ନୂଆଦିଲ୍ଲୀ,ଏଜେନ୍ସି: ବହୁଚର୍ଚ୍ଚିତ ଦିଲ୍ଲୀ ଅବକାରୀ ନୀତି ଦୁର୍ନୀତି ମାମଲାରେ ଦିଲ୍ଲୀ ଉପ ମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କୁ ସମନ ଜାରି କରିଛି କେନ୍ଦ୍ରୀୟ ତଦନ୍ତକାରୀ ସଂସ୍ଥା ସିବିଆଇ । ସମନ ସର୍ତ୍ତାବଳୀ ଅନୁସାରେ ସିସୋଦିଆ ଆସନ୍ତାକାଲି ( ସୋମବାର) ସଂସ୍ଥାର ଦିଲ୍ଲୀ ସ୍ଥିତ ମୁଖ୍ୟାଳୟରେ ହାଜର ହୋଇ ଜେରାର ସମ୍ମୁଖୀନ ହୋଇପାରନ୍ତି । ତେବେ ନିଜେ ପାଇଥିବା ସମନ ସମ୍ପର୍କରେ ସିସୋଦିଆ ମଧ୍ୟ ଟ୍ବିଟ କରି ସୂଚନା ଦେଇଛନ୍ତି । ତାଙ୍କୁ ଜେରା ପାଇଁ ସମନ ଜାରି କରାଯାଇଛି ଓ ସେ ତଦନ୍ତରେ ସମ୍ପୂର୍ଣ୍ଣ ସହଯୋଗ କରିବେ ବୋଲି ମଧ୍ୟ ସେ ଟ୍ବିଟରେ ଉଲ୍ଲେଖ କରିଛନ୍ତି ।
ସିସୋଦିଆ ଟ୍ବିଟରେ କହିଛନ୍ତି, ‘‘ମୋ ବାସଭବନ ସମେତ ଗାଁରେ ଥିବା ଘରେ ପ୍ରାୟ ୧୪ ଘଣ୍ଟା ଧରି ଚଢାଉ କଲେ । ବ୍ୟାଙ୍କ ଆକାଉଣ୍ଟ ମଧ୍ୟ ତଲାସି କଲେ, ତଥାପି କିଛି ମିଳିଲାନାହିଁ । ତଥାପି ମତେ ଜେରା କରିବା ପାଇଁ ସମାନ କରାଯାଇଛି । ମୁଁ ଆସନ୍ତାକାଲି ପୂର୍ବାହ୍ନ ୧୧ଟାରେ ସିବିଆଇ ମୁଖ୍ୟାଳୟରେ ହାଜର ହୋଇ ତଦନ୍ତରେ ସମସ୍ତ ସହଯୋଗ କରିବି ।’’
ଏହି ମାମଲାରେ ପ୍ରଥମ ଦିନରୁ ତଦନ୍ତ ପରିସରରେ ରହିଛନ୍ତି ଏଏପିର ବରିଷ୍ଠ ନେତା ତଥା ଦିଲ୍ଲୀ ଉପ ମୁଖ୍ୟମନ୍ତ୍ରୀ ମନୀଷ ସିସୋଦିଆ । ଅଗଷ୍ଟରେ ଏହି ବହୁଚର୍ଚ୍ଚିତ ମାମଲାର ତଦନ୍ତ କେନ୍ଦ୍ରୀୟ ସଂସ୍ଥା ଦ୍ବାରା ଆରମ୍ଭ ହେବା ପରେ ସିସୋଦିଆଙ୍କ ଘରେ ସିବିଆଇ ଚଢାଉ କରିଥିଲା । ନୂତନ ଅବକାରୀ ନୀତି କାର୍ଯ୍ୟକାରୀ କରିବାରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ହୋଇଥିଲା । ତେବେ ଦିଲ୍ଲୀ କ୍ୟାବିନେଟରେ ଉପ ମୁଖ୍ୟମନ୍ତ୍ରୀ ଥିବା ସିସୋଦିଆ ଅବକାରୀ ବିଭାଗର ଦାୟିତ୍ବରେ ମଧ୍ୟ ରହିଛନ୍ତି । ତେଣୁ ତାଙ୍କ ଭୂମିକାକୁ ମଧ୍ୟ ତଦନ୍ତ ପରିସରକୁ ଆଣିଥିଲା କେନ୍ଦ୍ରୀୟ ସଂସ୍ଥା ।
୨୦୨୧ ମଧ୍ୟଭାଗରେ କେଜ୍ରିଓ୍ବାଲ ନେତୃତ୍ବାଧୀନ ସରକାର ନୂତନ ଅବକାରୀ ନୀତି ଲାଗୁ ପାଇଁ ବିଧାନସଭାରେ ବିଲ ପାରିତ କରିଥିଲେ । ତେବେ ଏହି ମାମଲାରେ ଅବକାରୀ ମନ୍ତ୍ରୀ ସିସୋଦିଆଙ୍କ ସମେତ କିଛି ବରିଷ୍ଠ ଅଧିକାରୀଙ୍କୁ ମିଶାଇ ମୋଟ ୧୫ ଜଣଙ୍କ ନାମରେ ମାମଲା ରୁଜୁ କରିଛି କେନ୍ଦ୍ରୀୟ ତଦନ୍ତକାରୀ ସଂସ୍ଥା ସିବିଆଇ । ଏହି ମାମଲାରେ ଅବକାରୀ କମିସନର ଅରଭା ଗୋପୀକ୍ରିଷ୍ଣା, ଡେପୁଟି କମିଶନର ଆନନ୍ଦ ତିଓ୍ବାରୀ ଓ ସହାୟକ କମିଶନର ପଙ୍କଜ ଭଟ୍ଟନାଗର ମଧ୍ୟ ରହିଛନ୍ତି । ତେବେ ଏହି ମାମଲାରେ ଜାରି ରହିଥିବା କାର୍ଯ୍ୟାନୁଷ୍ଠାନକୁ ଦଳ ବିଜେପିର ଆକ୍ରୋଶମୂଳକ କାର୍ଯ୍ୟାନୁଷ୍ଠାନ ବୋଲି କହି ଆସୁଛି । ପୂର୍ବରୁ ସିସୋଦିଆଙ୍କ ଘରେ ରେଡ ହୋଇ ସାରିଥିବା ବେଳେ ଆସନ୍ତାକାଲି ପୁଣି ଜେରାର ସମ୍ମୁଖୀନ ହେବାକୁ ଯାଉଛନ୍ତି ସିସୋଦିଆ ।
