟଣାସ୍ଥଳରେ ପହଞ୍ଚି ଶବକୁ ଜବତ କରିବା ସହିତ ଶବ ବ୍ୟବଚ୍ଛେଦ ପାଇଁ କଟକ ଡାକ୍ତରଖାନାକୁ ପଠାଇ ତଦନ୍ତ ଆରମ୍ଭ କରିଛି। ସାଧାରଣ ଲୋକଙ୍କ ଅଭିଯୋଗ ଅନୁସାରେ କାରଖାନା ସମ୍ମୁଖରେ ବେଆଇନ ପାର୍କିଂ ହେଉଥିବା ଯୋଗୁଁ ଏଭଳି ଘଟଣା ବାରମ୍ବାର ଘଟୁଛି। କିନ୍ତୁ ଏଥିପ୍ରତି କାରଖାନା କର୍ତ୍ତୃପକ୍ଷ କି ପୁଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁ ନଥିବା ଅଭିଯୋଗ ହୋଇଛି।