ଚଲ୍ସାର ଚା’ ବଗିଚା, ଘନ ଜଙ୍ଗଲ ଏବଂ ସୁନ୍ଦର ସୁନ୍ଦର ନଦୀ ଦେଶ ବିଦେଶର ପର୍ଯ୍ୟଟକଙ୍କୁ ଆକର୍ଷିତ କରେ
ବ୍ୟୁରୋ: ପଶ୍ଚିମବଙ୍ଗର ପ୍ରମୁଖ ତଥା ଆକର୍ଷଣୀୟ ପର୍ଯ୍ୟଟନ ସ୍ଥଳଗୁଡ଼ିକ ଭିତରୁ ଚଲ୍ସା ଅନ୍ୟତମ। ସିଲିଗୁଡ଼ି ଭଳି ପ୍ରସିଦ୍ଧ ପର୍ଯ୍ୟଟନ ସ୍ଥଳଠାରୁ ଏହାର ଦୂରତା ଅଧିକ ନୁହେଁ। ଚଲ୍ସାର ଚା’ ବଗିଚା, ଘନ ଜଙ୍ଗଲ ଏବଂ ସୁନ୍ଦର ସୁନ୍ଦର ନଦୀ ଦେଶ ବିଦେଶର ପର୍ଯ୍ୟଟକଙ୍କୁ ଆକର୍ଷିତ କରେ। ଏଠାକାର ଜଙ୍ଗଲରେ ଗଣ୍ଡା ଓ ହାତୀ ଦେଖିବାକୁ ମିଳନ୍ତି। ତେଣୁ ଯେତେବେଳେ ଆପଣ ଏହି ସ୍ଥାନ ବୁଲି ଦେଖିବାକୁ ଆସିବେ, ଗାଁର ଜଣେ ବ୍ୟକ୍ତିଙ୍କୁ ଗାଇଡ୍ ଭାବେ ନେବାକୁ ଭୁଲିବେ ନାହିଁ। ଗଣ୍ଡା ଓ ହାତୀଙ୍କୁ ବାଦ୍ ଦେଲେ ଏହି ସ୍ଥାନର ଜଙ୍ଗଲରେ ଆପଣ ସମ୍ବର, ଦାଗଯୁକ୍ତ, ଭୁକୁଥିବା ଆଦି ଅନେକ ପ୍ରଜାତିର ହରିଣଙ୍କୁ ଦେଖିବାକୁ ପାଇବେ।
ଏଠାରେ ରହିଛି ୭୫୦ ବର୍ଗ କିଲୋମିଟରରେ ପରିବ୍ୟାପ୍ତ ବୁକ୍ସା ବ୍ୟାଘ୍ର ଅଭୟାରଣ୍ୟ। ଏହି ଅଭୟାରଣ୍ୟରେ ଆପଣ ଲୁପ୍ତପ୍ରାୟ ବେଙ୍ଗଲ୍ ଟାଇଗର୍ ଦେଖିବାର ସୁଯୋଗ ପାଇବେ। ପ୍ରକୃତିପ୍ରେମୀ ତଥା ଟ୍ରେକିଂ କରିବାକୁ ଭଲପାଉଥିବା ବ୍ୟକ୍ତିଙ୍କ ପାଇଁ ବୁକ୍ସା ଅଭୟାରଣ୍ୟ ଏକ ବହୁତ ବଢ଼ିଆ ଭ୍ରମଣ ବିକଳ୍ପ। ବେଙ୍ଗଲ୍ ଟାଇଗର୍ ବ୍ୟତୀତ ବୁକ୍ସା ରିଜର୍ଭରେ ଆପଣ ତେନ୍ଦୁଆ ଏବଂ ନାନା ପ୍ରଜାତିର ଗୁଣ୍ଡୁଚି ମୂଷା ଏବଂ ଅନେକ ପ୍ରକାରର ପକ୍ଷୀଙ୍କୁ ଦେଖିପାରିବେ।
ଚଲ୍ସା ଓ ଏହାର ଆଖପାଖ ବୁଲି ଦେଖିସାରିବା ପରେ ଆପଣ ଜଲପାଇଗୁଡ଼ି ଭ୍ରମଣ କରିପାରିବେ। ହିନ୍ଦୀରେ ‘ଜଲପାଇଗୁଡ଼ି’ର ଅର୍ଥ ଜୈତୁନ, ଯାହାକୁ ଇଂରାଜୀରେ ଆମେ ଅଲିଭ୍ ବୋଲି କହୁ। ୧୯୯୦ ଦଶକରେ ଜଲପାଇଗୁଡ଼ିରେ ବହୁ ସଂଖ୍ୟକ ଅଲିଭ ଗଛ ଦେଖିବାକୁ ମିଳୁଥିଲା। ଜଲପାଇଗୁଡ଼ିର ଅନ୍ତର୍ଜାତୀୟ ସୀମା ଉତ୍ତରରେ ଭୁଟାନ୍ ଏବଂ ପୂର୍ବରେ ବାଙ୍ଗଲାଦେଶକୁ ସ୍ପର୍ଶ କରିଛି। ଦାର୍ଜିଲିଂ ହିଲ୍ସ ଏଠାରୁ ଅଧିକ ଦୂର ନୁହେଁ। ଦିନଟିଏ ସମୟ ବାହାର କରି ଆପଣ ସେଠାକୁ ଯାଇପାରିବେ। ସିଲିଗୁଡ଼ି ଓ ଉତ୍ତର ପଶ୍ଚିମବଙ୍ଗର ସହରଗୁଡ଼ିକୁ ଆସୁଥିବା ପର୍ଯ୍ୟଟକ ମଧ୍ୟ ଜଲପାଇଗୁଡ଼ି ଆସିଥାନ୍ତି।
ଜଲପାଇଗୁଡ଼ି ଓ ଏହାର ଆଖପାଖରେ ଥିବା ପ୍ରମୁଖ ପର୍ଯ୍ୟଟନ ସ୍ଥଳ ମଧ୍ୟରେ ରହିଛି ଜୁବ୍ଲି ପାର୍କ, ଟାଉନ କ୍ଳବ ଷ୍ଟାଡିୟମ ଓ ତୀସ୍ତା ନଦୀ। କରାଲା ନଦୀ କୂଳରେ ତିଆରି କରାଯାଇଥିବା ତୀସ୍ତା ପାର୍କ ପିଲାଙ୍କ ପାଇଁ ଏକ ଆଦର୍ଶ ସ୍ଥାନ। ଜଲପାଇଗୁଡ଼ିଠାରୁ ୧୫ କିଲୋମିଟର ଦୂରରେ ରହିଛି ଜଳପେଶ ମନ୍ଦିର। ଏଠାରେ ରହିଛି ଏକ ପ୍ରସିଦ୍ଧ ଶିବ ମନ୍ଦିର। ଜଲପାଇଗୁଡ଼ି ସହରଠାରୁ ୮୦ କିଲୋମିଟର ଦୂରତାରେ ରହିଛି ଏକ ନ୍ୟାସନାଲ୍ ପାର୍କ। ସେଠାକୁ ଯାଇ ମଧ୍ୟ ଆପଣ ଭ୍ରମଣର ମଜା ନେଇପାରିବେ।
