ବିଜେପି ନେତା ଶୁଭେନ୍ଦୁ ଅଧିକାରୀଙ୍କ ନାଁରେ ରିଲିଫ ସାମଗ୍ରୀ ହଡପ ଅଭିଯୋଗ

କୋଲକାତା: ବିଜେପି ନେତା ଶୁଭେନ୍ଦୁ ଅଧିକାରୀ ଓ ତାଙ୍କ ଭାଇ ସୌମେନ୍ଦ୍ର ଅଧିକାରୀଙ୍କ ନାଁରେ ସାଙ୍ଘାତିକ ଅଭିଯୋଗ। କାନ୍ତି ମ୍ୟୁନିସିପାଲିଟିକୁ ବାତ୍ୟା ୟସ ପାଇଁ ଆସିଥିବା ରିଲିଫ ସାମଗ୍ରୀ ହଡପ କରିଥିବା ନେଇ ଦୁଇଜଣଙ୍କ ନାଁରେ ମାମଲା ରୁଜୁ ହୋଇଥିବା ପୋଲିସ ପକ୍ଷରୁ ସୂଚନା ମିଳିଛି।

ବାତ୍ୟା ୟାସ ପାଇଁ କାନ୍ତି ମ୍ୟୁନିସିପାଲିଟିକୁ ଆସିଥିବା ରିଲିଫ ସାମଗ୍ରୀ ହଡପ ହୋଇଥିବା ଅଭିଯୋଗ ହୋଇଛି। ବିଜେପି ନେତା ଶୁଭେନ୍ଦୁ ଅଧିକାରୀ ଓ ତାଙ୍କ ଭାଇ ତଥା ପୂର୍ବତନ ମ୍ୟୁନିସିପାଲିଟି ମୁଖ୍ୟ ସୌମେନ୍ଦ୍ର ଅଧିକାରୀ ନାଁରେ ଏହି ଅଭିଯୋଗ ହୋଇଛି। ବାତ୍ୟା ୟାସ ଯୋଗୁଁ ରାଜ୍ୟରେ ଶହ ଶହ ନଦୀ ବନ୍ଧ କ୍ଷତିଗ୍ରସ୍ତ ହୋଇଛି। ଏହାର କ୍ଷୟକ୍ଷତି ଆକଳନ ପାଇଁ ମୁଖ୍ୟମନ୍ତ୍ରୀ ମମତା ବାନାର୍ଜୀ ନିର୍ଦ୍ଦେଶ ଦେଇଥିଲେ। ଏହି ସମୟରେ ଜଳସମ୍ପଦ ବିଭାଗରେ ହୋଇଥିବା ବିଭିନ୍ନ ଦୁର୍ନୀତି ସାମ୍ନାକୁ ଆସିଛି। ଜଳ ସମ୍ପଦ ବିଭାଗରେ ଜଣଙ୍କୁ ଚାକିରୀ କରେଇଦେବା ନେଇ ୨ ଲକ୍ଷ ଠକିଥିବା ଅଭିଯୋଗରେ ଶୁଭେନ୍ଦୁ ଅଧିକାରୀଙ୍କ ଘନିଷ୍ଠ ସହଯୋଗୀଙ୍କୁ ଗିରଫ କରାଯାଇଛି। ଗିରଫ ସହଯୋଗୀ ଜଣକ ହେଲେ ରାଖେଲ ବେରା।

ଶୁଭେନ୍ଦୁ ଓ ସୌମେନ୍ଦ୍ର ତାଙ୍କ ନାଁରେ ହୋଇଥିବା ଅଭିଯୋଗ ନେଇ କିଛି ପ୍ରତିକ୍ରିୟା ଦେଇନାହାନ୍ତି। ସହଯୋଗୀ ରାଖେଲ ବେରାଙ୍କୁ ନେଇ ଶୁଭେନ୍ଦୁ କହିଛନ୍ତି ରାଖେଲ ମୋର ସହଯୋଗୀ ବୋଲି କିଛି ପ୍ରମାଣ ଅଛି କି, ମୁଁ ଏହି ବିଷୟରେ କିଛି କହିବାକୁ ଚାହୁଁନାହିଁ ବୋଲି କହିଛନ୍ତି ଶୁଭେନ୍ଦୁ। ଅନ୍ୟପଟେ ସ୍ଥାନୀୟ ଟିଏମସି ନେତା ଓ ମମତାଙ୍କ କ୍ୟାବିନେଟ ମନ୍ତ୍ରୀ ଅଖିଳ ଗିରି କହିଛନ୍ତି ଶୁଭେନ୍ଦୁ ଅଧିକାରୀ ଜଳସମ୍ପଦ ମନ୍ତ୍ରୀ ଥିବାବେଳେ ରାଖେଲ ବେରାଙ୍କ ନାଁରେ ଏହି ଅଭିଯୋଗ ଆସିଥିଲା। ପୁଲିସ ତଦନ୍ତ କରିବାପରେ ରାଖେଲଙ୍କୁ ଗିରଫ କରିଥିଲା। ସେ ଶୁଭେନ୍ଦୁଙ୍କ ସହଯୋଗୀ ବୋଲି ଜଣାପଡିଛି। ଯଦି ସେମାନେ ଦୋଷୀ ବୋଲି ପ୍ରମାଣିତ ହୁଅନ୍ତି ଆଇନ ଅନୁଯାୟୀ ତାଙ୍କୁ ଦଣ୍ଡିତ କରାଯିବ ବୋଲି ପୁଲିସ ସୂଚନା ଦେଇଛି।