ଦେବଗଡ଼,ଏନ୍ଏନ୍ଏସ୍: ଜିଲ୍ଲା ଠିକାଦାର ସଂଘର କାର୍ଯ୍ୟକାରୀ ସଭାପତି ଇଂ ଅଜୟ କୁମାର ପ୍ରଧାନଙ୍କ ନିର୍ଦ୍ଦେଶକ୍ରମେ ସଂଘ ସାଧାରଣ ସମ୍ପାଦକ ଅନୁପମ ମୋଦୀ ସ୍ଥାନୀୟ ବସନ୍ତନିବାସ ଡାକବଙ୍ଗଳାରେ ସଂଘର ଏକ ବୈଠକ ଅନୁଷ୍ଠିତ କରାଇଥିଲେ । ଉକ୍ତ ବୈଠକରେ କୋଷାଧ୍ୟକ୍ଷ ଇଂ. କୁମାର ସ୍ୱସ୍ତିକ ମହାପାତ୍ର ସଂଘର ବାର୍ଷିକ ଆୟବ୍ୟୟର ବିସ୍ତୃତ ବିବରଣୀ ଉପସ୍ଥିତ କାର୍ଯ୍ୟକାରୀ ଓ ବରିଷ୍ଠ ସଦସ୍ୟଙ୍କୁ ଦେଇଥିଲେ । ଦୀର୍ଘ ୨ ବର୍ଷ ହେବ କରୋନା ମହାମାରୀକୁ ଦୃଷ୍ଟିରେ ରଖି ସ୍ଥଗିତ ରଖାଯାଇଥିବା ସଂଘର ନିର୍ବାଚନକୁ ଯଥାଶୀଘ୍ର କରାଯିବାକୁ ନେଇ ଆଲୋଚନା ହୋଇଥିଲା । ପୂର୍ବରୁ ଜିଲ୍ଲା ସଂଘର ମୂଳ ବିଚାରଧାରାକୁ ଭୁଲ ବୁଝି ଏକ ଏସଟି-ଏସସି ଠିକାଦାର ସଂଘ ନାମକ ସଂଗଠନ ହୋଇଥିବାବେଳେ ଏହାକୁ ଜିଲ୍ଲା ସଂଘରେ ବିଲୟ କରାଯିବ । ଏହାଦ୍ୱାରା ଜିଲ୍ଲା ସଂଘର ଏକତା ବଜାୟ ରହିବ ଓ ସଂଘର ନିର୍ବାଚନ କରାଇବା ସମ୍ଭବ ହୋଇପାରିବ ବୋଲି ସମସ୍ତ ଉପସ୍ଥିତ ସଦସ୍ୟ ମତବ୍ୟକ୍ତ କରିଥିଲେ । ଏହି ପରିପ୍ରେକ୍ଷୀରେ ବୈଠକରେ ଉପସ୍ଥିତ ଏସଟି-ଏସସି ସଂଘର ସମ୍ପାଦକ ପ୍ରଜିତ କୁମାର ଭୋଜ ଏହି ବିଲୟ ସପକ୍ଷରେ ନିଜ ମତ ଦେଇଥିଲେ । ଏଥିସହିତ ସମସ୍ତ ଏସସି -ଏସଟି ଠିକାଦାରଙ୍କୁ ଜିଲ୍ଲା ସଂଘରେ ଅନ୍ତର୍ଭୁକ୍ତ କରାଇବା ସକାଶେ ଯଥାଶୀଘ୍ର ସମ୍ଭବ ସେମାନଙ୍କ ସଦସ୍ୟତା ରାଶି ଓ ଆବଶ୍ୟକ କାଗଜପତ୍ର ସଂଘରେ ଦାଖଲ କରିବାକୁ ନେଇ ଆଶ୍ୱାସନା ଦେଇଥିଲେ । ଏଥିରେ ଠିକାଦାରଙ୍କ ଉପରେ ଜିଏସଟି ବିଭାଗ ଦ୍ୱାରା ଅକଥନୀୟ ଅତ୍ୟାଚାର କରାଯାଉଥିବା ବିଷୟରେ ଆଲୋଚନା ହୋଇଥିଲା । ସଂଘ କାର୍ଯ୍ୟକାରୀ ସଦସ୍ୟଙ୍କ ମଧ୍ୟରେ ପ୍ରକାଶ କୁମାର ପାଲ, ଅନିଲ କୁମାର ରଣା, ସୌମ୍ୟକାନ୍ତ ପ୍ରଧାନ, ବରିଷ୍ଠ ଠିକାଦାର କିଶୋର ଚନ୍ଦ୍ର ଦାସ, ସତ୍ୟନାରାୟଣ ପାଣି ଓ ବିଜୟ କୁମାର ପ୍ରଧାନଙ୍କ ସମେତ ଅନେକ ଯୁବ ଠିକାଦାର କାର୍ଯ୍ୟକ୍ରମରେ ଉପସ୍ଥିତ ଥିଲେ ।
