ମୁନିଗୁଡ଼ା,ଏନ୍ଏନ୍ଏସ୍: ରାୟଗଡ଼ା ଜିଲ୍ଲା ମୁନିଗୁଡ଼ା ସହର ହେଉଛି ଦକ୍ଷିଣ ଓଡ଼ିଶାର ଅନ୍ୟତମ ବ୍ୟସ୍ତବହୁଳ ବ୍ୟବସାୟିକ ପେଣ୍ଠସ୍ଥଳୀ । ଭୌଗଳିକ ଦୃଷ୍ଟିକୋଣରୁ ୨ଟି ରାଜ୍ୟ ରାଜପଥ ମୁନିଗୁଡ଼ା ବାଣିଜ୍ୟିକ ପ୍ରତିଷ୍ଠାନ ଦେଇ ଯା’ଆସ କରିଥାନ୍ତି । କିନ୍ତୁ ଏହି ଗାଡ଼ି ଗୁଡ଼ିକର ପାର୍କିଂ ପାଇଁ କୌଣସି ବ୍ୟବସ୍ଥା ନଥିବାରୁ ଅନେକ ସମୟରେ ଯାନବାହନ ଗୁଡ଼ିକ ରାସ୍ତା ମଧ୍ୟସ୍ଥ ସର୍ବସାଧାରଣ ପାର୍କିଂସ୍ଥଳକୁ ଆବୋରି ନେଇଥାନ୍ତି । ଫଳରେ ବିଭିନ୍ନ ସମୟରେ ମୁନିଗୁଡ଼ା ବଣିକ ସଂଘ, ପ୍ରସ କ୍ଲବ, ବିକାଶ ପରିଷଦ ଓ ଅନ୍ୟାନ୍ୟ ସାମାଜିକ ଅନୁଷ୍ଠାନ ମୁନିଗୁଡ଼ା ବିଡ଼ିଓ, ତହସିଲଦାର,ଏସିଡିପିଓ ଓ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିବାରୁ କିଛିଦିନ ପୂର୍ବେ ସହରରେ ନିର୍ଦ୍ଧାରିତ ସମୟ ନୋ ଏଣ୍ଟ୍ରି ସିଷ୍ଟମ କାର୍ଯ୍ୟକାରୀ କରାଯାଇଥିଲା । ପରେ ଏସବୁର ସ୍ଥାୟୀ ସମାଧାନ ନିମନ୍ତେ ମୁନିଗୁଡ଼ା-ରାୟଗଡ଼ା ରୋଡରୁ ଜାମରାଗୁଡ଼ା ଯାଏ ବାଇପାସ ରୋଡ ଓ ଗାଡ଼ି ଏବଂ ଚାଳକଙ୍କ ସୁରକ୍ଷା, ଟ୍ରାଫିକ ନିୟନ୍ତ୍ରଣ, ସର୍ବୋପରି ମୁନିଗୁଡ଼ା ସହରକୁ ଦୁର୍ଘଟଣାମୁକ୍ତ ନିମନ୍ତେ ଅତ୍ୟାବଶ୍ୟକ ଟ୍ରକ ଟର୍ମିନାଲ ବ୍ୟବସ୍ଥା କରିବାକୁ ତତ୍କାଳୀନ ଜିଲ୍ଲାପାଳ ଓ ବିଭାଗୀୟ ଅଧିକାରୀଙ୍କୁ ମୁନିଗୁଡ଼ାବାସୀଙ୍କ ତରଫରୁ ଦାବୀ କରାଯାଇଥିଲା । ଫଳସ୍ୱରୂପ ଏବେ ବାଇପାସ୍ ରୋଡ ହେବାପାଇଁ ସରକାରଙ୍କ ତରଫରୁ ସବୁଜ ସଂକେତ ମିଳିବା ସହିତ ପ୍ରାରମ୍ଭିକ ଅଫିସିଆଲ୍ କାର୍ଯ୍ୟ ଆରମ୍ଭ ହୋଇଥିବା ଶୁଣିବାକୁ ମିଳୁଛି । ହେଲେ ଗାଡ଼ି ଡ୍ରାଇଭର, ଗାଡ଼ି ସୁରକ୍ଷା ଓ ଟ୍ରାଫିକ ସମସ୍ୟା ଦୃଷ୍ଟିରୁ ଅତି ଜରୁରୀ ଆବଶ୍ୟକ ହେଉଥିବା ଟ୍ରକ ଟର୍ମିନାଲ ନିର୍ମାଣ ହେବାର ବିଳମ୍ବକୁ ଦେଖି ଗାଡ଼ି ଡ୍ରାଇଭରମାନେ ଉଦବେଗ ପ୍ରକାଶ କରିଛନ୍ତି । ଏହି ବ୍ୟସ୍ତବହୁଳ ରାଜ୍ୟ ରାଜପଥ କଡ଼ରେ ସେମାନଙ୍କୁ ଖରା,ବର୍ଷା ଓ ଶୀତରେ ଗାଡ଼ି ରଖି ବିଶ୍ରାମ ନେବାକୁ ପଡୁଛି ବୋଲି ସେମାନେ କହିଛନ୍ତି । ନିଛାଟିଆ ରାସ୍ତା ଥିବା କାରଣରୁ ସେମାନଙ୍କୁ ମୁନିଗୁଡ଼ା ଉପକଣ୍ଠ ଭବାନୀପାଟଣା ପଟୁ ମଶାଣି ସମ୍ମୁଖ ରୋଡ, ବାଲିଗୁଡ଼ା ପଟୁ ଭୌରବୀ ମନ୍ଦିର ସମ୍ମୁଖ ଓ ରାୟଗଡ଼ା ପଟୁ ମୁନିଗୁଡ଼ା ମିନି ଷ୍ଟାଡିୟମ କଡ଼ରେ ଗାଡ଼ି ପାର୍କିଂ କରି ଭୟରେ ରହିବାକୁ ପଡୁଛି । ଯଦି କେବେ ଷ୍ଟ୍ରାଇକ ହେଉଛି ତେବେ ଆହୁରି ଦୟନୀୟ ସମସ୍ୟା ଉପୁଜିଛି । ସମୟେ ସମୟେ ଗାଡ଼ିରୁ ବ୍ୟାଟେରୀ, ଷ୍ଟେପିନ ଓ ଡିଜେଲ ଚୋରି ହୋଇଯାଉଛି । ଅନେକ ସମୟରେ ଅସାମାଜିକ ଲୋକଙ୍କ ଦୌରାତ୍ମ୍ୟ ମଧ୍ୟ ସାମ୍ନା କରିବାକୁ ପଡୁଥିବା ରାଜ୍ୟ ବାହାର ଡ୍ରାଇଭରମାନେ ଦୁଃଖର ସହିତ କହିଛନ୍ତି । ରାଜ୍ୟ ସରକାର ଏବେ ବିଭିନ୍ନ ଅଞ୍ଚଳରେ ଟ୍ରକ ଟର୍ମିନାଲ ନିର୍ମାଣ କରିବା ପାଇଁ ଘୋଷଣା କରିଛନ୍ତି । ଏଣୁ ଭୌଗଳିକ, ବ୍ୟବସାୟିକ, ଗମନାଗମନ ଓ ସହରର ଟ୍ରାଫିକ ନିୟନ୍ତ୍ରଣ ଦୃଷ୍ଟିରୁ ମୁନିଗୁଡ଼ା ଉପକଣ୍ଠରେ ଏକ ଟ୍ରକ ଟର୍ମିନାଲ ନିର୍ମାଣ କରିବାକୁ ମୁନିଗୁଡ଼ାର ବିଭିନ୍ନ ମହଲରୁ ଦାବୀ ଉଠୁଛି । ଏହି ପରିପ୍ରେକ୍ଷୀରେ ମୁନିଗୁଡ଼ା ଗାଡ଼ି ଚାଳକମାନେ ସମସ୍ତ ଗାଡ଼ି ଚାଳକଙ୍କ ସୁରକ୍ଷା ଦୃଷ୍ଟିରୁ ଅନ୍ୟ ରାଜ୍ୟ ଏବଂ ଓଡ଼ିଶାର ବିଭିନ୍ନ ଅଞ୍ଚଳରେ ଗାଡ଼ି ଚାଳକ ଓ ଗାଡ଼ି ମାନଙ୍କୁ ମିଳୁଥିବା ଟ୍ରକ ଟର୍ମିନାଲ ସୁବିଧା ସେମାନଙ୍କୁ ଓ ଦୂର ଦୁରାନ୍ତରରୁ ଆସୁଥିବା ଡ୍ରାଇଭରଙ୍କୁ ଯୋଗାଇଦେବାକୁ ଦାବୀ କରିଛନ୍ତି ।
